༧གོང་ས་མཆོག་མའི་སོར་གཙུག་ལག་སློབ་ཆེན་དུ་ཕེབས་འཆར་འདུག

༧གོང་ས་༧སྐྱབས་མགོན་ཆེན་པོ་མཆོག་མའི་སོར་ཁུལ་གྱི་གཙུག་ལག་སློབ་གཉེར་ཁང་གི་མཛད་སྒོ་ཞིག་ཏུ་ཆིབས་བསྒྱུར་གནང་འཆར་ཡོད་འདུག
དེ་ཡང་རྒྱ་གར་གྱི་Times of India་ཞེས་པའི་གསར་ཤོག་ནང་གནས་ཚུལ་སྤེལ་བ་ལྟར་ན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ཟླ་༡༢་བའི་ཚེས་༡༣་ཉིན་རྒྱ་གར་ལྷོ་ཕྱོགས་མའི་སོར་Mysoreགྲོང་ཁྱེར་ནང་ཡོད་པའི་མའི་སོར་གཙུག་ལག་སློབ་གཉེར་ཁང་གི་སློབ་མ་མཐར་སོན་པ་རྣམས་ལ་ཕྱག་འཁྱེར་གནང་རྒྱུའི་མཛད་སྒོ་ཞིག་ཏུ་ཆིབས་བསྒྱུར་གནང་རྒྱུའི་ཞལ་བཞེས་ཐོབ་ཡོད་འདུག
གཙུག་ལག་སློབ་གཉེར་ཁང་གི་འབྲེལ་ཡོད་སྐུ་ཞབས་R.Rajanna་མཆོག་ནས་གསུངས་བ་ལྟར་ན། ལམ་སྲོལ་བྱེད་ན་ཕྱག་འཁྱེར་གནང་རྒྱུའི་མཛད་སྒོ་འདི་བཞིན་ཕྱི་ཟླ་བཞི་པའི་ནང་ཡིན་ནའང་། འཆར་ལོའི་ཕྱི་ཟླ་དང་པོའི་ནང་སློབ་གཉེར་ཁང་གི་སྤྱི་ཁྱབ་གཙོ་འཛིན་གཞོན་པ་སྐུ་ཞབས་K.S.Rangappa་མཆོག་ལས་མཚམས་བཞག་གནང་གི་ཡོད་སྟབས་དེར་གཞིགས་པས་འཆར་ལོའི་ཕྱི་ཟླ་དང་པོའི་ནང་གནང་རྒྱུའི་ཐག་ཆོད་བྱུང་ཡོད་པ་རེད། འོན་ཀྱང་༧གོང་ས་ཏཱ་ལའི་བླ་མ་མཆོག་གདན་འདྲེན་ཞུ་རྒྱུའི་ཐག་ཆོད་བྱུང་ཡོད་པ་དེ་ཕྱི་ཟླ་བཅུ་གཉིས་ནང་མ་གཏོགས་ཆིབས་བསྒྱུར་གནང་ཐུབ་ཀྱི་མེད་པ་བཅས་ལ་བརྟེན་ང་ཚོས་མཛད་སྒོ་འདི་བཞིན་ཕྱི་ཟླ་༡༢་ཚེས་༡༣་ཉིན་གནང་གཏན་འཁེལ་ཡོད་རེད་ཅེས་གསུངས་འདུག
ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མཛད་འཆར་གཞིར་བཟུང་ལྟར་ན། ཕྱི་ཟླ་བཅུ་གཅིག་པའི་ཚེས་༡༧་ཉིན་ཉི་ཧོང་དང་དེ་ནས་རིམ་པས་རྒྱ་གར་ལྷོ་ཕྱོགས་ཁུལ་དུ་མཛད་འཆར་ཁག་ཅིག་བསྐྱངས་གནང་གི་ཡོད་པ་རེད།

གསར་འགོད་པ་རིག་འཛིན་ཆོས་སྒྲོན།