ထိုင်းရောက်မြန်မာလုပ်သားတွေ ဇွန်လဆန်းမှ နေရပ်ပြန်ခွင့်ရမည်

ကိုရိုနာထိန်းချုပ်ကာကွယ်ရေးအတွက် ထိုင်းနိုင်ငံအတွင်း အရေးအပေါ်ကြေညာချက်တွေ ရုပ်သိမ်းမယ့် ဇွန်လ ဆန်းမှ တာ့ခ်ခရိုင်ထဲက နယ်စပ်ဂိတ်ကို ဖွင့်လှစ်မယ်လို့ ထိုင်းအစိုးရက မေ ၆ ရက် မနေ့က သတင်းထုတ်ပြန် လိုက်ပါတယ်။

အဲဒီထုတ်ပြန်ချက်ကြောင့် ဒီလအတွင်း နေရပ်ပြန်ဖို့ ကြိုးစားနေတဲ့ မြန်မာရွှေ့ပြောင်းလုပ်သားတွေ အခက်တွေ့နေပါတယ်။

ထိုင်းအာဏာပိုင်တွေရဲ့ မနေ့က ထုတ်ပြန်ချက်ကြောင့် မြန်မာအစိုးရ မူလစီစဉ်ထားတဲ့ မေလအတွင်း အလုပ် သမားတွေ ပြန်လည်လက်ခံရေးဟာ မဖြစ်နိုင်တော့ဘူးလို့ မြန်မာပြည်သားများအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက ပြောပါတယ်။

“ထိုင်းနဲ့ မြန်မာတာဝန်ရှိတဲ့သူတွေ မူလသဘောတူထားတဲ့ မေလ ၁ ရက်နေ့မှာ တရားဝင် နေရပ်ပြန်မယ်အစီစဉ် တစ်ရက်ကို လူ ၂၅၀၀ နှုန်းနဲ့ နေရပ်ပြန်မယ်၊ ဒီကြေညာချက်အရဆိုရင် မေလ၁ရက်နေ့ နေရပ်ပြန်မယ့် အစီအစဉ် ဟာ ပျက်ပြယ်သွားပြီဆိုတာကို ထိုင်းဘက်က တရားဝင်အသိပေးလိုက်တာပဲ”

ပြန်လက်ခံဖို့ အသင့်ဖြစ်နေတဲ့ မြန်မာဘက်ကတော့ အလုပ်သမားတွေပြန်လာဖို့ အခက်အခဲဖြစ်နေတဲ့ အခြေအနေကို သိရှိကြောင်း  မြဝတီခရိုင်အုပ်ချုပ်ရေးမှူး ဦးတေဇအောင် က ပြောပါတယ်။

“မေ ၁ ရက်နေ့ကတည်းက လက်ခံနေပြီဖြစ်ပါတယ်၊ နှစ်နိုင်ငံလည်းညှိပြီးသား သို့သော်လည်းပဲ ထိုင်းနိုင်ငံက အရေးပေါ်အခြေအနေကို တလတိုးလိုက်တာကို၊ ဒီလိုတိုးလိုက်တဲ့အတွက် မြန်မာနိုင်ငံသားတွေပြန်လာဖို့က ပြည်နယ်ကျော်၊ ခရိုင်ကျော် ခရီးသွားလို့ မရဘူးဖြစ်သွားတယ်၊ နောက်တခါ ညဘက်ထွက်လို့မရဘူး၊ အဲအချက်နဲ့ ငြိပြီးတော့ မူလတုန်းက တရက်ကို ၂၅၀၀ သွားလို့ရအောင်စီစဉ်တာ သို့သော်လည်း လက်တွေ့မှာ ၂၅၀၀ ရဖို့က အခက်အခဲရှိတာပေါ့”

မြန်မာနိုင်ငံဘက်က မြဝတီအမှတ် ၂ တံတားကနေ မေလ ၁ ရက်နေ့ကနေ စတင်လက်ခံနေပါတယ်။ ဒါပေမဲ့ မြန်မာလုပ်သားတွေ ဖြတ်သန်းလာရမယ့် တာ့ခ်ခရိုင်ဘက်က အဝင်အထွက်ဂိတ်ကို လာမယ့် ဇွန် ၁ရက်နေ့မှသာ ဖွင့်မှာပါ။

