ཨ་རིའི་དཀྱིལ་ཤར་ཡུལ་གྲུའི་སྐུ་ཚབ་དགོངས་ཞུས།

༄༅༎ཨ་རིའི་སྲིད་འཛིན་སྦ་རཀ་ཨོ་སྦ་མ་ཡིས་དཀྱིལ་ཤར་ཡུལ་གྲུ་ཨི་སི་རེལ་དང་པེ་ལེསི་ཀྲའེན་གྱི་དཀའ་རྙོག་སེལ་ཐབས་སུ་བསྐོ་བཞག་གནང་བའི་སྐུ་ཚབ་ཇོཇ་མི་ཆེལ་རྩ་དགོངས་ཞུས་པར་བཀའ་འཁྲོལ་གནང་འདུག ཨ་རིའི་གྲོས་ཚོགས་གོང་མའི་འཐུས་མི་ཟུར་པ་དང་དཀྱིལ་ཤར་ཡུལ་གྲུའི་དཀའ་རྙོག་སེལ་ཐབས་སུ་བསྐོ་གཞག་གནང་བའི་སྐུ་ཚབ་ཇོཇ་མི་ཆེལ་གྱིས་དགོངས་ཤོག་སྙན་ཞུ་ཐུང་ངུ་ཞིག་ཕུལ་བའི་ནང་། སྐུ་ཉིད་ཀྱི་དཀྱིལ་ཤར་ཡུལ་གྲུའི་དཀའ་རྙོག་སེལ་རྒྱུའི་ལས་འཆར་ལ་མོས་མཐུན་ཡོད་མོད་ཀྱང་འདས་པའི་ལོ་འཁོར་གཉིས་རིང་ལས་དོན་ཞུ་རྒྱུ་བྱུང་བ་དགའ་སྒོམ་དང་བཅས་ད་ཆ་སྐུ་ཚབ་ལས་གནས་ནས་རྩ་དགོངས་ཞུ་རྒྱུ་ཡིན་ཞེས་གསུངས་གནང་འདུག   

འོན་ཀྱང་དཀྱིལ་ཤར་ཡུལ་གྲུ་སྤྱི་དང་། ལྷག་པར་དུ་ཨི་སི་རེལ་དང་པེ་ལེསི་ཀྲའེན་ནང་འགྱུར་འགྲོས་ཤིན་ཏུ་ཆེན་པོ་འགྲོ་བཞིན་པའི་སྐབས་ཡིན་པ་རེད།    ཉེ་ཆར་པེ་ལེསི་ཀྲའེན་གྱི་ནུབ་མཚོ་བརྒྱུད་ཀྱི་དབང་འཛིན་བྱེད་པོ་ཕཱ་ཏའ་དང་། ག་ཛ་ལུང་གཞུང་གི་དབང་འཛིན་བྱེད་པོ་ཧ་མ་སེ་གཉིས་དབར་མཐུན་འགྲིག་བྱུང་སྟེ་རིང་མིན་གཅིག་འགྱུར་གྱི་འོས་བསྡུ་ཆེན་མོ་བྱ་རྒྱུ་དང་། འོས་བསྡུའི་གྲུབ་འབྲས་ལ་ཕྱོགས་གཉིས་ཀས་མོས་མཐུན་བྱ་རྒྱུར་གྲོས་འཆམ་བྱུང་ཡོད་པ་རེད། འོན་ཀྱང་ཤོག་ཁག་གཉིས་ཀྱི་གཞི་རིམ་གྱི་ལངས་ཕྱོགས་ལ་འགྱུར་བ་ཕྱིན་ཅིང་།   ཧ་མ་སེ་ ཤོག་ཁག་གིས་ཨི་སི་རེལ་གྱི་བདག་དབང་ལ་ངོས་ལེན་བྱེད་ཀྱི་མེད་པ་མ་ཟད། ཚོགས་པ་དེ་ཨ་རི་གཞུང་གི་འཇིགས་སྐུལ་དྲག་སྤྱོད་པའི་ཐོ་གཞུང་ནང་ཡོད་པ་རེད།