འོད་ཟེར་ལ་གཟེངས་རྟགས།

༄༅༎ཨ་རིའི་ཕྱི་སྲིད་དྲུང་ཆེ་ ཇོན་ཀེ་རི་ དང་།    སྲིད་འཛིན་གྱི་ལྕམ་ མི་ཤལ་ ཨོ་སྦ་མ་ རྣམ་གཉིས་ཀྱིས་བོད་རིགས་རྩོམ་པ་པོ་ཚེ་རིང་འོད་ཟེར་ལགས་སུ། ཕྱི་ལོ་༢༠༡༣་ལོའི་རྒྱལ་སྤྱིའི་བུད་མེད་སྙིང་སྟོབས་ཅན་གྱི་བུད་མེད་ཀྱི་གཟེངས་རྟགས་གནང་འདུག རྒྱལ་སྤྱིའི་སྙིང་སྟོབས་ཅན་གྱི་བུད་མེད་གཟེངས་རྟགས་འབུལ་བཞེས་མཛད་སྒོ་ཨ་རིའི་ཕྱི་སྲིད་ལས་ཁུངས་སུ་རེས་གཟའ་པ་སངས་ཉིན་གནང་ཡོད་ཅིང་། ཨ་རིའི་གཟེངས་རྟགས་དེ་འོད་ཟེར་ལགས་སུ་འབུལ་གཏན་འཁེལ་བའི་གསལ་བསྒྲགས་ཐོན་མ་ཐག རྒྱ་ནག་གཞུང་གིས་ཁོང་གི་བཞུགས་ཁང་མདུན་ཉེན་རྟོག་པ་འགྲེམས་འཇོག་བྱས་ཏེ། ད་ལྟའི་ཆར་ཁོང་རང་ཁྱིམ་དུ་བཟང་བཙོན་ལྟ་བུའི་ངང་གནས་འདུག ཨ་རིའི་ཕྱི་སྲིད་ལས་ཁུངས་སུ་རྒྱལ་སྤྱིའི་གཟེངས་རྟགས་འབུལ་བཞེས་མཛད་སྒོ་གནང་སྐབས།
ཨ་རིའི་ཕྱི་སྲིད་དྲུང་ཆེ་མཆོག་གིས་དབྱིན་སྐད་ཐོག་གསུང་དོན་ནི།    བོད་མིའི་གནས་སྟངས་དངོས་ཡོད་ཚེ་རིང་འོས་ཟེར་ལགས་ཀྱིས་རྩོམ་བྲིས་བརྒྱུད་ནས་འོད་སྣང་ཁྱབ་པར་བྱས་ཏེ་བོད་མི་རིགས་ཀྱི་འགྲོ་བ་མིའི་ཐོབ་ཐང་ཡར་རྒྱས་གཏོང་ཐབས་སུ་འཇིགས་ཞུམ་མེད་པར་འབད་བརྩོན་ལྷོད་མེད་གནང་བཞིན་པ་ནི།    བོད་མིའི་དཀའ་སྡུག་གོ་ཐོས་མེད་པར་ལུས་ཉེན་ཆེ་བའི་རིགས་ལ་སྨྲ་བརྗོད་ནུས་པ་འབྱིན་པར་མཚོན་ཐུབ་ཅེས་གསུངས་གནང་འདུག    ཨ་རིའི་ཕྱི་སྲིད་ལྷན་ཁང་གིས་འདི་ལོའི་བུད་མེད་སྙིང་སྟོབས་ཅན་གྱི་གཟེངས་རྟགས་འཛམ་གླིང་ས་ཕྱོགས་གང་ས་ནས་ཡིན་པའི་བུད་མེད་བཅུ་ལ་རེས་གཟའ་པ་སངས་ཕྱི་ཚེས་ ༨ ཉིན་རྒྱལ་སྤྱིའི་བུད་མེད་ཀྱི་ཉིན་མོ་དང་སྟབས་བསྟུན་ཏེ་གསོལ་བསྩལ་གནང་ཡོད་པ་རེད།།