སྦང་ལ་རྡེ་ཤི་ནང་འབར་མའི་ཁ་ཆེའི་སྐྱབས་བཅོལ་མི་རིགས་སྐོར།

༄༅༎སྦང་ལ་རྡེ་ཤི་ཡུལ་གྱིས་འབར་མའི་ཁ་ཆེའི་རོ་ཧིན་གྱ་སྐྱབས་བཅོལ་མི་རིགས་ཐོག་རྡུང་རྡེག་བཏང་ཡོད་པ་ཕིརན་སིའི་རྒྱལ་མཚམས་མེད་པའི་སྨན་པ་ཞེས་པའི་ཚོགས་པ་དེས་གསུངས་ཡོད་པ་རེད་ འཛམ་གླིང་མཉམ་འབྲེལ་རྒྱལ་ཚོགས་ཀྱིས་འཛམ་གླིང་ནང་དྲག་གནོན་ཆེ་ཤོས་ཕོག་པའི་གྲངས་ཉུང་མི་རིགས་ཤིག་ལ་ངོས་འཛིན་གནང་བའི་ཁ་ཆེའི་རོ་ཧིན་གྱ་མི་རིགས་སྟོང་ཕྲག་མང་པོ་ཞིག་ལོ་ལྟར་འབར་མའི་ཡུལ་ནས་སྦང་ལ་རྡེ་ཤི་ནང་བྲོས་བྱོལ་དུ་ཡོང་གི་ཡོད་པ་རེད་

རྒྱལ་སྤྱིའི་རྒྱལ་མཚམས་མེད་པའི་སྨན་པའི་ཚོགས་པ་Medecins Sans Frontieresཞེས་པའི་ཚོགས་པ་དེས་གོང་ཞུས་རོ་ཧིང་གྱ་ སྐྱབས་བཅོལ་བ་གྲངས་༢༢༠༠༠༠སྐོར་ཞིག་སྐྱབས་བཅོལ་བ་ཡིན་པའི་དེབ་སྐྱེལ་བྱས་མེད་ལྟབས་ཁོང་ཚོར་སྦང་ལ་རྡེ་ཤི་སྲུང་སྐྱོབ་མི་སྣས་དྲག་གནོན་དང་མང་པོ་ཞིག་ལས་ཀ་བྱེད་མི་ཆོག་པ་མ་ཟད་སྐྱབས་བཅོལ་བའི་འཚོ་སྣོན་ཡང་ཐོབ་ཐང་མེད་སྟབས་ལྟོགས་ཤི་ཐེབས་པའི་ཉེན་ཁ་ཡོད་སྐོར་གསུང་འདུག གོང་ཞུས་རྒྱལ་སྤྱིའི་སྨན་པའི་ཚོགས་པ་དེས་སྐྱབས་བཅོལ་བ་དེ་དག་ཐོག་དྲག་གནོན་ཕོག་པའི་དབང་གིས་ཁོང་ཚོ་མང་པོ་ཞིག་རང་དབང་མེད་པར་སྐྱབས་བཅོལ་བའི་སྡོད་གནས་ནས་བྲོས་བྱོལ་དུ་འགྲོ་དགོས་ཆགས་ཡོད་སྐོར་གསུང་འདུག            སྦང་ལ་རྡེ་ཤི་ཡུལ་གྱིས་རོ་ཧིང་གྱ་སྐྱབས་བཅོལ་བ་གྲངས་༢༨༠༠༠ལས་ཁས་ལེན་གནང་གི་མེད་ཅིང་གྲངས་འབོར་དེ་ནི་སྐྱབས་བཅོལ་བ་གྲངས་ ༢༢༠༠༠༠སྐོར་ཞིག་ཡོད་པའི་ཁོངས་ནས་ཟུར་ཆ་གཅིག་ལས་ཆགས་ཀྱི་མེད་པ་རེད་ བདུན་སྔོན་མ་དེར་ཡོ་རོབ་སྤྱི་མཐུན་གྱིས་སྦང་ལ་རྡེ་ཤི་གཞུང་ཕྱོགས་ནས་གོང་ཞུས་འབར་མའི་ཁ་ཆེའི་སྐྱབས་བཅོལ་བ་དེ་དག་སྐྱབས་བཅོལ་བ་ཡིན་པའི་ངོས་ལེན་དང་ཁོང་ཚོར་སྐྱོབས་གསོའི་རོགས་རམ་གནང་དགོས་པའི་གྲོས་ཆོད་ཅིག་བཞག་གནང་བའི་གནས་ཚུལ་ཐོན་འདུག