འབྲུག་གིས་ཡུལ་མི་གསུམ་ལ་ལོ་གསུམ་གྱི་བཙོན་འཇུག་ཁྲིམས་ཐག

༄༅༎འབྲུག་གི་གྲོང་ཁྱེར་སྤ་རོའི་ནང་ཡོད་པའི་ས་གནས་ཁྲིམས་ཁང་གིས། ཕྱི་ཚེས་༢༦་ཉིན་ ཡུལ་མི་གསུམ་ལ་ཐ་མག་འཁྱེར་ཡོང་བའི་ནག་ཉེས་འོག ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་དང༌། མི་མང་པོ་ཞིག་གིས་འབྲུག་གཞུང་གི་ཐ་མག་བཀག་སྡོམ་གྱི་ཉེས་ཁྲིམས་དེ། ལྗིད་དྲགས་ཀྱི་ཡོད་པའི་སྐྱོན་བརྗོད་མང་པོ་ཞིག་ཐོན་བཞིན་ཡོད་པ་རེད།

འབྲུག་གཞུང་གིས་ཕྱི་ལོ་༢༠༠༥་ལོར་ཡུལ་ནང་རྡོ་ཐ་རིགས་ཚོང་འགྲེམས་མི་ཆོག་པའི་ཁྲིམས་གཞི་གཏན་འབེབས་བྱས་ཡོད་པ་དང་། གནས་ཚུལ་ཐོན་ཁུངས་ལ་གཞིགས་ན་འབྲུག་ནང་ཐ་མ་འཐེན་མཁན་ཞིག་ལ་ ཟླ་བ་གཅིག་ལ་ཕྱི་ནས་ཐ་མག་རྐང་༢༠༠དང་། རྡོ་ཐ་བེད་སྤྱོད་བྱེད་མཁན་ཞིག་ལ་རྡོ་ཐ་ག་རམ་༡༥༠ལས་ ཉོ་མི་ཆོག་པའི་དམ་དྲག་ཡོད་པ་དང་། ཁྲིམས་གཞི་དེའི་འོག་ནག་ཉེས་ཀྱི་ཉེས་པ་དང་པོ་འདི་སྔར་ལོ་ཕྱི་ཟླ་༣་པའི་ནང་འབྲུག་གི་གྲྭ་པ་བསོད་ནམས་ཚེ་རིང་ཟེར་བ་ཞིག་གིས། སྒོ་ཁྲལ་ལས་ཁུངས་ལ་གསལ་བཤད་མེད་པར་རྡོ་ཐ་ཁ་ནི་ཤོག་ཆག་༤༨་ འཁྱེར་ཡོང་བའི་ཉེས་པར་ལོ་གསུམ་གྱི་བཙོན་བཅུག་གི་ཉེས་པ་ཕོག་ཡོད་པ་རེད།

འབྲུག་ཡུལ་གྱི་ཕྱོགས་འགལ་ཚོགས་པའི་འགོ་ཁྲིད་ཚོས་ཐ་མག་བཀག་སྡོམ་གྱི་ཁྲིམས་གཞི་དེ་ལྗིད་དྲགས་ཀྱི་ཡོད་པ་དང་། གནད་དོན་དེ་ལྟ་བུར་ཉེས་པ་དེ་ལྟ་བུའི་ལྗི་པོ་གཏོང་རྒྱུ་སྨྱོན་པའི་བྱ་སྤྱོད་ལྟ་བུ་འགྱུར་འདུག་ཅེས་སྐྱོན་བརྗོད་གནང་གི་ཡོད་འདུག།