མངའ་སྡེའི་སྤྱི་ཁྱབ་མཆོག་དུས་འཁོར་དབང་ཆེན་ལ་སྐུ་བཅར།

༄༅༎རྒྱ་གར་མངའ་སྡེ་བི་ཧར་གྱི་སྤྱི་ཁྱབ་བློན་ཆེན་ནི་ཏིཤ་ཀུ་མའར་གྱིས་རིང་མིན་གནས་མཆོག་རྡོར་རྗེ་གདན་དུ་༧གོང་ས་༧སྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་བཀྲིན་སྩལ་སྐབས་སྐུ་བཅར་ཞུས་གནང་ཡག་རེད་འདུག།
དུས་འཁོར་དབང་ཆེན་ཐེངས་༣༢པ་གོ་སྒྲིག་གནང་མཁན་ཚོགས་ཆུང་གི་ཟུང་དྲུང་ཐུབ་བསྟན་བྱམས་པ་ལགས་ཀྱིས་ ཕ་ཡུལ་དྲ་གནས་ལ་གསུངས་ན། ཟླ་བ་འདིའི་ཚེས་༣༡ནས་༢༠༡༢ཕྱི་ཟླ་༡པོའི་ཚེས་༡༠བར་ཚུགས་གནང་རྒྱུའི་དུས་འཁོར་དབང་ཆེན་ཐོག་ བི་ཧར་མངའ་སྡེའི་སྤྱི་ཁྱབ་བློན་ཆེན་ལ་གཞུང་འབྲེལ་གདན་ཞུ་ཕུལ་བར་ཁོང་གིས་ཞལ་བཞེས་གནང་ཡོད་སྐོར་གསུངས་བཞག། རེས་གཟའ་ཟླ་བའི་ཉིན་དུས་འཁོར་དབང་ཆེན་གྱི་སྦྱིན་བདག་དང་ཨ་རུ་ན་ཅལ་པར་དེཤི་མངའ་སྡེའི་སྤྱི་ཁྱབ་བློན་ཆེན་དམ་པ་རྡོར་རྗེ་མཁའ་འགྲོ་ལགས་ཀྱི་སྲས་བགྲེས་ཤོས་པདྨ་མཁའ་མགྲོ་ལགས་གཙོས་པའི་དབང་ཆེན་གོ་སྒྲིག་གནང་མཁན་རྒྱུན་ལས་ཁག་ཅིག་གིས་ བི་ཧར་མངའ་སྡེའི་སྤྱི་ཁྱབ་བློན་ཆེན་གྱི་གཟིམ་ཤག་ཏུ་བཅར་སྐབས་ནི་ཏིཤ་ཀུ་མའར་གྱིས་དུས་འཁོར་དབང་ཆེན་ཐོག་ཕེབས་རྒྱུའི་ཞལ་བཞེས་གནང་ཡོད་པ་མ་ཟད། དུས་འཁོར་དབང་ཆེན་དང་འབྲེལ་བའི་གནད་དོན་ཐད་དུས་འཁོར་དབང་ཆེན་གོ་སྒྲིག་ཚོགས་ཆུང་ནས་ཁོང་གི་སྤྱི་ཁྱབ་དྲུང་ཆེ་དང་ཐད་ཀར་འབྲེལ་གཏུགས་གནང་ན་འགྲིག་རྒྱུ་ཡིན་སྐོར་གསུངས་ཡོད་པ་རེད།