ཕྱི་སྡོད་བོད་མིས་འབྲེལ་བ་བྱེད་ཡུལ་ལས་ཁུངས།

ཧོང་ཀོང་གི་མིན་པའོ་གསར་ཤོག་གིས་མི་རིགས་སློབ་གསོའི་སློན་དཔོན་ Xiong Kunxin བཤད་པ་ལྟར་གནས་ཚུལ་སྤེལ་དོན། རྒྱ་ནག་གི་ཞིང་ཆེན་དང་། རང་སྐྱོང་ལྗོངས་གཞན་དང་འདྲ་མཚུངས་བོད་ཀྱི་ཕྱི་ཕྱོགས་སུ་བོད་མི་འབོར་ཆེན་གནས་སྡོད་བྱེད་ཀྱི་ཡོད་ཀྱང་། ཁོང་ཚོ་དང་མཉམ་དུ་འབྲེལ་མཐུད་བྱེད་མཁན་གྱི་ལས་ཁུངས་བོད་ནང་ད་བར་མེད་པར་བརྟེན་བོད་རང་སྐྱོང་ལྗོངས་ཁུལ་འབྲེལ་མཐུད་ལས་ཁུངས་ཤིག་གསར་འཛུགས་བྱེད་སྲིད་པ་རེད་ཅེས་དང་། ཁོང་གིས་ལས་ཁུངས་འདི་འདྲ་ཞིག་གསར་འཛུགས་བྱེད་ཐུབ་པ་ཡིན་ན་དེས་ཕྱི་སྡོད་བོད་མི་ཚོ་དང་། འཐབ་ཕྱོགས་གཅིག་འགྱུར་གྱི་འབྲེལ་ཡོད་ཚོའི་དབར་འབྲེལ་ལམ་ཡག་ཏུ་འགྲོ་རྒྱུའི་རེ་བ་ཡོད་རེད་། དེ་སྔ་བོད་མི་གཞོན་སྐྱེས་འགའ་ཤས་ཏཱ་ལའི་བླ་མ་མཆོག་དངོས་སུ་མཇལ་ན་བསམ་ནས་བོད་ནས་ཕྱི་ལ་ཕྱིན་པ་རེད། ད་ཆ་ཁོང་ཚོ་ཕྱིར་ཕ་ཡུལ་ལ་ལོག་འདོད་ཡོད་ཀྱང་དངུལ་གྱི་དཀའ་ངལ་འཕྲད་པ་དང་། ཡང་ན་ཁོང་ཚོ་ཕྱིར་ལོག་པ་ཡིན་ན་འཛིན་བཟུང་བྱེད་ཀྱི་རེད་བསམ་པའི་ཞེད་སྣང་ཡོད་པ་ཡིན་དུས་ལས་ཁུངས་འདི་བརྒྱུད་ནས་ཁོང་ཚོའི་དཀའ་ངལ་སེལ་ཐབས་སུ་ཕན་ཐོག་ཡོང་གི་རེད་ཅེས་འགྲེལ་བརྗོད་བྱས་སྐོར་ལུང་འདྲེན་བྱས་ཡོད་པ་རེད། ད་དུང་དེའི་ནང་རྒྱ་ནག་གཞུང་དང་། འཐབ་ཕྱོགས་གཅིག་འགྱུར་ལས་ཁུངས་གཉིས་ནས་ཕྱི་ལོ་ ༢༠༠༩ ལོ་ནས་བཟུང་ཕྱི་སྡོད་བོད་མིའི་ཐོག་བལྟ་ཕྱོགས་ལ་འགྱུར་བ་བཏང་ཡོད་པ་ཡང་བཤད་འདུག། སྤྱིར་བཏང་འཐབ་ཕྱོགས་གཅིག་འགྱུར་ཞེས་པའི་ལས་ཁུངས་དེ་ནི་བོད་རྒྱ་གྲོས་མོལ་སྐབས་སྐུ་ཚབ་ཚོའི་མཉམ་གྲོས་མོལ་བྱེད་མཁན་གྱི་ལས་ཁུངས་གཙོ་བོ་དེ་ཡིན་པ་རེད།