བོད་དུ་༧གོང་ས་མཆོག་ལ་བརྟན་བཞུགས།

༄༅།    །ཕྱི་ཟླ་༩ པའི་ཚེས་༡༩ ནས་ཉིན་གསུམ་རིང་ཁམས་སྡེ་དགེ་རྫོགས་ཆེན་དགོན་པད་མ་ཐང་སྒྲུབ་སྡེ་རུ། རིས་མེད་སྐྱེས་ཆེན་དང་དགེ་འདུན་པ་གྲངས་ཆིག་ཁྲི་ལྔ་སྟོང་ལྷག་འདུ་འཛོམས་ཀྱིས། ལོ་ལྟར་ཚོགས་བཞིན་པའི་ འདི་ལོའི་སེམས་སྐྱེད་སྨོན་ལམ་ཆེན་མོ་དེ་ཚོགས་ཡོད་པ་དང༌། སྐབས་དེར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་ཅིང་།    ཐུགས་བསྐྱེད་མྱུར་དུ་འགྲུབ་པ།  གངས་ལྗོངས་བསྟན་འགྲོའི་བདེ་དོན་ཆེད་དུ་སྐུ་གཤེགས་རྣམས་ལ་བསྔོ་སྨོན་ཟབ་རྒྱས་གསུངས་ཡོད་ལུགས། རྫོགས་ཆེན་སྤྲུལ་སྐུ་ཉི་མ་རིན་པོ་ཆེ་ནས་འགྲེལ་བརྗོད་གནང་འདུག
རྫོགས་ཆེན་སྡེ་དགོན་གཉིས་ལ་རྒྱ་ནག་གཞུང་གི་དམ་དྲག་མུ་མཐུད་བྱེད་ཀྱི་ཡོད་པ་དང༌། ད་ལོ་སྤྱི་ཟླ་༤ཚེས་༢༢ནས་༢༤བར་དམིགས་བསལ་ཉེན་རྟོག་པ་༡༠༠ལྷག་ཙམ་གྱིས་རྫོགས་ཆེན་སྡེ་དགོན་གཉིས་ལ་དྲག་རྡུང་དང༌། མི་མང་པོ་འཇུ་བཟུང་བྱས་པ་ལས། ཕྱི་ཚེས་༢༥ཉིན་རྫོགས་ཆེན་ཤྲྰི་སེང་ཆོས་གྲྭ་དང་།    རྫོགས་ཆེན་དགོན་པ། པད་མ་ཐང་བཅས་ཀྱི་བླ་གྲྭ། རྫོགས་ཆེན་འབྲོག་རུ་སྡེ་པའི་གྲོང་མི་བཅས་སྐྱ་སེར་སུམ་སྟོང་ལྷག་ཙམ་གྱིས་རྫོགས་ཆེན་ཤང་སྲིད་གཞུང་གི་སྒོ་འགྲམ་དུ་ཞི་བའི་འདུ་འཛོམས་ཀྱིས། རྒྱུ་མཚན་མེད་པའི་དྲག་རྡུང་བྱེད་མཚམས་འཇོག་དགོས་པ་དང་། ཉེས་མེད་འཇུ་ཟུང་བྱས་པར་ངོ་རྒོས་བྱས་ཡོད་པ་རེད།།