ཨ་རིའི་གྲོས་ཚོགས་ནང་སྔོན་རྩིས་འཆར་གཞིའི་གནད་དོན།

༄༅༎ཨ་རིའི་གྲོས་ཚོགས་ནང་སྔོན་རྩིས་འཆར་གཞིའི་གནད་དོན་ཐོག་ཚོགས་པ་གཉིས་དབར་གྲོས་མོལ་མཇུག་སྒྲིལ་རྒྱུའི་དུས་བཀག་ལ་སླེབས་ནས་ཨ་རིའི་གཞུང་གི་ལས་ཁང་གནས་སྐབས་སྒོ་རྒྱབ་སྲིད་པའི་གནས་སྟངས་ཆགས་ཡོད་པ་རེད་ ཨ་རིའི་སྲདི་འཛིན་སྦ་རཀ་ཨོ་བ་མ་མཆོག་གིས་གསུང་ན་ ཁོང་གིས་ཚོད་རྩིས་ལྟར་ན་ གྲོས་ཚོགས་ནང་དམངས་གཙོ་ཚོགས་པ་དང་སྤྱི་མཐུན་ཚོགས་པའི་གྲོས་ཚོགས་འཐུས་མིའི་དབར་གཟའ་པ་སངས་སྔ་དྲོ་སྲིད་གཞུང་གིས་སྔོན་རྩིས་འཆར་གཞིའི་ཐོག་གྲོས་མཐུན་མ་བྱུང་ཚེ་ སྲིད་གཞུང་གི་ལས་ཁང་ཁག་ཅིག་ཨ་རིའི་རྒྱལ་ས་ལྦ་ཤིན་ཀྲོན་གྱི་དུས་ཚོད་གཟའ་པ་སངས་ཀྱི་དགོངས་མོ་ནས་སྒོ་རྒྱབ་རྒྱུ་ཡིན་པ་གསུང་འདུག 

གཟའ་ཕུར་བུའི་ཕྱི་དྲོ་སྲིད་འཛིན་ཨའོ་བ་མ་མཆོག་གིས་དམངས་གཙོ་ཚོགས་པ་དང་སྤྱི་མཐུན་ཚོགས་པའི་གྲོས་ཚོགས་གོང་མའི་ཚོགས་གཙོ་རྣམ་གཉིས་དང་ཐུག་འཕྲད་གནང་སྟེ་ དེང་སྐབས་ཨ་རི་གཞུང་གི་སྔོན་རྩིས་འཆར་གཞིའི་གནད་དོན་ཐོག་གྲོས་ཚོགས་ནང་ཚོགས་པ་གཉིས་དབར་བསམ་ཚུལ་མི་མཐུན་པར་བརྟེན་ནས་གྲོས་མཐུན་མ་བྱུང་བའི་དཀའ་གནད་དེ་སེལ་ཐབས་གནང་ཡོད་པ་དང་ ཚོགས་པ་གཉིས་དབར་མི་མཐུན་པའི་སྔོན་རྩིས་འཆར་གཞི་ནང་གི་གཙོ་གནད་དེ་བཞིན་ད་ལོ་ཕྱི་ཟླ་དགུ་པའི་ནང་མཇུག་སྒྲིལ་རྒྱུའི་ལོ་རེའི་ཨ་རིའི་དབུས་གཞུང་གི་སྔོན་རྩིས་འགྲོ་གྲོན་འཆར་གཞིའི་ཐོག་བསམ་ཚུལ་གཅིག་མཚུངས་ཡོང་གི་མེད་པ་རེད་ སྲིད་འཛིན་ཨོ་བ་མ་ཡིས་ཚོགས་པ་གཉིས་ཀྱི་དབུ་ཁྲིད་དང་ཐུག་འཕྲད་གནང་བའི་རྗེས་གསར་འགོད་པར་འགྲེལ་བརྗོད་གནང་དོན་ལ་ ཚོགས་པ་གཉིས་དབར་བསམ་ཚུལ་མཐུན་ཐབས་ཆེད་འབད་བརྩོན་བྱས་ཏེ་འབྲས་བུ་གང་ཙམ་ཐོན་བཞིན་ཡོད་པ་དང་ མཐར་གྲོས་མཐུན་མ་བྱུང་བར་སྲིད་གཞུང་སྒོ་རྒྱབ་དགོས་བྱུང་བའི་གནས་སྟངས་མི་ཆགས་རྒྱུའི་ཐུགས་རེ་ཡོད་པ་གསུང་འདུག གལ་སྲིད་གྲོས་ཚོགས་ནང་ཚོགས་པ་གཉིས་དབར་བསམ་ཚུལ་གཅིག་མཚུངས་མ་བྱུང་བར་ སྲིད་གཞུང་གི་སྔོན་རྩིས་འཆར་གཞིའི་ཐོག་གྲོས་མཐུན་མ་བྱུང་ཚེ་ ཨ་རིའི་དབུས་གཞུང་གི་ལས་ཁང་ཁག་ནང་ལས་ཀ་བྱེད་མཁན་གྱི་ལས་བྱེད་ཁྲི་ཁ་ཤས་ཐབས་མེད་པར་གླ་མེད་ཀྱིས་ངལ་གསོ་རྒྱབ་རྒྱུའི་གནས་སྟངས་ཆགས་རྒྱུ་ཡིན་པ་དང་ སྲིད་གཞུང་གི་ཞབས་ཞུའི་ལས་རིགས་རྣམས་མཚམས་འཇོག་བྱ་རྒྱུ་མ་ཟད་ དམག་དཔུང་གི་དམག་དོན་འགྲོ་གྲོན་ཡང་རེ་ཞིག་སྤྲོད་མཚམས་འཇོག་རྒྱུ་ཡིན་པས་ གནས་སྟངས་དེ་ལྟར་ཆགས་ཚེ་ དེའི་མཇུག་འབྲས་ཀྱིས་ཨ་རིའི་དཔལ་འབྱོར་སླར་གསོའི་ལས་དོན་ལ་གནོད་ཚབས་ཆེན་པོ་ཡོང་རྒྱུ་ཡིན་པ་སྲིད་འཛིན་གྱིས་གསུང་འདུག