རྒྱལ་སྤྱིའི་ནང་གོ་མཚོན་ནང་འདྲེན་བྱེད་མཁན་ཨང་དང་པོ།

༄༅༎སུད་དྲན་ནང་རྟེན་གཞི་བྱེད་པའི་རྒྱལ་སྤྱིའི་གོ་མཚོན་རྟོག་ཞིབ་ལས་ཁུངས་ནས་དཔྱད་ཞིབ་བྱས་པར་ལྟར་ན། རྒྱ་གར་རྒྱལ་ཁབ་ངོས་ནས་དམག་དོན་གྱི་གོ་མཚོན་དེང་དུས་ཅན་བཟོ་ཐབས་སུ་དམིགས་ནས་གོ་མཚོན་ནང་འདྲེན་བྱེད་རྒྱུ་ཤུགས་ཆེ་རུ་བཏང་ནས་ད་ཆ་རྒྱ་ནག་ལས་ནང་འདྲེན་མང་བ་བྱེད་ཀྱི་ཡོད་རེད་ཅེས་བཀོད་པ་དང་ཆབས་ཅིག་ཕྱི་ལོ་༢༠༠༦ནས་ཕྱི་ལོ་༢༠༡༠བར་རྒྱལ་སྤྱིའི་གོ་མཚོན་ནང་འདྲེན་བྱེད་པའི་བརྒྱ་ཆ་དགུ་ཙམ་རྒྱ་གར་ཆགས་ཀྱི་ཡོད་ལུགས་འགྲེལ་བརྗོད་བྱེད་ཡོད་འདུག

ཡང་གོང་ཞུས་དཔྱད་ཞིབ་པ་ཚོས་མུ་མཐུད་བཀོད་པར་ལྟར་ན། ཁྱིམ་མཚེས་རྒྱ་ནག་དཔལ་འབྱོར་གྱི་སྟོབས་ཤུགས་ཆེན་པོ་ཆགས་ཀྱི་ཡོད་པ་དེས་རང་བཞིན་གྱི་རྒྱ་གར་གྱི་ས་མཚམས་དང་། མཚོ་ཁའི་ཐོག་ལའང་ཉེན་སྲུང་བྱེད་དགོས་དུས་དེང་དུས་འཕྲུལ་རིགས་ཡར་རྒྱས་དང་བསྟུན་ནས་དམག་དོན་གྱི་གོ་མཚོན་ཡང་རྒྱ་སྐྱེད་དང་ཡར་རྒྱས་གཏོང་དགོས་པ་ཞིག་གྱུར་ཡོད་རེད་ལ་ཕྱོགས་གཞན་ནས་རྒྱ་གར་རང་ཉིད་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྲུང་སྐྱོབ་ལྷན་ཚོགས་ཀྱི་གཏན་འཇགས་ཚོགས་མིའི་ཁོངས་སུ་ཚུད་ཐབས་སུ་དམག་དོན་གྱི་ནུས་ཤུགས་ཆེན་པོ་བཟོ་དགོས་རྒྱུའང་གལ་འགངས་ཆེན་པོ་ཆགས་ཀྱི་ཡོད་རེད་ཅེས་འགྲེལ་བརྗོད་བྱེད་ཡོད་པ་རེད། ལོ་འདིའི་རྒྱ་གར་གཞུང་གི་བདེ་སྲུང་ལས་དོན་ཆེད་སྔོན་རྩིས་འགྲོ་གྲོན་གཏོང་དམིགས་སུ་ཨ་རིའི་དྲོ་ལར་ཐེར་འབུམ་༣༢ལྷག་ཙམ་བཞག་ཡོད་པ་ནི་འདས་པའི་ལོ་གཉིས་ཙམ་གོང་ནས་བརྩིས་ན་བརྒྱ་ཆ་བཞི་བཅུ་ཙམ་འཕར་ཡོད་པ་རེད།