སྔ་འགྱུར་རྙིང་མའི་དབུ་འཛིན་ལོ་གསུམ་རེར་རེ་མོས་བྱས་ནས་བཞེས་རྒྱུའི་ཐག་བཅད།

དཔལ་རྒྱལ་བ་ཀཿཐོག་པའི་བླ་ཆེན་ཀཿཐོག་དགེ་རྩེ་རིན་པོ་ཆེ་མཆོག་རྙིང་མའི་དབུ་འཛིན་ཁྲི་རབས་བདུན་པར་བསྐོ་བཞག་བསྩལ་འདུག
དེ་ཡང་ད་ལན་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༢༩པ་ཚོགས་སྐབས་དང་འབྲེལ་སྔ་འགྱུར་རྙིང་མའི་བླ་ཆེན་ཁག་དང་། སྐུ་ཚབ་བཅས་ལྷན་འཛོམས་སར་སྔ་འགྱུར་རྙིང་མའི་དབུ་འཛིན་ཕེབས་ཕྱོགས་སྐོར་བཀའ་བསྡུར་ཐག་ཆོད་བྱུང་བར་རྙིང་མའི་མ་དགོན་དྲུག་ནས། དེ་ཡང་ཀཿཐོག་དགོན་པ་དང་། རྫོགས་ཆེན། ཞེ་ཆེན། སྨིན་གྲོལ་གླིང་། རྡོ་རྗེ་བྲག། དཔལ་ཡུལ་བཅས་ཀྱི་བླ་ཆེན་ཁག་རིམ་པས་དབུ་འཛིན་གྱི་མཚན་གནས་ལོ་གསུམ་རེ་རེས་མོས་ཀྱིས་བཞེས་གནང་རྒྱུའི་ཐག་ཆོད་བྱུང་དོན་བཞིན། ད་རེས་དཔལ་རྒྱལ་བ་ཀཿཐོག་པའི་བླ་ཆེན་ཀཿཐོག་དགེ་རྩེ་རིན་པོ་ཆེ་མཆོག་རྙིང་མའི་དབུ་འཛིན་ཁྲི་རབས་བདུན་པའི་མཚན་གནས་ཞལ་བཞེས་ལེགས་ཐོབ་བྱུང་ཡོད་སྐོར་བོད་མི་མང་རྙིང་མའི་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟནའཕེལ་མཆོག་གིས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
རྒྱ་དམར་གྱིས་བོད་བཙན་བཟུང་བྱས་རྗེས་བཙན་བྱོལ་ནང་སྔ་འགྱུར་རྙིང་མའི་ཆོས་བརྒྱུད་ཀྱི་དབུ་འཛིན་མཚན་གནས་རིམ་པར་འབུལ་བཞེས་ཀྱི་ལམ་སྲོལ་ཆགས་པ་ནས་བཟུང༌། རྙིང་མའི་ཆོས་བརྒྱུད་ཀྱི་དབུ་འཛིན་ཐོག་མ་བདུད་འཇོམས་རིན་པོ་ཆེ་མཆོག་དང་། དིལ་མགོ་མཁྱེན་བརྩེ་རིན་པོ་ཆེ་མཆོག། གྲུབ་དབང་པད་ནོར་རིན་པོ་ཆེ་མཆོག སྨིན་གླིང་ཁྲི་ཆེན་རིན་པོ་ཆེ་མཆོག འཁྲུལ་ཞིག་རིན་པོ་ཆེ་མཆོག། སྟག་ལུང་རྩེ་སྤྲུལ་རིན་པོ་ཆེ་མཆོག་བཅས་ནས་དབུ་འཛིན་གྱི་མཚན་བཞེས་གནང་ཡོད་པ་རེད།
སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པ་སྟག་ལུང་རྩེ་སྤྲུལ་རིན་པོ་ཆེ་མཆོག་ཕྱི་ལོ་ ༢༠༡༧ ཕྱི་ཟླ་ ༡༢ ཚེས་ ༢༣ ཉིན་དགོངས་པ་གཞན་དོན་དུ་གཤེགས་རྗེས་གནས་དུས་ཀྱི་རྐྱེན་པས་རྙིང་མའི་ཆོས་བརྒྱུད་ཀྱི་དབུ་འཛིན་གསར་དུ་གཏན་འཁེལ་ད་ལྟ་བར་བྱུང་ཐུབ་མེད་པ་རེད། ཀཿཐོག་དགེ་རྩེ་རིན་པོ་ཆེ་མཆོག་ནི་ཕྱི་ལོ་༡༩༥༤ལོར་མགོ་ལོག་རྡོ་ཡུལ་མཁར་ནང་གོང་མའི་ལྷ་ཁང་སུམ་མདོ་རུ་ཡབ་བློ་ལྡན་ཕུན་ཚོགས་དང་། མ་ཡུམ་ཆོས་འཕགས་སྒྲོལ་གཉིས་ཀྱི་སྲས་སུ་སྐུ་འཁྲུངས། ཨ་འཛོམས་རྒྱལ་སྲས་འགྱུར་མེད་རྡོ་རྗེ་མཆོག་དང་། རྫོང་གསར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་མཆོག ཀརྨ་པ་རིག་པའི་རྡོ་རྗེ་མཆོག་སོགས་གིས་ངོས་འཛིན་གནང་བ་བཞིན་ཤར་རྒྱལ་བ་ཀཿཐོག་དགོན་དུ་ཕྱི་ལོ་ ༡༩༨༠ལོར་ཁྲི་འདོན་གནང་། དེ་རྗེས་རྩ་ཆེའི་བླ་སྤྲུལ་མང་པོའི་དྲུང་ནས་དབང་ལུང་ཞུས་གནང་བ་དང་། ༡༩༩༧ལོར་རྒྱ་གར་དུ་ཕེབས་འབྱོར་རྗེས་༧གོང་ས་སྐྱབས་མགོན་ཆེན་པོ་མཆོག་གི་དབུས། འཁྲུལ་ཞིག་རིན་པོ་ཆེ། སྟག་ལུང་རྩེ་སྤྲུལ་རིན་པོ་ཆེ། གྲུབ་དབང་པད་ནོར་རིན་པོ་ཆེ་སོགས་ཀྱི་སྐུའི་དྲུང་ནས་དབང་ལུང་གདམས་ངག་མང་པོ་གསན་ཞིང་།  རྩ་ཆེའི་གནས་ཆེན་ཁག་ཏུ་སྐུ་མཚམས་ལ་བཞུགས་གནང་བ་དང་། འཛམ་གླིངཤར་ནུབ་ཁུལ་ཕེབས་ནས་བསྟན་འགྲོའི་དོན་མཛད་བཞིན་པ་རེད།

གསར་འགོད་པ་རིག་ལྡན་སྒྲོལ་མ།