ཚོགས་ཆེན་རིང་བདེ་འཇགས་སྲུང་སྐྱོབ་འཐུས་སྒོ་ཚང་དགོས་པ།

དེ་ཡང་གནས་ཚུལ་ལྟར། རྒྱ་ནག་གུང་ཁྲན་ཚོགས་པའི་ཚོགས་ཆེན་བཅོ་བརྒྱད་རིང་རྒྱ་ནག་ནང་དང་། གཙོ་བོ་རྒྱ་ནག་གི་རྒྱལ་ས་པེ་ཅིན་དུ་བརྟན་ལྷིང་བྱུང་ནས་ཚོགས་ཆེན་རྒྱལ་ཁའི་ངང་ཚོགས་ཐུབ་རྒྱུར་། པེ་ཅིན་ཉེ་ཁུལ་གྱི་བདེ་འཇགས་སྲུང་སྐྱོབ་ལས་དོན་སྤེལ་མཁན་གྱི་ཉེན རྟོག་པ་དང་། ཉེན་རྟོག་དམག་མི། དེ་བཞིན་དང་བླངས་ཞབས་ཞུ་བ་མང་པོ་ཞིག་འདུ་རུབ་བྱས་ཡོད་པ་རྣམས་ལ་ཁ་སང་གཟའ་ཟླ་བའི་ཉིན་རྒྱ་ནག་སྲིད་ཁྲིམས་ལས་ཁང་གི་བློན་ཆེན་ཀྲའུ་ཡུང་ཁང་གིས་ལྟ་ཞིབ་བྱས་པ་དང་འབྲེལ་ཚོགས་ཆེན་བཅོ་བརྒྱད་རིང་གཙོ་བོ་གྲོང་ཁྱེར་གྱི་བདེ་འཇགས་སྲུང་སྐྱོབ་ལས་དོན་འཐུས་སྒོ་ཚང་དགོས་པའི་གཏམ་བཤད་སྤེལ་ཡོད་པ་རེད།

ཁོང་གིས་ཧའ་བད་ཞིང་ཆེན་ཤང་ཧའ་རྫོང་དང་། དེ་བཞིན་པེ་ཅིན་གྱི་ཉེ་འདབས་དུང་ཀྲའུ་ས་གནས་གཉིས་ནང་སྒུག་འདོད་བྱེད་བཞིན་པའི་ཚོགས་ཆེན་བཅོ་བརྒྱད་རིང་པེ་ཅིན་གྲོང་ཁྱེར་ཉེ་འཁོར་གྱི་ས་ཁུལ་ཁག་ནང་བདེ་འཇགས་སྲུང་སྐྱོབ་ལས་དོན་སྤེལ་མཁན་གྱི་ཉེན རྟོག་པ་དང་། དྲག་ཆས་ཉེན་རྟོག་དམག་མི་ཚོ་དང་ཐུག་ཕྲད་བྱས་ནས་ཁོང་ཚོར་ཚོགས་ཆེན་བཅོ་བརྒྱད་རིང་པེ་ཅིན་གྲོང་ཁྱེར་སྲུང་སྐྱོབ་ཀྱི་ལས་དོན་འཐུས་སྒོ་ཚང་པོ་སྤེལ་ནས་ཚོགས་ཆེན་རིང་རྙོག་དྲའི་རིགས་མི་ཡོང་བ་བྱ་དགོས་པ་བཤད་ཡོད་པ་རེད།

རྒྱ་ནག་གུང་ཁྲན་ཚོགས་པའི་ཚོགས་ཆེན་བཅོ་བརྒྱད་དེ་བཞིན་ཕྱི་ཟླ་བཅུ་གཅིག་པའི་ཚེས་༨ཉིན་དངོས་སུ་ཚོགས་ཀྱི་ཡོད་པ་དང་།  ཚོགས་ཆེན་མ་ཚུགས་ཀྱི་སྔོན་ནས་པེ་ཅིན་གྲོང་ཁྱེར་ནང་ཉེན་རྟོག་པ་དང་། དྲག་ཆས་ཉེན རྟོག་པ། དེ་བཞིན་དང་བླངས་ཞབས་ཞུ་པ་མང་པོ་ཞིག་བཀོད་བསྒྲིགས་བྱས་ནས་ཚོགས་ཆེན་བཅོ་བརྒྱད་ཚུགས་པའི་རིང་རྒྱ་ནག་གི་རྒྱལ་ས་པེ་ཅིན་གཙོས་པའི་ས་ཁུལ་ཁག་ནང་རྙོག་དྲའི་རིགས་མི་ལྷག་པའི་དོགས་ཟོན་དམ་དྲག་བྱེད་བཞིན་པ་དང་། ད་དུང་རྒྱ་ནག་གི་པེ་ཅིན་གྲོང་ཁྱེར་དང་དེའི་ཉེ་ཁུལ་ས་གནས་ཙམ་མ་ཟད། བོད་ཀྱི་ས་ཁུལ་ཁག་ནང་ལ་ཡང་དམ་བསྒྲཌ་བྱེད་ཤུགས་ཆེ་རུ་བཏང་ནས་མི་སེར་ཕར་ཚུར་འགྲོ་བསྐྱོད་བྱེད་མཁན་ཚོར་དམ་དྲག་དཀའ་ངལ་བཟོ་བཞིན་ཡོད་པའི་ཁར་གང་འདོད་འགྲོ་བསྐྱོད་བྱེད་མི་ཆོག་པ་དང་། ཐ་ན་སྨན་བཅོས་བྱེད་པར་འགྲོ་མཁན་ཚོར་ཡང་རྒྱ་ནག་གཞུང་གིས་གཏན་འབེབས་བྱས་པའི་ལག་འཁྱེར་མཉམ་དུ་མེད་ཚེ་ བཀག་སྡོམ་བྱས་ནས་གཏོང་གི་མེད་པ་རེད་འདུག