འབུམ་སྡེ་ལར་བོད་མི་ཚོས་༧༧ འཁྲུངས་སྐར་སྲུང་བརྩི།

ཕྱི་ཟླ་བདུན་པའི་ཚེས་དྲུག་ཉིན་འབུམ་སྡེ་ལར་བོད་མི་ཚོས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཤིང༌། སྔ་དྲོ་དེའི་ཁུལ་དུ་ཡོད་པའི་མཚོ་སྣ་དགོན་རྩེ་རབ་རྒྱས་གླིང་དང་ཐུབ་མཆོག་དགའ་ཚལ་གླིང་གི་མཁན་པོས་དབུས་པའི་དགེ་འདུན་འདུས་མང་གིས་༧གོང་ས་མཆོག་གིས་སྐུ་ཚེ་ཡུན་རིང་བརྟན་ཅིང་ཐུགས་དགོངས་་མཐའ་དག་ལྷུན་གྱིས་འགྲུབ་པའི་སྨོན་ལམ་གསུང་འདོན་གནང་ཡོད་པ་རེད།
དེ་རིང་བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་བའི་ནང། ཉིན་དེར་སྔ་དྲོ་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་ཞུ་གནང་བ་དང༌། འབྲེལ་ཡོད་ཁག་གི་མནྚལ་རྟེན་གསུམ་འདེགས་འབུལ་དང༌། དཀར་ཕྱོགས་སྐྱོང་བའི་ལྷ་རྣམས་ལ་འཕྲིན་སྐུལ་གནང་ཡོད་བ་སོགས་ཆོས་ཕྱོགས་ཀྱི་བྱེད་སྒོ་ཁག་གྲུབ་པའི་རྗེས། སྐུའི་འཁྲུངས་སྐར་སྲུང་བརྩིའི་ཞུ་བའི་མཛད་སྒོའི་ཐོག་མི་དམངས་སྟོང་ཕྲག་གསུམ་ཙམ་འདུ་འཛོམས་བྱུང་བ་ཚོས་༧གོང་ས་མཆོག་གི་སྐུ་པར་ལ་མཇལ་དར་ཕུལ་བ་དང༌། རྟེན་འབྲེལ་གྱི་གྲོ་མ་འབྲས་སིལ་ཕུལ་ཡོད་པ་རེད། དེ་རྗེས་ནང་པའི་རིག་གཞུང་ལྷན་ཚོགས་ཀྱི་ཚོགས་གཙོ་རྡོ་རྗེ་ཚེ་རིང་ལགས་ཀྱིས་དུས་ཆེན་ངོ་སྤྲོད་དང་༧གོང་ས་མཆོག་གིས་བསྐྱང་གནང་བའི་རླབས་ཆེན་གྱི་མཛད་འཕྲིན་སྙིང་བསྡུས་ངོ་སྤྲོད་ཞུས་པ་དང༌། དེ་བཞིན་འབུམ་སྡེ་ལ་ས་གནས་བོད་མིའི་འགོ་འཛིན་ལས་ཁུངས་ཀྱི་ལས་དྲུང་གིས་བོད་མིའི་སྒྲིག་འཛུགས་བཀའ་ཤག་གི་ཡོངས་ཁྱབ་གསུང་བཤད་སྒྲོག་སྦྱང་གནང་བ་དང༌། ཡུལ་མི་ཚོས་ད་བར་བོད་མིར་མཐུན་འགྱུར་དང་རྒྱབ་སྐྱོར་གནང་བ་མ་ཟད། སྐུའི་འཁྲུངས་སྐར་ལ་མཐུན་འགྱུར་རྐང་བཞེས་གནང་བར་ཐུགས་རྗེ་ཆེའི་གསུང་བཤད་གནང་ཡོད་པ་རེད། དེ་རྗེས་སྐུ་མགྲོན་གཙོ་བོ་འབུམ་སྡེ་ལ་རྫོང་དཔོན་རིན་ཆེན་བཀྲིས་ལགས་ཀྱིས། ༧གོང་ས་སྐུ་ཕྲེང་ན་རིམ་གྱི་མཛད་རྣམ་དང༌། ལྷག་དོན་སྐུ་ཕྲེང་༡༤ པ་ཆེན་པོའི་མཛད་འཕྲིན་རྣམས་ངོ་སྤྲོད་གནང༌ཡོད་ལ།  ས་ཁུལ་དེའི་ནང་དུ་ཡོད་པའི་གཞུང་དང་སྒེར་གྱི་སློབ་གྲྭ་༡༦ གི་ཡིག་རྒྱུགས་བརྒྱ་ཆ་རྩེར་སོན་པའི་སློབ་མ་རྣམས་ལ་བྱ་དགའ་དང༌། བོད་གཞས་དང་ཡུལ་གྱི་མོན་གཞས་ཁག་འཁྲབ་སྟོན་ཞུས་ཡོད་པ་རེད། མངའ་སྡེའི་གྲོས་ཚོགས་འཐུས་མི་ཨ་ཀྲི་ཁུན་གྱིས། ཉིན་དེའི་མི་དམངས་གསུམ་སྟོང་ལ་ཉིན་དགུང་གསོལ་ཚིགས་གཏོང་ཆེད་ཧིན་སྒོར་ཁྲི་ལྔ་ཞལ་འདེབས་གནང་བ་དང༌། དེ་རྗེས་ལྗོན་ཤིང་༤༠༠ ལྷག་འདེབས་བཙུགས་ཞུས་པ་སོགས་ཀྱི་བྱེད་སྒོ་སྤེལ་བ་བཞིན། ཉིན་དེར་མོན་རྟ་དབང་དང༌། ལྡི་རང༌། ཨི་ཊ་ན་གྷར་བཅས་སུའང་གཅིག་མཚུངས་ཀྱིས་སྐུའི་འཁྲུངས་སྒར་དུས་ཆེན་སྲུང་བརྩི་ཞུས་ཡོད་པའི་སྐོར་བཀོད་བཞག