༧གོང་ས་མཆོག་སེམས་དང་སྲོག་གི་ལྷན་ཚོགས་ལ་དབུ་བཞུགས།

ཐེངས་འདིའི་ལྷན་ཚོགས་ཀྱི་བརྗོད་གཞི་གཙོ་བོ་ནི། སྒོམ་སྒྲུབ་ཉམས་ལེན་དང་ལུས་པོའི་འཕྲོད་བསྟེན་དབར་གྱི་འབྲེལ་བ་གཞིར་བཞག་ཐོག་ཚན་རིག་པའི་ཚོད་བལྟ་ཁང་གི་ནང་དཔྱད་པ་བྱས་པའི་མཐར་གྲུབ་འབྲས་ཇི་བྱུང་དང་། མི་ཚེའི་ནང་དངོས་སུ་ཉམས་མྱོང་གང་བྱུང་བའི་སྐོར་བགྲོ་གླེང་གནང་རྒྱུ་ཡིན་འདུག། ཕྱི་ཚེས་༢༠་ཉིན་སེམས་དང་སྲོག་ཀྱི་བགྲོ་གླེང་ལྷན་ཚོགས་དེ་བཞིན་རོཀ་ཕེ་ལར་གཙུག་ལག་སློབ་གྲྭའི་ (Rockefeller University) ཀ་སི་པ་རེའི་ཚོགས་ཁང་དུ་ཚོགས་ཡོད་པ་དང་། གཙུག་ལག་སློབ་གྲྭ་འདི་ནི་སྐྱེ་ལྡན་སྨན་ལུགས་དང། དངོས་ཁམས་ཚན་རིག་ཐོག་ཉམས་ཞིབ་བྱ་ཡུལ་འཛམ་གླིང་ནང་སྙན་གྲགས་ཡོད་པ་ཞིག་ཡིན་པ་རེད།

དེ་ཉིན་སྔ་དྲོའི་ཚོགས་ཐུན་དང་པོར་༧གོང་ས་མཆོག་ཆིབས་སྒྱུར་བསྐྱངས་ཏེ་ཚོགས་ཁང་ནང་ཡོད་པའི་ཆོས་གྲོགས་རྙིང་པ་རྣམས་ལ་འཚམས་འདྲི་ཞུས་གནང་བཞག།

གཞན་ཡང་ལྕམ་སྐུ་Anne Harrington ལགས་ཀྱིས་༧གོང་ས་མཆོག་སྐྱབས་མགོན་ཆེན་པོ་མཆོག་ལ་  ནད་པ་འཆི་ཁར་ཡོད་པ་རྣམས་ལ་འབྲེལ་བ་ཇི་ལྟར་བྱེད་དགོས་མིན་བཀའ་འདྲི་ཞུས་པར་   ༧གོང་ས་སྐྱབས་མགོན་ཆེན་པོ་མཆོག་གིས་ འཆི་བ་ནི་མི་ཚེའི་ཆ་ཤས་ཤིག་ཡིན། སྐྱེ་བའི་མཐའ་མ་འཆི་རྒྱུ་ཡིན། དེར་བརྟེན་ང་ཚོས་ཆེད་མངགས་འཆི་བའི་སྐོར་བསམ་བློ་གཏོང་ཐུབ་པ་ཡིན་ན། རང་ཉིད་འཆི་ཁར་དེ་ཙམ་དངངས་སྐྲག་ཡོང་གི་མ་རེད། ངོས་ཀྱིས་ཉིན་རེའི་ཉམས་ལེན་ནང་འཆི་བ་དང་བར་དོ། སྐྱེ་བ་སོགས་ལ་ཐེངས་འགའ་ཤས་བསམ་བློ་གཏོང་བཞིན་ཡོད། འཆི་བ་ལ་གོམས་འདྲིས་བསྟེན་རྒྱུ་གལ་ཆེན་པོ་ཡིན། ཕྱོགས་མཚུངས་རང་ཉིད་འཚོ་བའི་རིང་མི་ཚེ་དོན་དང་ལྡན་པ་ཞིག་བསྐྱལ་ཐུབ་པ་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་བཀའ་ལན་གནང་འདུག