အဲဒီကြေညာချက်မှာ တာ့ခ်ခရိုင်အတွင်း အရေးပေါ်ကြေညာချက်တွေ ရုပ်သိမ်းလိုက်တဲ့နောက်ပိုင်း မြန်မာ အလုပ်သမား ခြောက်သောင်းခွဲကျော် ပြန်လည်ဝင်ရောက်နိုင်မှာဖြစ်ပြီး တစ်ရက်ကို ပျမ်းမျှ ၂၅၀၀ နှုန်းနဲ့ ထိုင်းမြန်မာချစ်ကြည်ရေးတံတား ၂ ကနေ ဝင်ရောက်စေမယ်လို့ ရေးသားထားပါတယ်။ အဲဒီအစီအစဉ်ကို ဒီလ ၁ရက်နေ့မှာ စတင်ဖို့ နှစ်နိုင်ငံ အစိုးရ သဘောတူခဲ့ကြပေမယ့် ဒီသဘောတူညီမှု ပျက်ပြယ်သွားတဲ့ သဘောဖြစ် တယ်လို့ မြန်မာပြည်သားအရေး ပူးတွဲလှုပ်ရှားမှုကော်မတီဥက္ကဋ္ဌ ဦးမိုးကြိုး က ပြောပါတယ်။

နိုင်ငံခြားရေးဝန်ကြီးဌာန ကောင်စစ်ရေးရာနဲ့ ဥပဒေရေးရာညွှန်ကြားရေးမှူးချုပ် ဦးအောင်ကျော်ဇံ က ထိုင်းအစိုးရနဲ့ ထပ်မံညှိနှိုင်းနေပေမယ့်  သဘောတူညီမှု မရသေးဘူးလို့ ပြောပါတယ်။

“ကျနော်တို့ဘက်က ညမထွက်ရရှိသလို သူတို့ဘက်မှာလည်း ညမထွက်ရရှိတာကြောင့် အဲအချိန်ကိုရှောင်ပြီး မနက် ၈ နာရီကနေ ည ၁၁နာရီ ညှိနှိုင်းတာက ဘန်ကောက်ကားဂိတ်ကနေ ကားတွေထွက်လာမယ် ဒီဘက်ကို မြဝတီတံတား၂ အထိကို ၂၅၀၀ နှုန်းနဲ့ စိစစ်လက်ခံပြီးတော့ ဟိုဘက်ကနေစီစဉ်ပေးဖို့ ညှိနှိုင်းထားတာကတော့ ခုထိလုံးဝအဆင်ပြေသွားတယ်၊ စလွှတ်တော့မယ်ဆိုတဲ့ သတင်းတော့ မရသေးဘူးခင်ဗျ”

လက်ရှိ ထိုင်းနိုင်ငံထဲမှာ လုပ်ငန်းကိုင်ငန်း ရပ်ဆိုင်းထားမှု၊ ကူးစက်ရောဂါ ကာကွယ်ရေး အစီအစဉ်တို့ကြောင့် မြန်မာလုပ်သား အတော်များများဟာ အလုပ်လက်မဲ့ ဖြစ်နေကြတာပါ။ ဒီအခြေအနေနဲ့ နောက်ထပ် တစ်လ လောက် ထိုင်းနိုင်ငံထဲမှာ ထပ်နေရမှာဖြစ်လို့  စားဝတ်နေရေးအခက်အခဲတွေ၊ ငွေကြေးအခက်အခဲတွေနဲ့ ကြုံနေရပြီလို့ အလုပ်သမားတွေက ပြောပါတယ်။

“အစိုးရကိုပြောချင်တာက လမ်းလေးဖွင့်ပေးစေချင်တယ်၊ ဒီမှာစားဖို့သောက်ဖို့က တော်တော်အခက်အခဲ ဖြစ်နေတာ၊ သူဌေးကလည်း အလုပ်အဆင်းမခံတော့ဘူး စားဖို့သောက်ဖို့လည်းမရှိဘူး လမ်းစရိတ်လောက်ပဲ ရှိတော့တယ်”

ဘန်ကောက်မြို့က မြန်မာလုပ်သား ကိုကျော်သူရ က ပြောသွားတာပါ။

မြန်မာလုပ်သားတွေ ဘယ်အချိန်မှာ နေရပ်ပြန်ခွင့်ရမယ်ဆိုတာကို မြန်မာအစိုးရအနေနဲ့လည်း တိတိကျကျ သတင်းထုတ်ပြန်ပေးသင့်တယ်လို့ အလုပ်သမားအရေးဆောင်ရွက်နေသူတွေနဲ့ အလုပ်သမားတွေက တောင်း ဆိုလိုက်ပါတယ်။

ပါကျန်ဘူရီခရိုင်မှာ အလုပ်လုပ်နေတဲ့ မောင်ကိုကိုဦး က မြန်မာလုပ်သားတွေအတွက် မြန်မာအစိုးရဘက်က တိတိကျကျ ညွှန်ကြားချက်ပေးဖို့ ပြောပါတယ်။

