བཞུགས་སྒར་དུ་དེང་དུས་བོད་ཀྱི་རི་མོའི་ཚོང་ཁང་སྒོ་ཕྱེས་འདུག

༄༅༎བཙན་བྱོལ་ནང་གནས་ཞུགས་བོད་རིགས་བཀྲིས་ལགས་དང་ཨ་མི་རི་ཀའི་ནས་ཤར་ཨེ་ཤི་ཡའི་ཞིབ་འཇུག་སློབ་གཉེར་ཐོན་པའི་ཕྱི་རྒྱལ་བ་སའ་ར་གཉིས་བཟུང་འབྲེལ་གྱི་ཐོག་ནས་བཞུགས་སྒར་རྡ་རམ་ས་ལའི་མེཀ་ལོ་ཌི་གནྗ་རུ་དེང་དུས་བོད་ཀྱི་རི་མོའི་སྒྱུ་རྩལ་གྱི་འགྲེམས་ཚོང་ཁང་ཞིག་ཁེ་ས་སྒོ་འབྱེད་གནང་འདུག།

བཙན་བྱོལ་བོད་མིའི་སྤྱི་ཚོགས་དེ་བཞིན་འཚོ་གནས་བྱས་པ་ཙམ་མ་ཡིན་པར།

དངོས་སུ་འཕེལ་རྒྱས་འགྲོ་བཞིན་པ་དང་ཆབས་ཅིག་རྒྱལ་སྤྱིའི་སྤྱི་ཚོགས་དང་འབྲེལ་བ་བྱེད་བཞིན་ཡོད་པར་བརྟེན་དབྱིན་སྐད་དུ་པིཀ་ཨ་ཀྲི་ཞེས་རི་རྩེ་སྒྱུ་རྩལ་འགྲེམས་ཚོང་ཁང་དེ་སྒོ་འབྱེད་གནང་ཡོད་པའི་སྐོར་བོད་པའི་རིག་གཞུང་ཁྱབ་སྤེལ་གནང་རྒྱུའི་དམིགས་ཡུལ་གཅིག་མཚུངས་འཛིན་མཁན་བཀྲིས་ལགས་དང་སའ་ར་གཉིས་ཀྱིས་འགྲེལ་བརྗོད་གནང་འདུག།

བཀྲིས་ལགས་ཀྱིས་རི་རྩེ་སྒྱུ་རྩལ་འགྲེམས་ཚོང་ཁང་དེས་གཙོ་བོ་བོད་པའི་དེང་དུས་རི་མོའི་སྒྱུ་རྩལ་བ་ཚོས་བྲིས་གནང་བའི་རི་མོ་ཁག་ཚོང་འགྲེམས་གནང་བའི་བརྒྱུད་བོད་རིགས་སྒྱུ་རྩལ་བ་ཚོ་རང་ཉིད་ཀྱི་སྒྱུ་རྩལ་གོང་འཕེལ་བཏང་བ་དང་ཆབས་ཅིག་རང་ཁ་རང་གསོ་ཐུབ་པའི་ཆ་རྐྱེན་ཞིག་སྐྲུན་གནང་ཡོད་སྐོར་གསུངས་བཞག།

ཁ་ས་གོང་ཞུས་འགྲེམས་ཚོང་ཁང་དེའི་སྒོ་འབྱེད་མཛད་སྒོའི་ཐོག་བཙན་བྱོལ་ནང་འཚོ་གནས་གནང་བཞིན་པའི་དེང་དུས་རི་མོའི་སྒྱུ་རྩལ་ལ་མཁས་པ་བོད་རིགས་ན་གཞོན་བཞིས་བྲིས་གནང་བའི་དེང་དུས་རི་མོ་མི་འདྲ་བ་ཁག་༡༤ཙམ་ཞིག་འགྲེམས་སྟོན་གནང་འདུག། རི་མོ་བྲིས་གནང་མཁན་བཞི་པོ་དེ་རྣམས་ནི་གུང་ལོ་༢༥ཡིན་པའི་བསྟན་འཛིན་གྲགས་པ་ལགས་དང༌། གུང་ལོ་༣༦ཡིནཔའི་བློ་བཟང་རྡོ་རྗེ་ལགས། ཡང་ལོ་༢༦ལ་སླེབས་པའི་བསྟན་འཛིན་དགའ་བ་ལགས་དང།ལོ་༢༨ཡིན་པའི་བསོད་ནམ་དབང་ཕྱུགས་ལགས་བཅས་ཡིན་པ་རེད།