རང་རྒྱལ་གཞན་ཕམ་གྱི་རྗེས་ལུས་ཅན་གྱི་བསམ་བློ་དོར་དགོས། ༧གོང་ས་མཆོག་གིས།

༧གོང་ས་མཆོག་སྐྱབས་མགོན་ཆེན་པོ་མཆོག་གིས་ཉི་ཧོང་ནང་ཆོས་འབྲེལ་དབུ་འཛུགས་མཛད་སྐབས་སེམས་ཀྱི་ཞི་བདེ་བསྐྲུན་པར་རང་རྒྱལ་གཞན་ཕམ་གྱི་རྗེས་ལུས་ཅན་གྱི་བསམ་བློ་དོར་དགོས་པ་བཀའ་སྩལ་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཕྱི་ཟླ་ ༡༡ ཚེས་༡༤་ཉིན་ཉི་ཧོང་གི་ཡོ་ཀོ་ཧ་མའི་གྲོང་ཁྱེར་ནང་། དད་ལྡན་མི་མང་༥༠༠༠་ལྷག་ལ་ཤེས་རབ་སྙིང་པོ་དང་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པ་བཅས་ཉིན་གསུམ་རིང་གི་གསུང་ཆོས་དབུ་འཛུགས་མཛད་འདུག
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གསུང་ཆོས་དངོས་གཞི་དབུ་འཛུགས་མ་གནང་གོང་ནང་ཆོས་ངོ་སྤྲོད་གནང་སྐབས།  ༧གོང་ས་མཆོག་གི་ཐུགས་བསྐྱེད་དམ་བཅའ་གསུམ་ཏེ། བྱམས་བརྩེ་ལ་སོགས་པ་འགྲོ་བ་མིའི་རིན་ཐང་དང་ཆོས་ལུགས་མཐུན་བསྒྲིལ་གོང་འཕེལ་གཏོང་ཐབས།  དེ་བཞིན་བོད་ཀྱི་ཁོར་ཡུག་དང་ཐོུང་མ་ཡིན་པའི་རིག་གཞུང་སྲུང་སྐྱོབ་དང་དར་སྤེལ་གཏོང་ཐབས་མཛད་རྒྱུ་སོགས་ངོ་སྤྲོད་གནང་ཞིང་།  ༧གོང་ས་༧སྐྱབས་མགོན་ཆེན་པོ་མཆོག་དཔལ་ལེཎྜའི་གཞུང་ལུགས་མདོ་སྡགས་གཉིས་ལ་སློབ་གཉེར་མཐིལ་ཕྱིན་པ་གནང་དགོས་ཚེ་བོད་པའི་སྐད་ཡིག་ལས་ལྷག་པའི་སྐད་ཡིག་གཞན་མེད་པ་གསལ་བཤད་གནང་པ་དང་།  བོད་མི་རྣམས་ཀྱིས་རང་ཉིད་ལ་ཡོད་པའི་འཛམ་གླིང་གི་གཅེས་ནོར་དེ་བརྒྱུད་འཇིག་རྟེན་ཀུན་ལ་ཕན་པ་ཇི་ལྟར་སྒྲུབ་དགོས་མིན་ཐད་བསམ་ཞིབ་དགོས་པའི་ལམ་སྟོན་བཀའ་སློབ་ཀྱང་སྩལ་གནང་འདུག
ཡང་༧གོང་ས་མཆོག་གིས། འཛམ་གླིང་ཧྲིལ་པོ་འདི་གཅིག་ལ་གཅིག་རྟེན་དགོས་པ་ཆགས་ཡོད་པ་དང་མི་ཞིག་ཡིན་ཕྱིན་ཆད་མི་ཚེ་བདེ་སྐྱིད་ལྡན་པ་ཞིག་འདོད་མཁན་ཤ་སྟག་ཡིན་སྟབས་སེམས་ཀྱི་ཞི་བདེ་སྐྲུན་རྒྱུའི་ཐབས་ལམ་ལེགས་ཤོས་དེ་ནི་རང་རྒྱལ་གཞན་ཕམ་གྱི་རྗེས་ལུས་ཅན་གྱི་བསམ་བློ་དེ་དོར་ནས་དུས་རྟག་ཏུ་སེམས་བཟང་པོ་དང་འགྲོ་བ་མིའི་རང་བཞིན་ལ་ཡོད་པའི་བྱམས་བརྩའི་བསམ་པ་དེ་གོང་འཕེལ་གཏོང་ཐབས་བྱ་རྒྱུ་གལ་ཆེ་ཡིན་པའི་བཀའ་སློབ་སྩལ་འདུག
ད་རེས་ཀྱི་གསུང་ཆོས་དེ་ནི་ཉི་ཧོང་ནང་བཅའ་བཞུགས་བོད་ཀྱི་སྐུ་ཚབ་དོན་གཅོད་ཁང་གིས་གོ་བསྒྲིགས་ཞུས་པ་ཞིག་ཡིན་འདུག

གསར་འགོད་པ་སེང་གེ་རི་བསོད་ནམས་ལྷ་མོ།