བློ་སྦྱོང་བྱེད་སྟངས་ལ་སློབ་སྦྱོང་བྱ་དགོས།

༄༅།    །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ར་ཝང་ལ་ཁུལ་དུ་ཡོད་པའི་ཏ་ཐཱ་ག་ཏ་ཚལ་ནང་འབྲས་ལྗོངས་མངའ་སྡེ་གཞུང་གིས་སྟོན་པའི་སྣང་བརྙན་སྐུ་ཚད་ཧྥི་ཊི་ ༡༣༥ ཙམ་ཡོད་པ་ཞིག་གསར་བཞེངས་ཞུས་པ་དེར་རབ་གནས་དང་འབྲེལ་བཀའ་སློབ་སྩལ་གནང་མཛད་སྐབས།  ནང་ཆོས་དང་འབྲེལ་བའི་རིག་གཞུང་དེས་མིའི་སེམས་ལ་དཀའ་ངལ་འཕྲད་སྐབས་དཀའ་ངལ་སེལ་རྒྱུར་ཕན་ཐོགས་ཡོད་པའི་གནས་ཚུལ་ཤེས་ན། སངས་རྒྱས་པའི་ཆོས་དང་འབྲེལ་བའི་རིག་གཞུང་དེ་མི་ཚེའི་ནང་ཕན་ཐོགས་འདུག་བསམ་པ་ལྟ་བུ་ཡོང་གི་རེད། དེར་བརྟེན་རིག་གཞུང་ཞེས་སེམས་ནང་གི་ཡོན་ཏན་ཉར་ཚགས་བྱེད་སྟངས་དེ་རྒྱུ་མཚན་དང་དགོས་པ་མཐོང་བའི་སྒོ་ནས་བདག་གཅེས་བྱ་རྒྱུ་ཞིག་བྱུང་ན་ཕན་ཐོགས་ཡོང་གི་རེད། ཅེས་བཀའ་གནང་འདུག    ༧གོང་ས་མཆོག་གིས་ད་དུང་།    བཀའ་འགྱུར་བསྟན་འགྱུར་ལ་སོགས་པའི་ནང་བློ་སྦྱོང་བྱེད་སྟངས་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་གནང་ཡོད་པ་རེད།
ཐེངས་འདིའི་དབུ་འབྱེད་མཛད་སྒོར་འབྲས་ལྗོངས་མངའ་སྡེའི་སྲིད་སྐྱོང་མཆོག་དང་མངའ་སྡེའི་སྤྱི་ཁྱབ་བློན་ཆེན།    གྲོས་ཚོགས་ཀྱི་ཚོགས་གཙོ་བགྲེས་གཞོན་རྣམས་གཉིས། མངའ་སྡེའི་བློན་ཆེན་ཁག་དང་།    གཞུང་ཞབས་གནད་ཡོད་ཁག དད་ལྡན་མང་ཚོགས་ཁྲི་ཚོ་བརྒལ་བ་བཅར་འདུག    དེ་ནས་ཕྱེད་ཡོལ་ཕྱག་ཚོད་ ༡།༣༠ ཐོག་མགོན་པོ་གང་ཉིད་མཆོག་གིས་ར་ཝང་ལ་ཁུལ་དང་། འབྲུག འབྲས་ལྗོངས་ཀྱི་མངའ་སྡེ་ཁག ཀ་ལོན་སྦུག རྡོ་གླིང་སོགས་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་ ༡༠༠༠༠ བརྒལ་བར་རྒྱལ་སྲས་ལག་ལེན་སོ་བདུན་མའི་བཀའ་ཆོས་བསྩལ་གནང་མཛད་ཡོད་པ་དང༌། དེ་རིང་སྒྲོལ་དཀར་ཡིད་བཞིན་འཁོར་ལོའི་བཀའ་དབང་གནང་ཡོད་པ་རེད།།