༧གོང་ས་མཆོག་རིང་མིན་འབྲས་ལྗོངས་ལ་ཆིབས་བསྒྱུར།

དེ་ཡང་ཕྱི་ཟླ་གཉིས་པའི་ཚེས་༤ ཉིན་སྒང་ཏོག་ནས་གནས་ཚུལ་སྤེལ་བའི་ནང༌། ༧གོང་ས་སྐྱབས་མགོན་ཆེན་པོ་མཆོག་གིས་འབྲས་ལྗོངས་སུ་ཕྱི་ཟླ་གསུམ་པའི་ཚེས་༢༦ ཉིན་མཐོ་ཚད་ཕི་ཀྲི་༡༣༥ཡོད་པའི་སྟོན་པའི་སྐུ་བརྙན་ལ་རབ་གནས་དང་། ནང་བའི་སྤྱི་གླིང་དབུ་འབྱེད་མཛད་རྒྱུ་མ་ཟད། སྐལ་བཟང་གི་དུས་སྐབས་དེར་ལྷོ་ཨ་ཕེ་རི་ཀའི་ཡུལ་གྲུ་ཁག་ནས་སྟོན་པའི་རིང་སེལ་ཡང་གདན་ཞུ་གནང་རྒྱུ་ཡིན་པའི་སྐོར་སོགས་འབྲས་ལྗོངས་མངའ་སྡེ་གཞུང་གིས་བཤད་འདུག

Ravangla ཞེས་པའི་ས་ཁུལ་དེ་ནི་འབྲས་ལྗོངས་ཀྱི་ལྷོ་ཕྱོགས་སུ་ཆགས་པའི་ཡུལ་སྐོར་སྤྲོ་འཆམ་པ་བསྐྱོད་ཡུལ་གྲོང་ཚོ་ཆུང་ཆུང་ཞིག་ཡིན་པ་དང༌། ས་ཁུལ་དེའི་ནང་དུ་རི་བོ་གངས་ཅན་མཛོད་ལྔ་སོགས་སྐད་གྲགས་ཅན་གྱི་རི་རྩེ་གསལ་པོ་མཐོང་ཐུབ་ཡུལ་ཞིག་ཡིན་པ་དང༌། ས་ཁུལ་དེར་བོད་མི་སྐྱབས་བཅོལ་བའི་གཞི་ཆགས་ཀྱང་ཡོད་པ་མ་ཟད། Ravangla ནས་སྤྱི་ལེ་དྲུག་ཕྱིན་པའི་མཚམས་སུ་བཀའ་རྒྱུད་སློབ་གཉེར་ཁང་སོགས་ཡོད་པ་རེད།