“အစိုးရအနေနဲ့ တိတိကျကျ ဘယ်နေ့ဖွင့်ပေးမယ်၊ သွားလမ်းလာလမ်းဖြောင့်တယ် အဲလိုအသံမျိုးပဲ တိတိ ကျကျကြားချင်တာ၊ အခုကျတော့ မြန်မာပြည်က ကိုယ်မိဘကဖုန်းဆက်ရင်တောင် ဘယ်နေ့ပြန်လာမလဲမေးရင် ဖြေလို့မရဘူး၊ ဘယ်နေ့ပြန်လို့ရမယ်ဆိုတာကို သတင်းတွေထုတ်ပြီး ထုတ်တဲ့နေမှာပဲ တကယ်ပြန်လို့ရအောင် နှစ်ဦးနှစ်ဖက်ညှိနှိုင်းစေချင်တယ်”

သန်းနဲ့ချီတဲ့ မြန်မာလုပ်သားတွေ အလွယ်တကူနေရပ်ပြန်နိုင်အောင် အမိန့်၊ ညွှန်ကြားချက်တွေကို ဖြေလျှော့ မပေးဘဲ တင်းကျပ်ထားတာဟာ ရွှေ့ပြောင်းလုပ်သားတွေအားလုံး နေရပ်ပြန်မှာကို လိုလားပုံမရတာကြောင့်လည်း ဖြစ်နိုင်တယ်လို့ အလုပ်သမားအရေးဆောင်ရွက်နေတဲ့ မြန်မာပြည်သားအရေး ပူးတွဲလှုပ်ရှားမှုကော်မတီဥက္ကဋ္ဌ ဦးမိုးကြိုး က သုံးသပ်ပါတယ်။

“ဖြစ်နိုင်ခြေရှိတာကတော့ ကျွမ်းကျင်လုပ်သားတွေဖြစ်တဲ့ ထိုင်းမှာရှိတဲ့ မြန်မာရွေ့ပြောင်းအလုပ်သမားတွေကို သူတို့ရဲ့လုပ်ငန်းရှင်တွေက လက်မလွှတ်ချင်ဘူး၊ နောက်သူတို့ရဲ့အစိုးရက လက်မလွှတ်ချင်ဘူး၊ နောက်ထိုင်း နိုင်ငံရဲ့ ဘက်ပေါင်းစုံကျဆင်းနေတဲ့ စီးပွားရေးမှာ ရွှေ့ပြောင်းလုပ်သားတွေရဲ့ အခန်းကဏ္ဍကအရေးကြီးတယ်၊ အဲအတွက်ကြောင့် ထိုင်းနိုင်ငံပြန်တည်ငြိမ်လာရင် ကုန်သွယ်ရေးနဲ့ စီးပွားရေးကို ပြန်လည်ပြီးတော့ သူတို့ ရွှေ့ပြောင်းလုပ်သားတွေရဲ့အားနဲ့ တည်ဆောက်ချင်တဲ့သဘောလည်း သက်ရောက်တယ်”

ရွှေ့ပြောင်းလုပ်သားတွေကို ထိုင်းအစိုးရက စားနပ်ရိက္ခာထောက်ပံ့တာမရှိသလို အလုပ်ရှင် အများစုကလည်း အလုပ်ထုတ်ပေမယ့် နစ်နာကြေးပေးတာမျိုးတွေ မရှိပါဘူး။

လက်ရှိထိုင်းနိုင်ငံမှာ မြန်မာလုပ်သား ၃ သန်းနီးပါးရှိပြီး နေရပ်ပြန်ဖို့အတွက် သံရုံးမှာ စာရင်းပေးထားသူ နှစ်သောင်းကျော် ရှိပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကတော့ ရွှေ့ပြောင်းလုပ်သား တစ်သိန်းခွဲနီးပါး နေရပ် ပြန်လာနိုင်တယ်လို့ မွန်၊ ကရင်၊ တနင်္သာရီဝန်ကြီးချုပ်တွေနဲ့ အွန်လိုင်းတွေဆုံပွဲမှာ ထည့်သွင်းပြောကြားသွား ခဲ့ပါတယ်။

ထိုင်းနိုင်ငံမှာရှိတဲ့ မြန်မာအလုပ်သားတွေကတော့ ဘယ်နေ့နေရပ်ပြန်ရမလဲဆိုတာ တိတိကျကျ မသိရသေးဘဲ စားသောက်နေထိုင်ဖို့ အခက်အခဲတွေနဲ့ ရင်ဆိုင်နေရပါတယ်။