གངས་རུད་འོག་མི་དྲུག་རྐྱེན་འདས།

༄༅།    །དེ་ཡང་བོད་ཀྱི་སྤྱི་ཚོགས་ལས་དོན་ཚན་པས་གནས་ཚུལ་བཤད་པར་གཞིགས་ན། བོད་ཀྱི་མངའ་རིས་ཁུལ་དུ་ཁ་བ་བསྟུད་མར་བབས་པར་བརྟེན།    རེས་གཟའ་ལྷག་པའི་ཉིན་མངའ་རིས་ཀྱི་རྩ་མདའ་གྲོང་གསེབ་ཏུ་གངས་རུད་ཐེབས་ཏེ་མྱུར་སྐྱོབ་རོགས་རམ་ཡོང་བའི་ལན་འབྱོར་བའི་རྗེས་མྱུར་སྐྱོབ་རུ་ཁག་བསྐྱོད་པའི་ཁོངས་ནས་མི་དྲུག་འདས་གྲོངས་སུ་ཕྱིན་ཡོད་པ་རེད་འདུག མི་དྲུག་པོ་དེ་རྣམས་མྱུར་སྐྱོབ་རུ་ཁག་ནང་དུ་དང་བླངས་ཀྱིས་ཞུགས་ཏེ།    འབྲོག་པ་མི་གཉིས་གངས་རུད་ནས་མྱུར་སྐྱོབ་བྱེད་པའི་སྐབས་སྲོག་ཤོར་བ་ཞིག་ཡིན་ལུགས་དང༌། ད་དུང་མྱུར་སྐྱོབ་རུ་ཁག་གི་ཁོངས་ནས་མི་གཅིག་འཚོ་གནས་ཐུབ་ཡོད་ཀྱང་།    ད་ལྟ་སྐད་ཆ་ཤོད་མ་ཐུབ་པར་དྲན་མེད་དུ་ལུས་ཡོད་པའི་སྐོར་བཤད་ཡོད་པ་རེད། འོན་ཀྱང་གངས་རུད་ཐེབས་ཡུལ་ས་ཁུལ་དུ་བསྟུད་མར་ཁ་བ་འབབ་བཞིན་པའི་རྐྱེན་གྱིས་གྲོང་གསེབ་དེའི་ཁུལ་གྱི་ཁ་པར་སོགས་འབྲེལ་ལམ་ལ་དཀའ་ངལ་འཕྲད་དེ། མྱུར་སྐྱོབ་རུ་ཁག་འཕྲལ་དུ་ས་གནས་སུ་འབྱོར་མ་ཐུབ་པ་དང༌། དེའི་ཁུལ་གྱི་གནས་ཚུལ་གསར་པ་འབྱོར་རྒྱུར་དཀའ་ངལ་འཕྲད་བཞིན་ཡོད་པ་རེད། །