འབར་མའི་དམངས་གཙོ་ཚོགས་པའི་ཚོགས་གཙོའི་འཁྲུངས་སྐར།

༄༅༎རེས་གཟའ་པ་སངས་ཉིན་འབར་མ་དམངས་གཙོ་ཚོགས་པའི་ཚོགས་གཙོ་ལྕམ་ཨང་སང་སུའུ་ཅི་དགུང་གྲངས་དྲུག་ཅུ་རེ་བཞིར་ཕེབས་པའི་འཁྲུངས་སྐར་ཉིན་མོ་ཡིན་ཞིང་དེའི་ཉིན་འཛམ་གླིང་ཁྱོན་ཡོངས་སུ་ཁོང་གློད་བཀྲོལ་ཡོང་ཐབས་ཀྱི་ལས་འགུལ་འདྲ་མིན་སྤེལ་ཡོད་པ་རེད།

འབར་མའི་ཕྱོགས་འགལ་དམངས་གཙོ་ཚོགས་པའི་ཚོགས་གཙོ་ལྕམ་ཨང་སང་སུའུ་ཅི་དགུང་གྲངས་དྲུག་ཅུ་རེ་བཞིར་ཕེབས་པའི་འཁྲུངས་སྐར་དེ་བཞིན་བཙོན་ཁང་ནང་བཏང་གནང་ཡོད་པ་དང་དེའི་ཉིན་འཛམ་གླིང་ཡུལ་གྲུ་མང་པོའི་ནང་དྲ་རྒྱ་བརྒྱུད་ནས་འབར་མ་དྲག་པོའི་གཞུང་ལ་ངོ་རྒོལ་གྱི་ལས་འགུལ་སྤེལ་རྒྱུའི་འཆར་གཞི་བཏོན་ཡོད་པའི་ཁར་ཨ་རིའི་སྙན་གྲངས་ཆེ་བའི་ཧོ་ལི་ལྦུ་ཌིའི་གློག་བརྙན་འཁྲབ་མཁན་སྦེ་རེདྲ་པིཏ་དང་ཇུ་ལི་ཡ་རོ་སྦཏ་སེ།གཞས་མ་མཱེ་ཌོ་ན་དེ་བཞིན་སྙན་གྲགས་ཆེ་བའི་རྐང་རྩེད་སྤོ་ལོ་རྩེད་མཁན་ཌེ་ལྦི་ཌི་སྦེ་ཀམ་དེ་མིན་ནོ་བེལ་གཟེངས་རྟགས་བཞེས་མཁན་དང་འཛམ་གླིང་ཡུལ་གྲུ་ཁག་གི་དཔོན་རིགས་སོགས་ནས་འབར་མ་དྲག་པོའི་གཞུང་གིས་ལྕམ་ཨང་སང་སུའུ་ཅི་གློད་བཀྲོལ་དགོས་པའི་ཛ་དྲག་གི་འབོད་སྐུལ་ཞུས་ཡོད་པ་རེད།

ལྕམ་ཨང་སང་སུའུ་ཅི་ཡིས་འཁྲུངས་སྐར་ཉིན་དེར་བཙོན་རོགས་ཚོ་དང་མཉམ་དུ་ཞལ་ལག་བཞེས་ཡོད་པ་དང་ཁོང་གི་ཚོགས་པའི་ཚོགས་མི་དང་རྒྱབ་སྐྱོར་བ་མི་མང་འཕོན་ཆེ་དེའི་ཉིན་ཁོང་གི་གཟིམ་ཁང་མདུན་འདུ་འཛོམས་ཀྱིས་ཁོང་དགུང་གྲངས་དྲུག་ཅུ་རེ་བཞིར་ཕེབས་པའི་འཁྲུངས་སྐར་ལ་སྲུང་བརྩི་ཞུས་ཡོད་ཅིང་མི་རྣམས་ཀྱིས་རྟེན་འབྲེལ་མཚོན་ཆེད་བྱིའུ་དྲུག་ཅུ་རེ་བཞི་དང་འང་གུ་བཅུ་དེ་བཞིན་སྒང་ཕུབ་ཐོག་འཁྲུངས་སྐར་གྱི་བཀྲིས་སྨོན་ཚིག་བཀོད་ནས་མཁའ་དབྱིངས་སུ་གློད་ཡོད་པ་རེད། ལྕམ་ཨང་སང་སུའུ་ཅི་འདས་པའི་ལོ་ངོ་བཅུ་དགུའི་ནང་ལོ་བཅུ་གསུམ་བཙོན་ཁང་དུ་བཞུགས་ཡོད་པ་དང་དེ་དག་མང་ཆེ་བ་བཟང་བཙོན་དུ་བཞུགས་ཡོད་ཅིང་ཟླ་བ་སྔོན་མ་ལྕམ་ཨང་སང་སུའུ་ཅི་ཁྱོམ་ཁང་དུ་བཟང་བཙོན་བཞུགས་རིང་ཨ་རིའི་མི་སེར་ཡིན་པ་ཞིག་གསང་བའི་ཐོག་ནས་ཁོང་གི་གཟིམ་ཤག་ཏུ་སླེབས་པའི་རྐྱེན་གྱིས་འབར་མ་དྲག་པོའི་གཞུང་གིས་ལྕམ་ཨང་སང་སུའུ་ཅི་ཡིས་བཟང་བཙོན་དུ་བཞུགས་རིང་ཕྱི་མི་དང་ཐུག་འཕྲད་མི་ཆོག་པའི་ཁྲིམས་ལུགས་དང་འགལ་བའི་ཉེས་བཙུགས་ཐོག་ནས་འཛིན་བཟུང་བཙོན་འཇུག་བྱས་ནས་ཁོང་གི་གྱོད་དོན་ཐོག་ཁྲིམས་ཞིབ་བྱེད་བཞིན་ཡོད་པ་རེད།