ཨོ་སོ་ཀྲོ་ལི་ཡའི་བློན་ཆེན་གྱིས་རྒྱ་གར་ལ་ཡིད་ཆེས་སྐྲུན་ཐབས།

༄༅༎བར་ལམ་ཨོ་སོ་ཀྲོ་ལི་ཡའི་ནང་སློབ་གཉེར་ཆེད་དུ་བསྐྱོད་པའི་རྒྱ་གར་སློབ་ཕྲུག་ཐོག་ཚབས་ཆེའི་ཉེས་རྡུང་བཏང་བ་དང་རང་ཡུལ་རྒྱ་གར་དུ་ཕྱིར་ལོག་བྱ་དགོས་ཞེས་འཇིགས་སྐུལ་བྱས་པའི་གནས་ཚུལ་ཐོན་པ་དེ་ནི་རྒྱ་གར་ཕྱོགས་ནས་མི་རིགས་དབྱེ་འབྱེད་བྱེད་ཀྱི་ཡོད་པ་བཤད་དེ་ད་ཆ་ཨོ་སོ་ཀྲོ་ལི་ཡའི་ནང་རྒྱ་གར་སློབ་ཕྲུག་སློབ་གཉེར་ཆེད་དུ་འགྲོ་མཁན་མེད་པའི་གནས་སྟངས་བྱུང་བར་བརྟེན་ནས་ཨོ་སོ་ཀྲོ་ལི་ཡའི་གཞུང་ཕྱོགས་ནས་མི་རིགས་དབྱེ་འབྱེད་ཟེར་བ་བདེན་པ་མིན་པ་དང་ཨོ་སོ་ཀྲོ་ལི་ཡའི་ནང་རྒྱ་གར་སློབ་ཕྲུག་ཚོར་བདེ་འཇགས་ཀྱི་ཉེན་ཁ་མེད་པའི་ཡིད་ཆེས་སྐྲུན་ཐབས་གནང་གི་ཡོད་པ་རེད།

དེ་ཡང་བར་ལམ་དོན་རྐྱེན་དེའི་ཐོག་ནས་ཨོ་སོ་ཀྲོ་ལི་ཡའི་གཞུང་དང་ཉེན་རྟོག་པའི་མཐོ་རིམ་དཔོན་རིགས་རིམ་པས་རྒྱ་གར་དུ་འཚམས་འདྲིར་ཕེབས་ཏེ་ཡིད་ཆེས་སྐྲུན་ཐབས་གནང་བ་དང་རེས་གཟའ་ཉི་མའི་ཉིན་ཨོ་སོ་ཀྲོ་ལི་ཡའི་ཕྱི་མི་གཞིས་སྤོས་བློན་ཆེན་ཤི་སི་ཨེ་ལྦན་སི་ཡིས་ཨོ་སོ་ཀྲོ་ལི་ཡའི་སི་ཀའེ་ནིའུ་སི་ཞེས་པའི་གསར་འགོད་པའི་བཅར་འདྲི་དང་ལེན་གནང་སྐབས་གསུངས་དོན་ལ་ཁོང་གཟའ་འཁོར་འདིའི་ནང་རྒྱ་གར་དུ་འཚམས་འདྲིར་ཕེབས་ཏེ་རྒྱ་གར་གྱི་དཔོན་རིགས་དང་སློབ་ཕྲུག་གི་ཕ་མ་ཚོར་ཡིད་ཆེས་སྐྲུན་ཐབས་གནང་རྒྱུ་མ་ཟད་ཨོ་སོ་ཀྲོ་ལི་ཡའི་རྒྱལ་ཁབ་དེ་ནི་རིག་གཞུང་འདྲ་མིན་ཚང་བའི་རྒྱལ་ཁབ་ཅིག་ཡིན་པ་དང་ང་ཚོས་མི་གཞན་ལ་མི་རིགས་དབྱེ་འབྱེད་ཀྱི་ལྟ་བ་འཛིན་གྱི་མེད་པའི་ཡིད་ཆེས་སྐྲུན་རྒྱུ་མཚོན་པའི་སྤྱི་ཚོགས་ཐོག་ད་ཆ་ཨོ་སོ་ཀྲོ་ལི་ཡའི་ནང་མི་རིགས་དབྱེ་འབྱེད་བྱེད་ཀྱི་ཡོད་པའི་བསམ་ཚུལ་ངན་པ་ཞིག་ཏུ་གྱུར་ཡོད་པ་དེ་དག་སེལ་ཐབས་འབད་བརྩོན་གནང་རྒྱུ་ཡིན་ཞེས་གསུངས་ཡོད་པ་རེད།