ལས་འགུལ་བ་འཛིན་བཟུང་དང་བཙན་དབང་གིས་བསྡུ་གསོག

དེ་ཡང་རྒྱ་ནག་གི་བདེ་སྲུང་བློན་ཆེན་རྒྱ་གར་ལ་འབྱོར་བའི་གོ་སྐབས་དང་བསྟུན་ཚེས་༥ ཉིན་ལྡི་ལི་ནས་བོད་ཀྱི་གཞོན་ནུ་ཚོགས་པའི་ཚོགས་མི་དང་། བོད་རང་དབང་སློབ་ཕྲུག་ཚོགས་པའི་ལས་འགུལ་བ་ཚོའི་ལག་ཏུ་བོད་རང་བཙན་ནི་རྒྱ་གར་གྱི་བདེ་འཇགས་ཡིན་ཞེས་བའི་འཕྲེད་དར་དང་། ཤོག་བྱང་།  ད་དུང་གཟུགས་པོའི་ཐོག་འབོད་ཚིག་འདྲ་མིན་བྲིས་ནས་ད་ལྟའི་བོད་ནང་གི་ཛ་དྲག་གི་གནས་བབ་ཐད་ལ་རྒྱ་གར་གཞུང་གི་རྒྱབ་སྐྱོར་དང་འཛམ་གླིང་ཧྲིལ་པོའི་ཐེ་བྱུས་དགོས་སྐོར་གྱི་སྐད་འབོད་བྱས་ཡོད་པ་དང་། སྐབས་དེར་བོད་ཀྱི་གཞོན་ནུ་དང་བོད་རང་དབང་སློབ་ཕྲུག་ཚོགས་ཚོགས་མི་སོགས་ལས་འགུལ་བ་མང་པོ་ཉེན་རྟོག་པས་འཛིན་བཟུང་བྱས་བའི་ཁྲོད་སློབ་ཕྲུག་ཚོགས་པའི་རྒྱ་གར་རྒྱལ་ཡོངས་འགན་འཛིན་རྡོ་རྗེ་ཚེ་བརྟན་དང་། ལས་འགུལ་འགན་འཛིན་བསྟན་འཛིན་འཇིགས་བྲལ་གཉིས་ཀྱང་ཡོད་པ་རེད་འདུག

རྒྱ་གར་བོད་རང་དབང་སློབ་ཕྲུག་ཚོགས་པའི་འགན་འཛིན་རྡོ་རྗེ་ཚེ་བརྟན་ལགས་ཀྱིས་བརྗོད་དོན། “རྒྱ་གར་ནི་འཛམ་གླིང་ཐོག་མང་གཙོའི་རྒྱལ་ཁབ་ཆེ་ཤོས་ཤིག་དང་ལོ་རྒྱུས་ཐོག་སེམས་དཔའ་ཆེན་པོ་གྷན་ངྷའི་འཚེ་མེད་ཞི་བའི་ལས་འགུལ་བརྒྱུད་ནས་ཐོབ་པའི་ད་ལྟའི་རང་བཙན་གྱི་རྒྱལ་ཁབ་ཅིག་ཡིན་པས།  རྒྱ་གར་རྒྱལ་ཁབ་ལ་བོད་པའི་འཚེ་མེད་ཞི་བའི་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་བྱེད་པའི་དམིགས་བསལ་ཀུན་སྤྱོད་རང་བཞིན་གྱི་འགན་འཁྲི་ཡོད་། ད་དུང་བོད་ཀྱི་གནད་དོན་ཐག་གཅོད་གཙང་མ་བྱེད་ཐུབ་ན།  ད་གཟོད་རྒྱ་དཀར་ནག་གཉིས་དབར་གྱི་རྩོད་རྙོག་ལའང་རང་བཞིན་གྱི་ལམ་ཁ་གསར་པ་ཞིག་རྙེད་ཐུབ།“ཅེས་བརྗོད་འདུག

ད་དུང་འདི་གའི་གསར་འགོད་པས་གནས་ཚུལ་བཏང་དོན་ལྟར་ན། རྒྱ་གར་ཉེན་རྟོག་པས་དུས་ཚོད་ངེས་མེད་ཀྱི་ཟས་བཅད་ངོ་རྒོལ་ལས་འགུལ་བྱེད་མཁན་གསུམ་པོ་བསྐྱར་དུ་འཛིན་བཟུང་དང་། ལས་འགུལ་སྤེལ་ཡུལ་གྱི་རས་གུར་སོགས་བཙན་དབང་གིས་བསྡུ་གསོག་རྒྱབ་ཡོད་པ་རེད་འདུག