བོད་ནང་དྲ་ལམ་བཀག་འགོག།

༄༅༎བོད་མིའི་རང་དབང་སྒེར་ལངས་སུམ་ཅུའི་དུས་དྲན་རན་ལ་ཉེ་བ་དང་རྒྱ་ནག་ནང་མི་མང་འཐུས་མི་ཚོགས་ཆེན་ཚུགས་བཞིན་པའི་སྐབས་དང་བསྟུན་ རྒྱ་ནག་གཞུང་གིས་བོད་ཀྱི་ས་ཁུལ་ཁག་ལ་ཆ་འཕྲིན་དྲ་ལམ་ཡོངས་རྫོགས་བཀག་འགོག་བྱས་ཏེ། ཕྱི་ནང་གནས་ཚུལ་ལྟ་ཀློག་བྱ་ས་མེད་པར་བཟོ་བཞིན་ཡོད་པ་རེད།
གནས་ཚུལ་ཡོང་ཁུངས་ལ་གཞིགས་ན། མདོ་སྨད་ཀན་ལྷོ་དང་། མཚོ་སྔོན། ཟི་ཁྲིན་སོགས་བོད་མི་གནས་སྡོད་བྱ་ཡུལ་གྱི་ས་ཁུལ་མང་ཆེ་བའི་ནང་ཆ་འཕྲིན་དྲ་ལམ་ཡོངས་རྫོགས་བཀག་འགོག་བྱས་ཡོད་པ་དང་། ད་ཆ་འདིས་རྐྱེན་པས་གོང་ཞུས་ས་ཁུལ་ཁག་ནང་ཡོད་པའི་བོད་རིགས་སློབ་མ་རྣམས་ལ་མཐོ་རིམ་སློབ་གྲྭའི་ཡིག་རྒྱུགས་ཆེན་མོར་ཐོ་འགོད་བྱ་དགོས་པའི་སྐབས་དེར། དྲ་རྒྱའི་ཐོག་ཡིག་རྒྱུགས་ཐོ་འགོད་བྱ་རྒྱུར་དཀའ་ངལ་འཕྲད་ཀྱི་ཡོད་པའི་སྐོར། བོད་ནས་འབྲེལ་ཡོད་མི་སྣ་ཁག་གིས་གནས་ཚུལ་ངོ་སྤྲོད་གནང་ཡོད་པ་རེད།
གནས་ཚུལ་ངོ་སྤྲོད་གནང་མཁན་ཁག་གིས་གསུངས་ན། གནད་དོན་འདི་ཐད་ད་ལྟ་བོད་རིགས་སློབ་མ་མང་པོ་སེམས་ཁྲལ་ཆེན་པོ་བྱེད་བཞིན་ཡོད་པ་དང་། གནད་དོན་འདི་གང་མགྱོགས་ཐག་གཅོད་མ་བྱུང་ཚེ་བོད་རིགས་སློབ་མ་མང་པོ་ཡིག་རྒྱུགས་ནང་འཛུལ་ཞུགས་མ་ཐུབ་པའི་དཀའ་རྙོག་ཆེན་པོ་ཞིག་ཆགས་རྒྱུའི་ཉེན་ཁ་ཡོད་པ་གསུངས་ཡོད་པ་རེད༎