བོད་མི་༢༡ འཛིན་བཟུང་།

༄༅།    །སྐྱེ་རྒུ་མདོའི་བོད་མི་ཚོར་རྒྱ་གཞུང་གིས་ས་ཆ་བཙན་འཕྲོག་དང་སྡོད་ཁང་བཤིག་པ་སོགས་ཀྱི་དཀའ་ངལ་བར་མ་ཆད་པ་བཟོ་ཡི་ཡོད་པའི་གནས་སྟངས་ལ་བརྟེན་ནས་ཡུལ་མི་དང་དམག་མིའི་བར་འཁྲུག་འཛིང་ཤོར་ཏེ། ཕྱི་ཚེས་༩ ཉིན་བོད་མི་༢༡ འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཞིག་ང་ཚོའི་རླུང་འཕྲིན་ཁང་གིས་ཤེས་རྟོགས་བྱུང༌། ཕྱི་ཚེས་༩ ཉིན་སྐྱེ་རྒུ་མདོར་བོད་མི་བརྒྱ་ལྷག་ཙམ་གྱིས་ངོ་རྒོལ་གནང་བའི་སྐབས་རྒྱ་གཞུང་གིས་དམག་མི་བཏང་ནས་དྲག་གནོན་བྱས་འདུག་ལ། ས་གནས་བོད་མི་དང་དམག་མིའི་དབར་འཐབ་འཁྲུག་ལངས་ནས་བོད་མི་༦ ཙམ་ལ་རྨས་སྐྱོན་དང་། རྒྱ་གཞུང་གི་དམག་མི་༤ ཙམ་ལ་རྨས་སྐྱོན་ཕོག་པ་གོ་འཐོས་བྱུང༌། གནས་ཚུལ་དེ་བྱུང་བའི་རྗེས་རྒྱ་གཞུང་གི་ཉེན་རྟོག་པས་བོད་མི་༢༡ འཛིན་བཟུང་བཀག་ཉར་དང་། ད་དུང་རྒྱ་གཞུང་གིས་མང་ཚོགས་ཀྱི་ཁང་པ་༢༠༠ ལྷག་གཏོར་རྒྱུ་ཡིན་པའི་གསལ་བསྒྲགས་བྱས་སོང་ཞེས་བོད་ནས་འབྲེལ་ཡོད་བོད་མི་ཅིག་གིས་ང་ཚོའི་རླུང་འཕྲིན་ཁང་ལ་འགྲེལ་བརྗོད་གནང་གི་འདུག།