ཨ་རིའི་གཙུག་ལག་སློབ་གྲ་ཞིག་གིས་སྲིད་སྐྱོང་མཆོག་ལ་གཟེངས་རྟགས་འབུལ་འཆར།

༄༅།ཨ་རིའི་གཙུག་ལག་སློབ་གྲ་ཞིག་གིས་སྲིད་སྐྱོང་བློ་བཟང་སེང་གེ་མཆོག་ལ་གཟེངས་རྟགས་ཤིག་འབུལ་འཆར།
དེའང་དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་བཀོད་པར་གཞིགས་ན།   སྤྱི་༢༠༡༥་ཟླ་༡༠་ཚེས་༡༢ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་ཨ་རིའི་ས་ལི་བུ་རི་གཙུག་ལག་སློབ་གཉེར་ཁང་གི་སྙན་གྲགས་ཆེ་བའི་པིར་སི་ཌེན་ཤལ་ཞེས་པའི་གཟེངས་རྟགས་གནང་རྒྱུ་ཡིན་པ་རེད་འདུག།     པིར་སི་ཌེན་ཤལ་རྟགས་མ་ཞེས་པ་དེ་ནི་གཙུག་ལག་སློབ་གཉེར་ཁང་དེས་སྤྱི་ཚོགས་ནང་གཟེངས་སུ་ཐོན་པ་དང་འཆར་སྣང་ཅན་གྱི་འགོ་ཁྲིད་མི་སྣ་སྒེར་པ་ཁག་ཅིག་ལ་གནང་སྲོལ་ཡོད་པ་ཞིག་རེད།  ཐེངས་གཟེངས་རྟགས་འདི་ནི་མི་རི་ལན་ཌི་མངའ་སྡེའི་ཁོངས་སུ་གཏོགས་པའི་གཙུག་ལག་སློབ་གཉེར་ཁང་གི་འགན་འཛིན་ལྷན་ཚོགས་མཉམ་འཛོམས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་འབུལ་གནང་རྒྱུའི་ཐག་གཅོད་གནང་བ་ལྟར་གསལ་བསྒྲགས་གནང་བ་ཞིག་ཡིན་འདུག།  དེ་བཞིན་འདི་ལོ་ཟླ་བཅུ་པའི་ནང་སྲིད་སྐྱོང་མཆོག་གིས་ཁུལ་དེར་མང་གཙོ་དང་འབྲེལ་བའི་གསུང་བཤད་མ་གནང་གོང་དེ་གའི་ས་ལིས་བུ་རི་གཙུག་ལག་སློབ་གཉེར་ཁང་གི་དབུ་འཛིན་སྐུ་ཞབས་ཇ་ནེཌ་ཌཌུ་ལེ་Janet Dudley- Eshbachལགས་ཀྱིས་སྲིད་སྐྱོང་ལ་རྟགས་མ་དེ་འབུལ་རྒྱུ་ཡིན་འདུག    ཕྱོགས་མཚུངས་འདི་ལོ་ཟླ་བཅུ་པའི་ནང་བོའོ་སར་མན་རྩོད་རྙོག་འདུམ་འགྲིག་བསྟི་གནས་ཁང་དུ་སྲིད་སྐྱོང་མཆོག་ལ་མགྲོན་འབོད་ཞུས་པ་བཞིན་དེར་སྲིད་སྐྱོང་མཆོག་གིས།      འགྱུར་བ་གཏོང་རྒྱུར་གང་ཟག་གཅིག་གིས་ཀྱང་ཁྱད་པར་བཟོ་ཐུབ་ཅེས་པའི་རྗོད་གཞིའི་ཐོག་གསུང་བཤད་གནང་རྒྱུ་དང་།  སྐབས་དེར་རྒྱལ་ཁབ་ཀྱི་དབུ་ཁྲིད་ཟུར་པ་ཁག་ཅིག་དང་དེ་བཞིན་ནོ་བེལ་གཟེངས་རྟགས་བཞེས་མྱོང་མཁན་གྱི་ཆེས་མཐོའི་མི་སྣ་ཁག་ཅིག་ཀྱང་མཉམ་ཞུགས་གནང་རྒྱུ་ཡིན་འདུག།
གསར་འགོད་པ་འཇམ་དཔལ་ཕུན་ཚོགས།