དུས་འཁོར་དབང་ཆེན་ཞུ་མཁན་མི་གྲངས་འཕར་བཞིན་ཡོད་འདུག

འདི་གའི་ཆེད་གཏོང་གསར་འགོད་པས་ལ་དྭགས་ནས་གནས་ཚུལ་བཏང་དོན། ད་རེས་དུས་འཁོར་དབང་ཆེན་དུ་ཕེབས་མཁན་ཆོས་ཞུ་བའི་གྲངས་འབོར་ཉིན་རེ་བཞིན་འཕར་བཞིན་པ་ཡིན་ཞིང་། ཉིན་གཉིས་གོང་ཆོས་ཞུ་བ་དེབ་བསྐྱེལ་ཟིན་པའི་གྲངས་འབོར་ཆིག་འབུམ་བརྒྱད་སྟོང་དང་། རང་ལོ་བཅོ་ལྔ་མན་ཆད་དེབ་བསྐྱེལ་བྱེད་མ་དགོས་ཀྱང་ལོ་ཆུང་མང་པོ་ཞིག་ཕ་མའི་མཉམ་དུ་ཆོས་ཞུར་ཡོད་པས་ཆོས་ཞུ་བའི་གྲངས་འབོར་ངེས་ཅན་ཚོད་དཔག་དཀའ་བའི་རང་བཞིན་དུ་གྱུར་བའི་སྐོར་དུས་དབང་གྲ་སྒྲིག་ཚོགས་ཆུང་གི་ཚོགས་གཙོས་གསལ་འགྲེལ་གནང་འདུག བོད་མིའི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ལ་དྭགས་སླེ་ཞི་བའི་ཚལ་དུ་དཔལ་དུས་འཁོར་དབང་ཆེན་ཐེངས་༣༣་པའི་སྔོན་འགྲོའི་གསུང་ཆོས་སུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རྒྱལ་པོ་ལ་གཏམ་བྱ་བ་བཤེས་པའི་སྤྲིངས་ཡིག་དང་། དབུ་མ་རིན་ཆེན་ཕྲེང་བ་གནང་རྒྱུ་ཡིན་ཞིང་། ཚེས་༧་ཉིན་གྱི་སྔ་དྲོར་དབུ་མ་རིན་ཆེན་ཕྲེང་བ་ལས་མངོན་པར་མཐོ་བ་དང་ངེས་པ་ལེགས་པ་བསྟན་པའི་ལེའུ་ལྔ་ཡོད་པ་ནས་དང་པོ་ལེགས་པར་གྲུབ་ཡོད་འདུག གསུང་ཆོས་ནང་བདེན་བཞིའི་རྣམ་གཞག་དང་ཉམས་སུ་ལེན་སྟངས། བསླབ་པ་གསུམ་དང་། བདག་མེད་ལྟ་བའི་ཐོག་ལྷག་པའི་བསླབ་པ་བཅས་ཀྱི་ཟབ་གཞི་དགོངས་འགྲེལ་གནང་འདུག དེ་ནས་དབུ་མ་རིན་ཆེན་ཕྲེང་བའི་ནང་ཆང་མི་འཐུང་དང་འཚོ་བ་བཟང་ཞེས་པའི་ཚིགས་བཅད་འགྲེལ་པ་གནང་སྐབས་ཆང་འཐུང་བའི་ཉེས་པ་བཅོམ་ལྡན་འདས་ཀྱིས་ང་ལ་སྟོན་པར་སྨྲ་བ་རྣམས་ཀྱིས་ཆང་རྩྭ་ཡི་ཟིལ་པ་ཙམ་ཡང་འཐུང་བར་མི་བྱ་ཞེས་པའི་དགོངས་འགྲེལ་མཛད་ཅིང་། ལྷག་པར་རབ་ཏུ་བྱུང་བ་རྣམས་ཀྱིས་ཆང་གཏན་ནས་འཐུང་མི་ཆོག་པའི་ནན་བརྗོད་གནང་སྟེ། རབ་ཏུ་སྡེ་ཡིས་ཚུལ་ཁྲིམས་འཆལ་ན་སངས་རྒྱས་ཉམ་པའི་རྒྱུར་འགྱུར་ངེས་པ་དང་། དེ་སྔའི་རྨོངས་པའི་ཆོས་ལ་བསྟེན་པ་རྒྱུན་འཐུད་ན་སངས་རྒྱས་པའི་བསྟན་པ་ཡུན་རིང་གནས་མི་ཐུབ་ཅེས་མདོ་དོན་ཆོས་ཤེས་ནས་དད་པ་ཐོབ་པ་དང་ཆོས་ལ་སྤྲོ་བ་དང་སྤོབས་པ་སྐྱེད་ནས་ཆོས་ལ་བཞུགས་དགོས་པ། དེ་བཞིན་སངས་རྒྱས་པའི་ཆོས་ཀྱི་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་ཡིན་པའི་སྙིང་པོ་བཀའ་གནང་འདུག

གསར་འགོད་པ་འཇམ་དཔལ་ཕུན་ཚོགས།

ཞིབ་ཕྲ་འདི་གའི་ཆེད་གཏོང་གསར་འགོད་པ་པ་སངས་ཚེ་རིང་ལགས་ཀྱིས་ས་གནས་ནས་བཏང་བའི་གནས་ཚུལ་ལ་གསན་རོགས༎