ལག་འཁྱེར་ངོས་ལེན་གནང་རྒྱུ།

༄༅།    །རྒྱ་གར་ལྷོ་ཕྱོགས་མེ་སོར་གཙུག་ལག་སློབ་གཉེར་ཁང་ནས། ལོ་ལྔའི་རིང་༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་ཐོན་པའི་ལག་འཁྱེར་ངོས་ལེན་གནང་རྒྱུའི་ཞལ་བཞེས་གནང་འདུག    དེ་ཡང་༧གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་བུ་མོ་ཚེ་རིང་ལགས་ཀྱིས་འགྲེལ་བརྗོད་གནང་བ་ལྟར་ན།    ཕྱི་ལོ་༢༠༡༣།༡༤ལོ་གནས་བཟུང་ B.A. ཞེས་པའི་ཐུན་མོང་གཙུག་ལག་སློབ་ཐོན་དང། B.Com ཞེས་ཚོང་རིག་གཙུག་ལག་སློབ་ཐོན། གཞན་ཡང་ BCA ཞེས་པའི་གློག་ཀླད་རྩིས་འཕྲུལ་གཙུག་ལག་སློབ་ཐོན་བཅས་ཀྱི་ལག་འཁྱེར་ལ་མེ་སོར་གཙུག་ལག་སློབ་ཁང་ནས་ངོས་ལེན་གནང་གི་རེད་ཅེས་གསུངས་འདུག    རྒྱ་གར་ལྷོ་ཕྱོགས་སུ་རྟེན་གཞི་བྱེད་པའི་༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་གསར་འཛུགས་བྱས་ནས་ད་ལྟའི་བར་རྒྱ་གར་གཞུང་གིས་ཚད་ལྡན་ལག་འཁྱེར་ཐོབ་མེད་པར་བརྟེན། མེ་སོར་གཙུག་ལག་སློབ་གཉེར་ཁང་ལ་༢༠༡༢ ལོའི་ཕྱི་ཟླ་༡༡ ཚེས་༢༤ ཉིན་སྙན་ཞུ་དེ་ཕུལ་ནས་ད་རེས་ཕྱི་ཟླ་༤ཚེས་༢༠ ཉིན་ཕན་ཚུན་མོས་མཐུན་འོག    དེ་ལྟར་ཐག་གཅོད་བྱུང་བ་ཞིག་ཡིན་འདུག
མེ་སོར་གཙུག་ལག་སློབ་གཉེར་ཁང་ནི།    མེ་སོར་གྱི་རྒྱལ་པོ་ Nalvadi Krishnaraja་Wodeyar IV ལགས་ཀྱིས་༡༩༡༦ ལོར་གསར་འཛུགས་བྱས་པ་ཞིག་ཡིན་པ་དང་།    ༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་ནི།    ཕྱི་ལོ་༢༠༠༩ ལོར་༧གོང་ས་མཆོག་གིས་དབུ་འབྱེད་གནང་བ་ཞིག་ཡིན་པ་རེད།།