འབར་མའི་དྲག་པོའི་གཞུང་གི་དམག་དཔོན་དགོངས་ཞུ་བྱས།

༄༅༎འབར་མའི་དྲག་པོའི་གཞུང་གི་དམག་དཔོན་ཐན་ཤ་ལྦེ་ཡུལ་གྱི་འགོ་འཁྲིད་ཀྱི་གོ་གནས་ལོ་ངོ་༢༠ཙམ་ཞིག་ཟིན་པའི་རྗེས་ལས་གནས་ནས་དགོངས་ཞུ་བྱས་ནས་དབང་ཆ་ཡུལ་གྱི་གཞུང་གསར་པར་རྩིས་སྤྲོད་བྱས་ཡོད་པ་རེད་

དམག་སྤྱི་ཐན་ཤ་ལྦེ་ཡིས་བདུན་སྔོན་མ་དེར་ཡུལ་གྱི་དྲག་པོའི་གཞུང་དེ་ཕྱིར་བཤོལ་བྱས་ནས་སྔ་ལོ་ཕྱི་ཟླ་༡༡ནང་འོས་བསྡུ་བྱས་པའི་གཞུང་གསར་པ་དེར་རྩིས་སྤྲོད་བྱས་ཡོད་པ་རེད་ འབར་མའི་གཞུང་གསར་པའི་དཔོན་རིགས་ཤིག་གིས་དམག་སྤྱི་ཐན་ཤ་ལྦེ་དང་དམག་སྤྱི་གཞོན་པ་མོང་ཨའེ་གཉིས་ཕྱི་ཟླ་༣པའི་ཚེས་༣༠ཉིན་གཞུང་གི་ལས་གནས་ནས་དགོངས་ཞུ་གནང་ནས་དབང་ཆ་ཡུལ་གྱི་གཞུང་གསར་པར་རྩིས་སྤྲོད་བྱས་པའི་རྗེས་རྒས་ཡོལ་གྱི་གནས་བབ་འོག་ཡོད་པ་དང་ཁོང་གཉིས་ཡུལ་གྱི་རྒྱལ་ས་གསར་པ་ནེ་པི་ཌོ་ནང་གནས་སྡོདགནང་གི་ཡོད་པ་དང་ཁོང་གཉིས་ཀྱི་མ་འོང་པའི་ལས་འཆར་ཇི་ཡིན་ཤེས་རྟོག་མེད་སྐོར་བརྗོད་འདུག

ཡང་འབར་མའི་གཞུང་གི་ལས་བྱེད་པ་གཞན་ཞིག་གིས་དམག་དཔོན་གཉིས་རྒས་ཡོལ་གྱི་གནས་བབས་འོག་ཡོད་ནའང་སྐབས་འགར་ཁོང་གཉིས་ཀྱིས་གཞུང་གསར་པར་སློབ་སྟོན་འབུལ་གནང་གི་རེད་ཅེས་གསུང་འདུག དམག་སྤྱི་ཐན་ཤ་ལྦེ་ཡི་ཉེ་འབྲེལ་དང་སྲིད་བློན་ཟུར་པ་ཐེ་ཨིན་སེན་གྱིས་བདུན་སྔོན་མའི་རེས་གཟའ་ལྷག་པ་ཉིན་ཡུལ་གྱི་གཞུང་གསར་པའི་སྲིད་འཛིན་གྱི་ལས་གནས་འཛིན་ཡོད་པ་རེད་            ཁོང་ནི་དེ་སྔོན་དམག་དཔོན་ཞིག་ཡིན་པ་དང་སྔ་ལོ་ཕྱི་ཟླ་༡༡ནང་ཡུལ་གྱི་རྒྱལ་ཡོངས་ཀྱི་འོས་བསྡུའི་ནང་དམག་དཔོན་མང་པོ་ཞིག་འོས་བསྡུའི་ནང་འཛུལ་ཞུགས་བྱེད་མཁན་ཁོངས་ནས་གཅིག་ཡིན་པ་རེད་ ཡུལ་གྱི་གཞུང་གསར་པའི་ནང་ཁོང་འདྲ་བའི་དམག་དཔོན་མང་པོ་ཡོད་པ་མ་ཟད་མང་པོ་ཞིག་དེ་སྔའི་དྲག་པོའི་གཞུང་དང་འབྲེལ་བ་ཡོད་པ་ཤ་སྟག་ཡིན་པ་རེད་ ཡུལ་གྱི་རྒྱལ་ཡོངས་འོས་བསྡུ་དེར་དམངས་གཙོའི་དབུ་འཁྲིད་དང་ནོ་སྦེལ་ཞི་བདེའི་གཟེངས་རྟགས་ཐོབ་གནང་མཁན་ལྕམ་ཨང་སན་སུ་ཆི་མཆོག་གི་དམངས་གཙོ་མནའ་འབྲེལ་ཚོགས་པ་འོས་བསྡུ་དེ་དྲང་བདེན་ཡོང་བཟོ་མེད་པའི་སྐྱོན་བརྗོད་འོག་ཞུགས་གནང་མེད་པ་རེད་