ཧོ་ལེན་ཌ་ལ་རྒྱ་ནག་གཞུང་གིས་གནོན་ཤུགས་སྤྲད་ཡོད་པ།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་རྗེས་མའི་ཚེས་བཞི་ནས་ལྔའི་བར་ཡོ་རོབ་ཀི་རྒྱལ་ཁབ་ཧོ་ལེན་ཌ་ལ་ཆིབས་བསྒྱུར་གནང་སྐབས་ཧོ་ལེན་ཌའི་སྲིད་བློན་མཆོག་གིས་༸གོང་ས་མཆོག་དང་མཇལ་འཕྲད་གནང་ན་ཞེས་ཡུལ་དེའི་གྲོས་ཚོགས་ཀྱིས་གྲོས་གཞི་ཞིག་བཏོན་གནང་ཡོད་པ་རེད།

འོན་ཀྱང་ཧོ་ལེན་ཌའི་གཞུང་གིས་གསལ་བསྒྲགས་ཤིག་སྤེལ་བའི་ནང་སྲིད་བློན་གྱི་ཚབ་ཏུ་ཕྱི་སྲིད་བློན་ཆེན་གྱིས་༸གོང་ས་མཆོག་དང་མཇལ་འཕྲད་གནང་རྒྱུ་ཡིན་པ་དང་གལ་ཏེ་སྲིད་བློན་མཆོག་གིས་༸གོང་ས་མཆོག་དང་མཇལ་འཕྲད་གནང་བ་ཡིན་ན་དེས་ཧོ་ལེན་ཌ་དང་རྒྱ་ནག་བར་གྱི་འབྲེལ་བར་གནོད་འཚེ་བྱ་རྒྱུ་ཡིན་པ་ལས་ཕན་ཐོགས་གང་ཡང་ཡོང་རྒྱུ་མེད་ལུགས་གསལ་བཤད་བྱས་ཡོད་པ་རེད།

ཧོ་ལན་ཌའི་གཞུང་གིས་འཛིན་པའི་སྲིད་བྱུས་དེ་ནི་རང་ཉིད་རྒྱ་ནག་གི་གནོན་ཤུགས་འོག་ཏུ་མགོ་མགུར་བ་རེད་ཅེས་ཡུལ་དེའི་གཡོན་ཕྱོགས་ཀྱི་ལྟ་གྲུབ་འཛིན་མཁན་ལྗང་ཁུ་ཚོགས་པས་སྣེ་ཁྲིད་དེ་ཡུལ་དེའི་གྲོས་ཚོགས་ནང་གི་ཕྱོགས་འགལ་ཚོགས་པ་ཁག་གིས་སྐྱོན་བརྗོད་ཞུས་ཡོད་པ་རེད།

ཡུལ་དེའི་གྲོས་ཚོགས་ཀྱིས་༸གོང་ས་མཆོག་གདན་འདྲེན་ཞུས་ན་མི་འགྲིག་ཅེས་རྒྱ་ནག་གིས་ཉེན་བརྡ་བཏང་ཡོད་རུང་ཧོ་ལེན་ཌའི་གྲོས་ཚོགས་ཀྱི་ངོས་ནས་༸གོང་ས་མཆོག་གྲོས་ཚོགས་སུ་གདན་འདྲེན་ཞུ་རྒྱུ་ཡིན་པ་མ་ཟད་རྒྱ་ནག་གི་ཆབ་སྲིད་ཐོག་ལ་ང་ཚོས་ཐེ་བྱུས་བྱེད་ཀྱི་མེད་པ་བཞིན་རྒྱ་ནག་གི་ཕྱོགས་ནས་ཀྱང་ང་ཚོའི་གྲོས་ཚོགས་ལས་དོན་ཐད་ལ་ཐེ་བྱུས་མི་བྱེད་པར་བརྩི་བཀུར་གནང་བའི་རེ་བ་ཞུ་རྒྱུ་ཡིན་ཞེས་ཧོ་ལེན་ཌའི་གྲོས་ཚོགས་ནང་གི་གཞུང་འཛིན་ཡེ་ཤུའི་དམངས་གཙོ་ཚོགས་པའི་ཚོགས་མི་སྐུ་ཞབས་མར་ཊིན་ཧེ་སྦར་ཀེམ་ཞུ་བས་རྒྱ་ནག་གི་གཞུང་ཚབ་ཁང་ལ་གསུངས་གནང་ཡོད་པ་ཨེ་པི་གསར་སྤེལ་ལས་ཁང་གིས་གནས་སྤེལ་ཡོད་པ་རེད༎