རང་དབང་ལུང་བར་ཡོད་པའི་བོད་མི་ཚོར་དམིཊ་བསལ་འགན་ཡོད།

༧གོང་ས་མཆོག་གིས་གཞིས་ལུས་བོད་མི་ཚོའི་སེམས་ནང་མི་རིགས་ཀྱི་ལ་རྒྱ་དང་ཞེན་ཁོག་གཡོ་བ་མེད་པར་གནས་ཐུབ་ཡོད་པ་གསུངས་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་ལ་དྭགས་སུ་ས་གནས་བོད་རིགས་ཚོར། རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་དེ་འདྲ་ཞིག་གི་འོག་ཏུའང་གཞིས་ལུས་བོད་མི་ཚོའི་སེམས་ནང་མི་རིགས་ཀྱི་ལ་རྒྱ་དང་ཞེན་ཁོག་གཡོ་བ་མེད་པར་གནས་ཐུབ་ཡོད་པ་རེད་ཅེས་བཀའ་སློབ་གནང་འདུག
དེ་ཡང་ཕྱི་ཚེས་༧་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དྭགས་བོད་ཕྲུག་ཁྱིམ་སྡེར་ཞབས་སོར་འཁོད་སྐབས། ལ་དྭགས་བོད་ཁྱིམ་ནང་གོ་སྒྲིག་གནང་བའི་མཛད་སྒོའི་ཐོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་མི་རིགས་ནི་ལོ་ངོ་སྟོང་ཕྲག་མང་པོའི་ལོ་རྒྱུས་ཡོད་པའི་མི་རིགས་ཤིག་ཡིན་པ་དང་། མི་རིགས་ཀྱི་རྣམ་པ་མཚོན་ཆེད་གཙོ་ཆེ་ཤོས་སྐད་ཡིག་ཡིན་པ་བཀའ་གནང་ཡོད་པ་དང་། རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་དེ་འདྲ་ཞིག་གི་འོག་ཏུའང་གཞིས་ལུས་བོད་མི་ཚོའི་སེམས་ནང་མི་རིགས་ཀྱི་ལ་རྒྱ་དང་ཞེན་ཁོག་གཡོ་བ་མེད་པར་གནས་ཐུབ་ཡོད་པ་བྱུང་ཡོད་པར་བརྟེན་ང་ཚོ་རང་དབང་ལུང་པར་ཡོད་པའི་བོད་མི་ཚོས་གཞིས་ལུས་བོད་མི་རྣམས་ཀྱི་ཚབ་ཞུས་ཏེ་བོད་མི་རིགས་ཀྱི་ལ་རྒྱ་དང་ཞེན་ཁོག་དེ་དག་བཟུང་རྒྱུའི་ཐད་དམིགས་བསལ་གྱི་འགན་ཞིག་ཡོད་སྐོར་སོགས་ཀྱི་བཀའ་སློབ་སྩལ་ཡོད་འདུག
སྐབས་དེར་དགའ་ལྡན་ཁྲི་རིན་པོ་ཆེ་མཆོག་གི་དབུས་པའི་ས་གནས་ལ་འཚམས་གཟིགས་སུ་ཕེབས་པའི་སྤྱི་འཐུས་རྣམ་པ་གཉིས་དང་། ལ་སྤྱི། སློབ་གྲྭའི་དབུ་འཛིན། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་ཆུང་གི་ཚོགས་གཙོ། མཉམ་སྦྲེལ་ཚོགས་གཙོ་སོགས་བོད་པའི་ལས་སྣེ་ཁག་གཅིག་དང་། མངའ་སྡེའི་གྲོས་ཚོགས་འཐུས་མི། ལ་དྭགས་རི་ལྗོངས་ཡར་རྒྱས་ཚོགས་པའི་ཚོགས་གཙོ། ལ་དྭགས་ནང་པའི་ཚོགས་པའི་ཚོགས་གཙོ་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག།

གསར་འགོད་པ་དབྱངས་སྒྲོལ།