တွန်းဇံမှာ လေကြောင်းကဗုံးကြဲလို့ ခရစ်ယာန်ဘုရားကျောင်းနဲ့ လူနေအိမ်တချို့ ပျက်စီး

ချင်းပြည်နယ်၊ တွန်းဇံမြို့နယ် လုံတပ်ရွာကို မေလ ၁၁ ရက်နေ့ ညပိုင်းမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်တာကြောင့် ခရစ်ယာန်ဘုရားကျောင်း နှစ်ကျောင်းနဲ့ နေအိမ် လေးလုံး ပျက်စီးသွားတယ်လို့ ဒေသခံတွေက ပြောပါတယ်။

တွန်းဇံမြို့နယ်ထဲမှာ တိုက်ပွဲဖြစ်တာမရှိဘဲ စစ်ကောင်စီတပ်က ဗုံးကြဲခဲ့တာလို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက ပြောပါတယ်။

“တွန်းဇံမြို့မှာ တိုက်ပွဲဖြစ်ဖို့ CNA တပ်တွေ ရောက်လာတာလို့ ပြောကြတယ်။ လုံတပ်ရွာက တွန်းဇံမြို့နဲ့နီးတယ်။ တိုက်ပွဲဖြစ်လာမှာကိုတော့ ကျွန်တော်တို့က စိုးရိမ်နေရတယ်။ လေကြောင်းနဲ့ စနေနေ့ ညမှာ နှစ်ကြိမ် လာပစ်တယ်။ မနေ့ကလည်း လေယာဉ်တွေ ဝဲနေတာရှိတယ်”

တွန်းဇံမြို့ပေါ်မှာတော့ စစ်ကောင်စီတပ်က လုံခြုံရေးတင်းကျပ်ထားပြီး မြို့အဝင်အထွက်နေရာတွေမှာလည်း ပိတ်ဆို့စစ်ဆေးနေတယ်လို့ သူက ဆိုပါတယ်။

ဒီအခြေအနေတွေနဲ့ပတ်သက်လို့ တုံ့ပြန်ချက်ရနိုင်ဖို့ စစ်ကောင်စီရဲ့ ချင်းပြည်နယ်ပြောခွင့်ရသူ ပြည်နယ်အတွင်းရေးမှူး ဦးအောင်ချိုကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိသေးပါဘူး။

အာဏာသိမ်းကာလအတွင်း စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ခရစ်ယာန် ဘုရားကျောင်းတွေအပါအဝင် ချင်းပြည်နယ်မှာရှိတဲ့ ဘာသာရေး အဆောက်အုံ ၃၅ ခု ထိခိုက်ပျက်စီးခဲ့တယ်လို့ ချင်းရေးရာအဖွဲ့ချုပ် (CHRO) ရဲ့ စာရင်းတွေမှာ ဖော်ပြထားပါတယ်။