བལ་ཡུལ་དམག་མིའི་ཆ་རྐྱེན་མ་ཚང་བ་རྣམས་ཕྱིར་ལོག་གཏང་རྒྱུ།

༄༅༎བལ་ཡུལ་ནང་དུ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱིས་དེ་སྔོན་མའོ་དམར་ཤོག་གྱེན་ལོག་ཤོག་ཁག་ནང་གི་དམག་མི་ཁྲོད་ནས་དམག་ཁོངས་སུ་ཞུགས་པའི་ཆ་རྐྱེན་མ་ལོན་པ་དཔེར་ན་ཕྲུ་གུ་ལོ་ཚད་མ་ཟིན་པ་དམག་མིའི་ནང་བཅུག་པའི་རིགས་གཞུང་གིས་ཁྱིམ་ཚང་ངམ་སྤྱི་ཚོགས་ཐོག་ཕྱིར་ལོག་གཏོང་བའི་ལས་དོན་འགོ་འཛུགས་བྱ་རྒྱུ་ཡིན་པ་རེད།

བལ་ཡུལ་གཞུང་གིས་མའོ་དམག་མི་རྙིང་པ་འཕྲལ་སེལ་སྡོད་སྒར་ཏུ་བཞག་པ་ནས་མུ་མཐུད་འཕྲལ་སེལ་སྡོད་སྒར་དུ་དམག་མི་རྙིང་པའི་ཁོངས་སུ་སྡོད་དགོས་པའི་ཆ་རྐྱེན་མ་ཚང་བ་རྣམས་ཕྱིར་ལོག་བྱེད་པའི་ལས་དོན་ཚོགས་ཆུང་དེའི་ནང་དུ་བལ་ཡུལ་གྱི་ཞི་བདེའི་བློན་ཆེན་དང་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ མའོ་གྱེན་ལོག་ཤོག་ཁག་གི་དམག་སྤྱི་གཞོན་པ་སོགས་ཡོད་ཅིང་ཁོང་རྣམས་ཀྱིས་དམག་མི་ཕྲུ་གུ་རྣམས་ཕྱིར་ལོག་གཏང་རྒྱུའི་ལས་དོན་གྱི་ཆེད་དུ་རེས་གཟའ་ཉི་མའི་ཉིན་བལ་ཡུལ་དབུས་སུ་ཡོད་པའི་མའོ་དམག་མི་རྙིང་པའི་འཕྲལ་སེལ་སྡོད་སྒར་ཨང་གཉིས་པར་འཚམས་འདྲིར་བསྐྱོད་ཡོད་པ་རེད། བལ་ཡུལ་ནང་དུ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱི་ལོ་ཉིས་སྟོང་དྲགུ་ནས་མའོ་དམག་མིའི་ཁོངས་སུ་ཞུགས་ཆོག་པའི་ཆ་རྐྱེན་མ་ཚང་བའི་གནས་སྟངས་ཞིབ་འཇུག་བྱས་པ་བརྒྱུད་དམག་ཁོངས་སུ་ལོ་ཚད་མ་ཟིན་པའི་ཕྲུ་གུ་བཞི་སྟོང་ལྷག་ཙམ་ཡོད་པ་ཤེས་རྟོག་བྱུང་ཡོད་ཅིང་བལ་ཡུལ་གཞུང་ཕྱོགས་ཀྱི་འཆར་ཆར་གཞིའི་ནང་དུའང་མའོ་དམག་ཁོངས་སུ་ཡོད་པའི་ཕྲུ་གུ་ལོ་ཚད་མ་ཟིན་པ་རྣམས་ཕྱིར་ལོག་གཏོང་རྒྱུ་སོགས་ཁོང་ཚོའི་སྔར་གྱི་གནས་སྟངས་བསྐྱར་གསོ་བྱ་རྒྱུའི་ལས་དོན་དེ་ནི་ཕྱི་ཟླ་བཅུ་གཉིས་པའི་ཟླ་དཀྱིལ་དུ་ཆ་ཚང་བ་མཇུག་སྒྲིལ་ཐུབ་པ་བྱ་རྒྱུ་ཡིན་པ་རེད།