རྒྱལ་སྤྱིའི་བོད་རང་བཙན་ཚོགས་ཆེན་གྱི་སྔོན་འགྲོའི་ཚོགས་འདུ།

༄༅༎རྒྱལ་སྤྱིའི་བོད་རང་བཙན་ཚོགས་ཆེན་གྱི་སྔོན་འགྲོའི་ཚོགས་འདུ་ཐེངས་༢་པ་དེ་ཚེས་༡༠་ནས་༡༡་བར་ཉིན་གཉིས་རིང་ཐའེ་ཝན་དུ་ཚོགས་འདུག
རྒྱལ་སྤྱིའི་བོད་ཀྱི་ཆ་འཕྲིན་ནང་གནས་ཚུལ་སྤེལ་བ་ལྟར་ན། རྒྱལ་སྤྱིའི་བོད་རང་བཙན་ཚོགས་ཆེན་གྱི་སྔོན་འགྲོའི་ཚོགས་འདུ་ཐེངས་༢་པ་དེ་ཕྱི་ཚེས་༡༠་ནས་༡༡་བར་ཉིན་གཉིས་རིང་ཐའེ་ཝན་གྱི་རྒྱལ་ས་ཐའེ་པེ་རུ་ཚོགས་ཡོད་པ་དང༌། དབུས་བོད་ཀྱི་གཞོན་ནུའི་ལྷན་ཚོགས་ཀྱི་ཟུང་དྲུང་བསྟན་འཛིན་ནོར་བཟང་ལགས་ལྷན་ཚོགས་ཐོག་ཆེད་ཕེབས་གནང་ཡོད་འདུག
ཕྱི་ཚེས་༩་ཉིན་གསར་འགོད་ལྷན་ཚོགས་ཤིག་བསྐོངས་ནས། སྐབས་དེར་བོད་ནང་དུ་རང་ལུས་མེར་སྲེག་སྐོར་གྱི་གློག་བརྙན་གཟིགས་འབུལ་དང་། ཐའེ་ཝན་བོད་དོན་རྒྱབ་སྐྱོར་བ་ཚའེ་ཇེ་ཞུན་ནས་ཀྱང་གནས་ཚུལ་འགྲེལ་བརྗོད་གནང་འདུག
སྐབས་དེར་བསྟན་འཛིན་ནོར་བཟང་ལགས་ཀྱིས། བོད་ནང་བོད་མི་ཚོས་རང་ལུས་མེར་སྲེག་གཏོང་དགོས་པའི་རྒྱུ་རྐྱེན་ནི་རྒྱ་ནག་གཞུང་ཁོར་ནར་ཐུག་ཡོད་པ་དང་། རང་ལུས་མེར་སྲེག་གི་གནས་དོན་མཚམས་འཇོག་བྱེད་པའི་ཐབས་ལམ་གཅིག་ཁོ་ན་ཡོད་པ་ནི་རང་བཙན་དེ་རེད་ཅེས་དང༌། རྒྱ་ནག་གཞུང་གིས་རང་ལུས་མེར་སྲེག་ནི་འཇིགས་སྐུལ་རིང་ལུགས་ཀྱི་ལས་འགུལ་ཞིག་ཡིན་ཚུལ་བརྗོད་བཞིན་ཡོད་ནའང་། དོན་དངོས་ཐོག་རང་ལུས་མེར་སྲེག་ནི་འཚེ་མེད་ཞི་བའི་ཐོག་ནས། ཁྲིམས་འགལ་གྱི་བཙན་འཛུལ་ལ་ངོ་རྒོལ་བྱས་པ་ཞིག་རེད་ཅེས་གསར་འགོད་པར་འགྲེལ་བརྗོད་གནང་འདུག།