སྦག་སྦག་སྐོར་བསྐྱོད།

༄༅། །ཟླ་བ་འདིའི་ཚེས་ ༢ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་གྲོང་བརྒྱད་པའི་ན་གཞོན་ཁག་ཅིག་གིས་མ་སྐུལ་དང་བླངས་ཐོག་ནས་བོད་དོན་ཆེད་སྦག་སྦག་སྐོར་བསྐྱོད་ཀྱི་ལས་གཞི་གཞི་རྒྱ་ཆེ་བ་ཞིག་སྤེལ་ཡོད་པ་ལྟར།    ཁོང་རྣམ་པས་ཉིན་གྲངས་༡༢ཙམ་གྱི་རིང་སྤེལ་བའི་ལས་འགུལ་དེ་ཕྱི་ཚེས་ཚེས་ ༡༤ ཉིན་རེ་ཞིག་མཇུག་སྒྲིལ་གནང་འདུག
བོད་རིགས་གཞོན་སྐྱེས་རྣམས་ནས་ད་རེས་རྒྱ་གར་གྱི་མ་ཧཱ་རཱཤ་ཏྲ་མངའ་སྡེའི་གྲོང་ཁྱེར་ཆེ་ཁག་༡༥ཙམ་གྱི་ནང་སྐོར་བསྐྱོད་གནང་སྟེ། བོད་ནང་གི་ཛ་དྲག་གནས་སྟངས་སྐོར་མ་རཱ་ཏི་དང་ཨིན་ཡིག་སོགས་སྐད་ཡིག་འདྲ་མིན་ནང་བྲིས་པའི་སྦྱར་ཡིག་དང་ཡིག་ཆ་འགྲེམས་སྤེལ། དེ་བཞིན་མང་ཚོགས་ལ་གོ་རྟོགས་སྤེལ་ཡོད་པས་མ་ཟད། གསར་འགོད་གསལ་བསྒྲགས་སོགས་རྒྱ་གར་མང་ཚོགས་ཁྲོད་བོད་དོན་སྤྱི་དང་། ལྷག་པར་ཕྱི་ལོ་ ༢༠༠༩ ནས་ད་བར་བོད་མི་བརྒྱ་ལྷག་གིས་བསྟུད་མར་རང་ལུས་མེར་སྲེག་བཏང་སྟེ། རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱས་པ་སོགས་དེང་སྐབས་གནས་སྟངས་ཧ་ཅང་ཛ་དྲག་ཅན་དུ་གྱུར་བར་བརྟེན། བོད་མི་ཚོར་རྒྱབ་སྐྱོར་སྔར་བས་ཤུགས་ཆེ་རུ་ཡོང་ཆེད་འབོད་སྐུལ་ཞུས་ཡོད་པ་རེད།།