༧གོང་ས་མཆོག་གིས་ཐེ་ཝན་གྱི་གནོད་ཐེབས་ས་ཁུལ་ལ་རོཊ་དངུལ།

དེ་ཡང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། ཐེ་ཝན་གྱི་ལྷོ་ཕྱོགས་གྲོང་ཁྱེར་ཐེ་ནན་དུ་ས་ཡོམ་གྱི་གོད་ཆགས་བྱུང་བར་ངལ་སེལ་རོགས་དངུལ་ཨ་སྒོར་ཁྲི་ལྔ་བསྩལ་གནང་བ་དེ། འདི་ཟླའི་ཚེས་༡༧ཉིན་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐེ་ནན་གྲོང་སྡེའི་སྤྱི་ཁྱབ་སྐུ་ཞབས་ལའེ་ཆིང་དྷ་དངོས་སུ་མཇལ་གནང་སྟེ་ངལ་སེལ་རོགས་དངུལ་དེ་ཕུལ་གནང་ཡོད་པ་རེད།  
གནས་ཚུལ་དེའི་སྐོར་ཐེ་ནན་ས་གནས་བརྒྱུད་ལམ་ཞིག་གི་ནང་དུའང་དེ་ཉིན་གསར་འགྱུར་ཐོན་ཡོད་པ་རེད་ལ་སྐབས་དེར་གྲོང་ཁྱེར་སྤྱི་ཁྱབ་ནས་ཐུགས་དགའ་ཚོར་ཆེན་པོས་ཐུགས་རྗེ་ཆེ་ཞེས་གསུངས་འདུག
ཟླ་བ་འདིའི་ཚེས་༦་ཉིན་ཐེ་ནན་དུ་ས་ཡོམ་ཤུགས་ཚད་དྲུག་ཚེག་བཞིན་ཅན་ཞིག་བརྒྱབ་ནས། མི་གྲངས་བརྒྱ་ལྷག་འདས་གྲོངས་སུ་ཕྱིན་ཡོད་པ་མ་ཟད། དེ་མིན་ས་ཁང་སོགས་གཏོར་བཤིག་ཤུགས་ཆེ་ཕྱིན་ཡོད་པ་རེད། ཐེ་ཝན་དུ་ས་ཡོམ་གྱི་གོད་ཆགས་བྱུང་མ་ཐག་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། ཨ་མི་རི་ཀའི Minnesota མངའ་སྡེའི་Rochesterགྲོང་ཁྱེར་ནས་ཐེ་ཝན་མི་མང་རྣམས་ལ་ཐུགས་གསོ་དང་སྦྲགས་ཐུགས་སྨོན་རྒྱ་ཆེ་མཛད་གནང་ཡོད་པ་དང་། དེ་ཡང་༧གོང་ས་མཆོག་གིས་སྲིད་འཛིན་Ma Ying-Jeouམཆོག་བརྒྱུད་ནས་གོད་ཆག་ཕོག་པའི་ཐེ་ཝན་མི་མང་རྣམས་ལ་ཐུགས་གསོའི་གསུང་འཕྲིན་ཞིག་བསྩལ་གནང་ཡོད་པའི་ནང་། ༧གོང་ས་མཆོག་ཐུགས་ཕམ་ཧ་ཅང་བྱུང་བ་དང་། ས་ཡོམ་གྱི་གོད་ཆགས་དེའི་འོག་རྐྱེན་འདས་སུ་གྱུར་བ་རྣམས་ལ་ཐུགས་སྨོན་དང་ཤུལ་ལུས་ནང་མི་སྤུན་མཆེད་རྣམས་ལ་ཐུགས་གསོ་མཛད་པ་ཙམ་དུ་མ་ཟད།  སྟོན་པ་བཅོམ་ལྡན་འདས་ཀྱི་རྗེས་འབྲང་གཅིག་གྱུར་ཡིན་པའི་ནང་པ་ཡོངས་རྫོགས་ཀྱིས་ཤེས་རབ་སྙིང་པོ་གསུང་འདོན་གནང་ནས་ཐེ་ཝན་མི་མང་ཚོར་གདུང་སེམས་མཉམ་བསྐྱེད་གནང་དགོས་པའི་འབོད་སྐུལ་ཡང་མཛད་ཡོད་པ་རེད།

གསར་འགོད་པ་དབྱངས་སྒྲོལ།