འབར་མའི་ནང་འབྱུང་བའི་གོད་ཆགས་ངལ་སེལ་ལ་དཀའ་ངལ་འཕྲད་སྐོར།

༄༅༎ཁ་སྔོན་ཕྱི་ཟླ་ལྔ་པའི་ནང་འབར་མའི་ནང་ཆར་རླུང་དྲག་པོ་དང་ཆུ་ལོག་གི་གནོད་འཚེ་ཚབས་ཆེ་བྱུང་བའི་རྗེས་ད་ཆ་འབར་མའི་རོགས་རམ་ལས་ཁུངས་ཁག་ལ་གོད་ཆགས་ཕོག་པའི་མི་དམངས་ཚོར་ཟ་བཅའ་དང་འཕྲལ་སེལ་སྡོད་གནས་ཀྱི་མཐུན་རྐྱེན་མཁོ་སྤྲོད་འདེངས་ངེས་བྱེད་མི་ཐུབ་པའི་དཀའ་ངལ་འཕྲད་བཞིན་ཡོད་པ་རེད།

དེ་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་རོགས་རམ་ལྷན་ཁང་གི་འབྲེལ་མཐུད་གནང་མཁན་ ཨེ་མེན་ཌ་ ཡིས་ ཐའེ་ལཱེན་གྱི་རྒྱལ་ས་སྦེང་ཀོག་ཏུ་གསར་འགོད་པར། འབར་མའི་ནང་དྲག་ཆར་རླུང་འཚུབ་ཀྱི་གནོད་འཚེ་ཕོག་པར་ཚོར་ཆར་ཆུ་བཀག་ཐུབ་པའི་ཏིར་པར་ས་ཡ་ཕྱེད་ཀ་དང་ཟ་བཅའི་རོགས་རམ་ཛ་དྲག་གི་དགོས་གལ་ཡིན་ཞིང། དེའི་ནང་ནས་ཟ་བཅའ་རོགས་རམ་ཐད་ཧ་ཅང་གི་འདེངས་ངེས་མེད་པའི་དཀའ་ངལ་ཆེན་པོར་ལྷུང་བཞིན་ཡོད་པའི་ཐོག་ཁ་སྔོན་ཕྱི་ཟླ་ལྔ་པའི་ཚེས་༡༢ ཉིན་རྒྱ་ནག་གི་ཟི་ཁྲོན་ཞིང་ཆེན་ནས་ས་ཡོམ་གོད་ཆགས་ཚབས་ཆེ་བྱུང་བ་དེས་འབར་མའི་ནང་སྡོད་གུར་དང་ཆར་ཆུ་བཀག་ཐུབ་པའི་ཏིར་པར་སོགས་རོགས་རམ་མཁོ་སྤྲོད་བྱ་རྒྱུར་འགོག་རྐྱེན་དུ་གྱུར་ཡོད་པའི་སྐོར་གསུང་ཡོད་པ་རེད། དེ་བཞིན་རྒྱལ་སྤྱིའི་རྒྱ་འགྲམ་དམར་པོའི་རོགས་རམ་ཚོགས་པའི་མགྲིན་ཚབ་པ་ཞིག་གིས་གསུང་ན། འབར་མའི་ནང་གནོད་འཚེ་ཕོག་པའི་མི་དམངས་ས་ཡ་གཉིས་ལྷག་ནང་ནས་བརྒྱ་ཆ་༢༢ མ་གཏོགས་ཕྱི་རྒྱལ་གྱི་རོགས་རམ་ཚོགས་པའི་འཕྲལ་སེལ་སྡོད་གནས་ཀྱི་རོགས་རམ་ཐོབ་ཀྱི་མེད་པ་དང་ད་ལྟ་བར་རྒྱལ་སྤྱིའི་རྒྱ་འགྲམ་དམར་པོའི་ངོས་ནས་མི་དམངས་ཆིག་འབུམ་ཆིག་ཁྲི་ཙམ་ལ་འཕྲལ་སེལ་སྡོད་གནས་གོ་སྒྲིག་བྱས་ཡོད་ཀྱང་ད་དུང་མི་དམངས་གསུམ་འབུམ་བཞི་ཁྲི་ཙམ་ལ་འཕྲལ་སེལ་སྡོད་གནས་གོ་སྒྲིག་གི་རོགས་རམ་དགོས་གལ་ཆེ་བའི་སྐོར་གསུང་ཡོད་པ་རེད།