༧གོང་ས་མཆོག་ནས་དགའ་བསུ།

༄༅།    །ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ལྷོ་ཨ་ཕི་རི་ཀའི་ཡེ་ཤུའི་ཆོས་དཔོན་ཌེ་སི་མོན་ཊུ་ཊུ་མཆོག་ལ་འདི་ལོའི་ཊེམ་པེལ་ཊོན་གཟེངས་བསྟོད་བྱ་དགའ་འབུལ་གཏན་འཁེལ་བར་བརྟེན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཁོང་ལ་དགའ་བསུའི་འཚམས་འདྲི་བསྩལ་གནང་མཛད་འདུག
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་བཞུགས་སྒར་ནས་ཡུ་རོབ་ཕྱོགས་སུ་ཆིབས་ཞལ་བསྒྱུར་བའི་སྐབས་བཞུགས་སྒར་ཉེ་ཁྲིས་ཀྱི་གནམ་ཐང་དུ་འདུ་འཛོམས་བྱུང་བའི་གསར་འགོད་པ་ཚོར་འདི་ལོའི་ཊེམ་པེལ་ཊོན་གཟེངས་རྟགས་དེ་བཞིན་ལྷོ་ཨ་ཕི་རི་ཀའི་ཆོས་དཔོན་ཌེ་སི་མོན་ཊུ་ཊུ་མཆོག་ལ་འབུལ་རྒྱུའི་ཐག་གཅོད་གནང་བ་དེ་ནི་ཁོང་གིས་སྤྱི་ཚོགས་ལ་ཕན་བདེའི་ཞབས་འདེགས་བསྒྲུབས་དང་སྒྲུབ་མུས་ལ་གྲུབ་འབྲས་སོན་པར་ངོས་འཛིན་ཐོབ་པ་ཞིག་ཆགས་ཡོད། ཁོང་ནི་ཆོས་ཕྱོགས་ཀྱི་དབུ་ཁྲིད་ཅིག་ཡིན་པས་མ་ཟད། ལྷོ་ཨ་ཕི་རི་ཀའི་ནང་དུ་བཅོས་བསྒྱུར་དང་། ལྷག་པར་ནེལ་སན་མན་ཌེ་ལ་བཀག་ཉར་ཁང་ནས་གློད་བཀྲོལ་ཐོབ་པ་སོགས་ཀྱི་བྱས་རྗེས་ཆེན་པོ་བཞག་ཡོད་ཅེས་བཀའ་བསྩལ་གནང་འདུག།