༧གོང་ས་མཆོག་གིས་Vietnamགྱི་ཚོང་པའི་སྐུ་ཚབ་དང་མཇལ་འཕྲད།

༧གོང་ས་མཆོག་གིས་Vietnamགྱི་སྒེར་བདག་ཚོང་ལས་སྡེ་ཚོགས་ཀྱི་འགོ་ཁྲིད་ཁག་ཅིག་དང་མཇལ་འཕྲད་ཀྱིས་བཀའ་སློབ་སྩལ་གནང་འདུག
དེ་ཡང་ཁ་ས་ཚེས་༡༥ཉིན་༧གོང་ས་སྐྱབས་མགོན་ཆེན་པོ་མཆོག་གིས་ཐེག་ཆེན་ཆོས་གླིང་ཕོ་བྲང་དུ་Vietnam CEO Clubའམ་Vietnamགྱི་ཚོང་དོན་ཁེ་ལས་སྡེ་ཚོགས་ཀྱི་སྐུ་ཚབ་ཚོགས་མི་༡༡༢ལྷན་དང་མཇལ་འཕྲད་གནང་ཡོད་པ་དང་། Vietnamགྱི་ཚོང་དོན་ཁེ་ལས་ཀྱི་སྐུ་ཚབ་དེའི་ནང་། བརྒྱ་ཆ་༦༠བེུད་དང་བརྒྱ་ཆ་༤༠སྐྱེས་པ་ཡིན་འདུག་ལ་དེའི་ཁོངས་ནས་མང་ཆེ་བ་བཞུགས་སྒར་དུ་ཕེབས་པ་ད་རེས་ཐོག་མ་ཡིན་འདུག ཕོ་བྲང་གཟིམས་ཆུང་ནང་མཇལ་འཕྲད་སྐབས་Vietnamཚོང་ལས་སྡེ་ཚོགས་ཀྱི་སྐུ་ཚབ་རྣམས་ནས་དབྱིན་ཡིག་དང་། Vietnamསྐད་ཡིག་ཐོག་ཕབ་བསྒྱུར་ཞུས་པ། རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་གི་ཆ་དཔེ་གླེགས་བམ་གཉིས་༧གོང་ས་མཆོག་ལ་ཕྱག་རྟགས་ཀྱི་ཚུལ་དུ་ཕུལ་འདུག ༧གོང་ས་སྐྱབས་མགོན་ཆེན་པོ་མཆོག་གིས། སྤྱོད་འཇུག་གི་ཆ་དཔེ་དེ་༡༩༦༧ལོར་ཁུ་ནུ་བླ་མ་རིན་པོ་ཆེས་ ༧གོང་ས་མཆོག་ལ་དཔེ་ཁྲིད་གནང་པའི་ཐོག་སྤྱོད་འཇུག་དེ་གཞན་ལ་གང་མང་དཔེ་ཁྲིད་གནང་དགོས་གལ་གསུངས་པར་ལྟར་༧གོང་ས་མཆོག་ནས་སྤྱོད་འཇུག་དཔེ་ཁྲིད་གང་མང་གནང་ཐབས་ཀྱི་འབད་བརྩོན་གནང་བཞིན་པ་དང་། སྤྱོད་འཇུག་གིས་སེམས་བཅོས་ཐབས་ལ་ཕན་རླབས་ཆེན་ཡོད་པའི་སྐོར་བཀའ་སྩལ་གནང་འདུག
མཇལ་འཕྲད་དེའི་ཐོག་Vietnamགྱི་ཚོང་པའི་སྡེ་ཚོགས་ཀྱི་སྐུ་ཚབ་རྣམས་ཀྱིས་༧གོང་ས་མཆོག་ལ་ནང་སེམས་ཀྱི་ཞི་བདེ་བསྐྲུན་ཐབ་དང་། བདེ་བ་དང་སྡུག་བསྔལ་གྱི་རྒྱུ་དེ་དག་ལ་བཅོས་ཐབས་ཀྱི་ཐབས་ཤེས། དེ་བཞིན་བློ་སྦྱོང་ཚིག་བརྒྱད་མའི་ཚིག་བཅད་ལྔ་པ་དང་། དྲུག་པའི་ནང་དོན་སོགས་ཀྱི་སྐོར་བཀའ་འདྲི་ཞུས་པར་༧གོང་ས་མཆོག་གིས་དེ་དག་ལ་བཀའ་ལན་ཞིབ་ཕྲ་མཛད་འདུག ཡང་དྲི་བར་འདྲི་ལན་གྱི་མཛད་རིམ་དེའི་ཐོག་གོང་ས་སྐྱབས་མགོན་ཆེན་པོ་མཆོག་གིས་Vietnamནང་། རང་ཤི་རྒྱབ་མཁན་གྱི་ཚད་གཞི་མཐོ་དམན་དང་། རྒྱལ་ཁབ་ནང་ལྐོག་ཟ་རུལ་སུངས་ཀྱི་ཁྱབ་ཚད་དང་། དབུལ་ཕྱུག་གི་བར་ཁྱད་ཆེ་ཆུང་སོགས་ཀྱི་སྐོར་དྲིས་རྩད་གནང་འདུག་ཅིང་། Vietnamགྱི་སྐུ་ཚབ་རྣམས་ནས་རང་ཤི་རྒྱབ་མཁན་གྱི་གནས་ཚུལ་ཉུང་ཤས་ལས་མེད་ཀྱང་རྒྱལ་ཁབ་ནང་ལྐོག་ཟའི་གནས་ཚུལ་རྒྱ་ཁྱབ་ཡིན་པ་དང་། དབུལ་ཕྱུག་གི་བར་ཁྱད་ཡང་ཆེན་པོ་ཡོད་པ་འགྲེལ་བརྗོད་ཞུས་འདུག

གསར་འགོད་པ་དོན་གྲུབ་རྣམ་རྒྱལ།