རྒྱ་ནག་གཞུང་གིས་ལྷ་ས་ཁུལ་དུ་ལོ་སར་སྔ་རྗེས་སུ་ཆོས་ཕྱོགས་ཀྱི་བྱེད་སྒོ་ཆེ་གྲས་ཁག་མཚམས་འཇོག་དགོས་པའི་བཀའ་རྒྱ་བཏང་འདུག

རྒྱ་ནག་གཞུང་གིས་ཉེ་ལམ་སྤྱི་ཟླ་༢པའི་ཚེས་༢༢ཉིན་བོད་ཀྱི་རྒྱལ་ས་ལྷ་ས་ཁུལ་དུ། འབྲས་སྤུངས་དགོན་པ་དང་སེ་ར་དགོན་པ། གཙུག་ལག་ཁང་དང་ར་མོ་ཆེ། རྭ་སྒྲེང་དགོན་པ།ཤར་འབུམ་པ། སེང་གླིང་དགོན་དང་དྭགས་པོ་གྲྭ་ཚང་། ལྷ་ས་གྲོང་ཁྱེར་ནང་བསྟན་མཐུན་ཚོགས་བཅས་ཀྱི་མིང་ཐོག་ནས་བཀའ་རྒྱ་བཏང་སྟེ། བོད་ཀྱི་ལོ་གསར་སྔ་རྗེས་སུ་ཆོས་ལུགས་བྱེད་སྒོ་ཆེ་གྲས་ཁག་གནས་སྐབས་རིང་མཚམས་འཇོག་བྱས་ནས། རིམས་ནད་སྔོན་འགོག་ཚོད་འཛིན་ལས་དོན་ལ་ཤུགས་སྣོན་རྒྱག་རྒྱུའི་གྲོས་འདོན་ཡི་གེ་ཟེར་བ་ཞིག་བཀྲམས་ཡོད་ཅིང་། དེའི་ནང་ལོ་གཅིག་དུས་གཅིག་གི་སེ་ར་ཕུར་མཇལ་དང་གཙུག་ལག་ཁང་དང་ར་མོ་ཆེའི་ལོ་སར་ཚེས་གཅིག་གི་མཆོད་མཇལ། འབྲས་སྤུངས་གནས་ཆུང་ལྷ་གསོལ་དང་དྭགས་པོ་གྲྭ་ཚང་གི་བཅོ་ལྔ་མཆོད་པ།ལྷུན་གྲུབ་རྫོང་གི་རྭ་སྒྲེང་བྱ་ཟླ་མཆོད་པ། ཤར་འབུམ་པའི་བཅོ་ལྔའི་དུས་ཆེན་དང་། སེང་གླིང་དར་ཆེན་སྐུ་བཞེངས་བཅས་ཆོས་ལུགས་བྱེད་སྒོ་ཆེ་གྲས་ཁག་འཆར་ལ་ཉེ་བ་ཡིན་ནའང་། ཆོས་ལུགས་བྱེད་སྒོ་ཆེ་གྲས་དེ་ཚོ་གནས་སྐབས་རིང་ཕྱི་ཕྱོགས་ལ་སྒོ་འབྱེད་མཚམས་འཇོག་རྒྱུ་ཡིན་པ་འཁོད་ཡོད་ཅིང་། ཡིག་ཆ་མཁོ་སྤྲོད་གནང་མཁན་ཆབ་སྲིད་བཙོན་ཟུར་ངག་དབང་འོད་འབར་ལགས་ནས། རྒྱ་ནག་གཞུང་གིས་ཏོག་དབྱིབས་རིམས་ནད་ལ་ཁ་གཡར་བ་ཙམ་མ་གཏོགས། སྤྱི་ལོ་༢༠༢༡ལོའི་ལོ་སར་སྐབས་ཀྱང་སྐད་ཆ་དེ་གཅིག་མཚུངས་སུ་བཤད་ཡོད་པས། དོན་གྱིས་བོད་མི་འདུ་འཛོམས་བཀག་འགོག་དམ་དྲག་ཆེད་ཡིན་པ་འགྲེལ་བརྗོད་གནང་གི་འདུག