မြန်မာနိုင်ငံရဲ့ လူ့အခွင့်အရေး ကိစ္စကို တိတိကျကျ ကိုင်တွယ်ဖို့ အိုဘားမားကို တောင်းဆို

နိုင်ငံတကာ လူ့အခွင့်အရေး အဖွဲ့ ကိုယ်စားလှယ်တွေဟာ မနေ့က အမေရိကန်သမ္မတ ဘားရက်အိုဘားမားရဲ့ ထိပ်တန်းအကြံပေး အရာရှိတွေနဲ့ အိမ်ဖြူတော်မှာ တွေ့ဆုံဆွေးနွေးခဲ့ကြပြီး သမ္မတရဲ့ မြန်မာနိုင်ငံခရီးစဉ်အတွင်း လူ့အခွင့်အရေးကိစ္စကို တိတိကျကျ ထည့်သွင်းဆွေးနွေးဖို့ တောင်းဆိုခဲ့ကြတယ်လို့သိရပါတယ်။

2012.11.14
obama_germany_305px.jpg ဇူလိုင်လ ၂၄ရက်နေ့က ဂျာမနီနိုင်ငံ၊ ဘာလင်မြို့ရှိ အောင်မြင် မှု အထိမ်းအမှတ်ကျောက်တိုင်ရှေ့တွင် အမေရိကန် ဒီမို ကရက်တစ် သမ္မတလောင်း ဘားရက်အိုဘားမား မိန့်ခွန်းပြောနေစဉ်
Photo: AFP

အဲဒီ အစည်းအဝေးမှာ သမ္မတအိုဘားမားရဲ့ လူ့အခွင့်အရေးဆိုင်ရာ ထိပ်တန်းအကြံပေးအရာရှိ Samantha Power က သမ္မတ အိုဘားမားဟာ မြန်မာအစိုးရ သမ္မတ ဦးသိန်းစိန်နဲ့ တွေ့ဆုံဆွေးနွေးတဲ့အခါမှာ ရခိုင်ပြည်နယ်က ပဋိပက္ခတွေနဲ့ ပတ်သက်ပြီးတော့လည်း ထည့်သွင်း ဆွေးနွေးမှာဖြစ်တဲ့အကြောင်း ရှင်းပြတယ်လို့ လူ့အခွင့်အရေးအဖွဲ့တွေက ပြောပါတယ်။

လူ့အခွင့်အရေးကိစ္စကို ရှေ့တန်းထားဆွေးနွေးမှာအပြင် ဒီမိုကရေစီနဲ့ စီးပွားရေး ပြုပြင်ပြောင်းလဲမှုဆိုင်ရာ ကိစ္စတွေကိုလည်း ထည့်သွင်းဆွေးနွေးသွားမယ်လို့ အိမ်ဖြူတော် အရာရှိက လူ့အခွင့်အရေး အဖွဲ့အစည်းက ကိုယ်စားလှယ်တွေကို ရှင်းပြခဲ့တယ်လို့ ဆိုပါတယ်။

နိုဝင်ဘာလ ၁၇ ကနေ ၂၀ ရက်နေ့အထိ ကြာမြင့်မယ့် သမ္မတအိုဘားမားရဲ့ အရှေ့တောင်အာရှ ခရီးစဉ်အတွင်းမှာ နိုဝင်ဘာလ ၁၉ ရက်နေ့မှာ မြန်မာနိုင်ငံကို ရောက်မှာဖြစ်ပြီး သမ္မတကြီး ဦးသိန်းစိန်၊ ဒေါ်အောင်ဆန်းစုကြည်တို့နဲ့ တွေ့ဆုံဆွေးနွေးမယ်လို့သိရပါတယ်။

သမ္မတ အိုဘားမားရဲ့ မြန်မာနိုင်ငံခရီးစဉ်ဟာ အမေရိကန်သမ္မတတစ်ဦးရဲ့ သမိုင်းဝင် ခရီးစဉ်လည်းဖြစ်သလို အရှေ့တောင်အာရှဒေသဖက်ကို အလေးထားလာတဲ့ အမေရိကန် နိုင်ငံခြားရေးမူဝါဒ အပြောင်းအလဲအတွက်လည်း အရေးပါတဲ့ ခရီးစဉ်ဖြစ်တယ်လို့ ပြောကြပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။