དོ་སྣང་ཆེ་ཙམ་གནང་དགོས།

༄༅།    །རྒྱ་གར་གྱི་གྲོས་ཚོགས་གོང་མའི་འཐུས་མི་སྐུ་ཞབས་Rajeev Chandrasekher མཆོག་གིས་བོད་ནང་གི་བོད་མིས་རང་ལུས་མེར་སྲེག་གཏོང་བཞིན་པའི་ཛ་དྲག་གི་གནད་དོན་དེར་འཛམ་གླིང་ཁྱོན་ཡོངས་དང་།    ལྷག་པར་དུ་རྒྱ་གར་གཞུང་ཕྱོགས་ནས་དོ་སྣང་ཆེ་ཙམ་ལེན་དགོས་པའི་སྐོར་རྒྱ་གར་གྱི་གྲོས་ཚོགས་ལ་ཞུ་སྐུལ་གནང་ཡོད་པའི་སྐོར་གནས་ཚུལ་ཐོན་འདུག
དེ་ཡང་སྐུ་ཞབས་Rajeev Chandrasekhar ལགས་ཀྱིས་བོད་ཀྱི་གནད་དོན་དང་འབྲེལ་བའི་ཕྱག་བྲིས་དེ་ཚེས་༡༩ཉིན་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ཚོགས་གཙོ་ལྷན་རྒྱས་ལ་ཕུལ་ཡོད་པ་དང་།    ཁོང་གི་ཕྱག་བྲིས་དེའི་ནང་།    བོད་ཐེ་བས་འཛམ་གླིང་གི་ས་ཕྱོགས་གང་རུང་ནང་འཚར་ལོངས་བྱེད་བཞིན་པའི་མི་ཐོག་གསར་པའི་གཞོན་ནུ་ཕོ་མོ་སུ་འདྲ་ཞིག་རུང་། རང་རེའི་ཕ་མ་དང་། སྤྱི་ཚོགས།    དེ་བཞིན་སྒེར་སོ་སོར་དོན་སྙིང་ལྡན་པའི་མ་འོངས་མདུན་ལམ་ཞིག་བསྐྲུན་རྒྱུའི་ཐོབ་ཐང་ཡོད་པར་ངས་ཡིད་ཆེས་བྱེད་ཀྱི་ཡོད་ཅེས་གསུངས་ནས་བོད་ནང་བོད་མི་གཞོན་སྐྱེས་མང་པོས་ གཅིག་མཇུག་གཉིས་མཐུད་ཀྱིས་རང་ལུས་མེར་སྲེག་གཏོང་བཞིན་པའི་ཡིད་སྐྱོའི་གནས་ཚུལ་དང་། རང་ལུས་མེར་སྲེག་གཏོང་དགོས་པའི་རྒྱུ་རྐྱེན་ཇི་ཆགས་སྐོར།  རྒྱལ་སྤྱིའི་སྤྱི་ཚོགས་དང་ལྷག་པར་དུ་རྒྱ་གར་ངོས་ནས་དོ་སྣང་ལེན་གལ་ཆེ་བའི་སྐོར་གསལ་འདོན་གནང་བཞག་ ཁོང་གིས་ད་དུང་།    བོད་ཀྱི་དབུ་ཁྲིད་༧གོང་ས་ཏཱ་ལའི་བླ་མ་མཆོག་རྒྱ་གར་གྱི་གྲོས་ཚོགས་ནང་བཀའ་སློབ་གསུངས་བཤད་གནང་བར་གྲོས་ཚོགས་ཀྱི་ཚོགས་གཙོ་མཆོག་ནས་གདན་ཞུ་གནང་དགོས་པ་དང་།  དེ་བཞིན་བོད་མིའི་ཆབ་སྲིད་དབུ་ཁྲིད་སྲིད་སྐྱོང་མཆོག་རྒྱ་གར་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་ལྷན་དུ་མཇལ་འཕྲད་གདན་ཞུ་གནང་དགོས་པའི་སྐོར་གསུངས་ཡོད་པ་རེད།།