ཡོ་རོབ་གྲོས་ཚོཊ་ཀྱི་འཐུས་མི་འཁྲུངས་སྐར་ལ་ཕེབས་པ།

བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱ་ལྟར་ན།  ཕྱི་ཟླ་༧ པའི་ཚེས་༡༡ ཉིན་བོད་གཞུང་སྐུ་ཚབ་དོན་གཅོད་ཁང་གིས་ཡོ་རོབ་གྲོས་ཚོགས་ཀྱི་ལས་ཁུངས་ཨ་མའི་ཉེ་འཁྲིས་ཀྱི་Albert ཚོགས་ཁང་ཆེན་མོའི་ནང་སྐུའི་འཁྲུངས་སྐར་གྱི་མཛད་སྒོ་གོ་སྒྲིག་ཞུས་པའི་སྐབས། ཡོ་རོབ་གྲོས་ཚོགས་ཀྱི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་Thomas Mann མཆོག་ཆེད་ཕེབས་ཀྱིས་གསུང་བཤད་གནང་ཡོད་བ་དང༌། ཁོང་གིས། བོད་ཀྱི་སྐྱབས་མགོན་ཏྰ་ལའི་བླ་མ་མཆོག་ནི། བོད་དོན་བདེན་པའི་འཐབ་རྩོད་གནང་མཁན་དབུ་ཁྲིད་པའི་མཛད་བཟང་ལ་ང་ཚོས་དུས་རྟག་ཏུ་བསྔགས་བརྗོད་ཞུ་བཞིན་ཡོད། ཡོ་རོབ་སྤྱི་མཐུན་ཚོགས་པས། དམངས་གཙོ་དང་རང་དབང་གི་ཆེད་དུ་འཐབ་རྩོད་གནང་མཁན་བོད་མི་ཚོར་ཐབས་ལམ་འདྲ་མིན་ཐོག་ནས་རྒྱབ་སྐྱོར་ཞུས་དང་ཞུ་མུས་ཡིན་ཞེས་གསུང་ཡོད་པ་རེད། ད་དུང་མཛད་སྒོའི་ཐོག་གཞུང་འབྲེལ་གྱི་མཛད་གཙོ་རྣམ་པ་དང༌། ཡོ་རོབ་གྲོས་ཚོགས་ཀྱི་སྐུ་ཚབ་འཐུས་མི། བྷེལ་ཇམ་གྲོས་ཚོགས་ཀྱི་འཐུས་མི། ཡོ་རོབ་གྲོས་ཚོགས་དང་བྷེལ་ཇམ་གྲོས་ཚོགས་ཀྱི་འབྲེལ་ཡོད་ལས་བྱེད་པ་ཁག་ཅིག  བོད་ཀྱི་ཆོས་ཚོགས་དང༌། ས་གནས་བོད་རིགས་། བོད་དོན་རྒྱབ་སྐྱོར་བ། གཞུང་འབྲེལ་མིན་པའི་ཚོགས་པ་ཁག་ཅིག་གི་སྐུ་ཚབ། གསར་འགོད་པ། མཁས་དབང་སོགས་མཉམ་ཞུགས་གནང་ཡོད་པའི་སྐོར་བཀོད་བཞག