རྒྱ་ནག་གིས་བླ་བྲང་དགོན་པའི་དགེ་འདུན་པ་འཛིན་བཟུང༌།

༄༅༎ཉེ་བའི་ཆར་བོད་ཨ་མདོ་བླ་བྲང་བཀྲིས་དཀྱིལ་དགོན་པའི་དགེ་འདུན་བཀྲིས་རྒྱ་མཚོ་དང་འཇིགས་མེད་སོགས་དགེ་འདུན་པ་༡༤ཙམ་ཞིག་ས་གནས་རྒྱ་ནག་གཞུང་གི་བདེ་སྲུང་དམག་མིས་འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཞིག་ས་གནས་ནས་འདི་གའི་གསར་འགོད་པ་ཀླུ་འབུམ་བཀྲིས་ལ་གནས་ཚུལ་ངོ་སྤྲོད་གནང་འདུག

ཁོང་གིས་འགྲེལ་བརྗོད་གནང་བར་ཉེ་སྤྱི་ཟླ་༥་ཚེས་༤་ཉིན་བཙན་བྱོལ་བོད་གཞུང་གིས་བཀའ་བློན་ཁྲི་པ་བློ་བཟང་སེངྒེ་ལགས་སུ་མང་མོས་མགྲིན་དབྱངས་ཆིག་འགྱུར་གྱི་འོས་འདེམས་བྱུང་བའི་གནས་ཚུལ་གསལ་བསྒྲགས་གནང་སྐབས་བོད་ནང་བོད་མི་ཚོས་དོ་སྣང་ཆེན་པོ་བྱས་ཡོད་པ་དང་ལྷག་དོན་དུ་བོད་ཨ་མདོ་

བླ་བྲང་བཀྲིས་དཀྱིལ་དང་དེ་བཞིན་ཀན་ལྷོ་སོགས་ཀྱི་ནང་བོད་མི་ཚོས་ཤོག་འབག་སྤར་བའམ་སོགས་ཀྱི་བོད་གཞུང་གི་བཀའ་བློན་ཁྲི་པ་བློ་བཟང་སེངྒེ་ལགས་སུ་དགའ་བསུ་ཞུ་བའི་རྣམ་པ་མཚོན་པ་བྱས་ཡོད་པ་རེད།

དེ་རྗེས་རྒྱ་ནག་གཞུང་གིས་དེ་ཉིན་བཙན་བྱོལ་བོད་གཞུང་གིས་བཀའ་བློན་ཁྲི་པ་འོས་འདེམས་བྱས་པར་དགའ་བསུ་ཞུ་མཁན་ཚོ་རྩད་གཅོད་བཏང་ནས་དགེ་འདུན་པ་བཀྲིས་རྒྱ་མཚོ་དང་འཇིགས་མེད་སོགས་དགེ་འདུན་པ་བཅོ་བཞི་ཙམ་འཛིན་བཟུང་བྱས་ནས་ཉེས་བརྡུང་དང་འདྲི་རྩད་བྱས་རྗེས་དགེ་འདུན་པ་འགའ་ཤས་གློད་བཀྲོལ་བཏང་ཡོད་ཀྱང་ད་དུང་དགེ་འདུན་པ་གྲངས་བདུན་ཙམ་ཞིག་རྒྱ་མིའི་དོ་དམ་འོག་དཀའ་སྡུག་མྱོང་བཞིན་ཡོད་པའི་གནས་ཚུལ་འགྲེལ་བརྗོད་གནང་གི་འདུག།