ཡུ་རོབ་ནས་འགྲོ་བ་མིའི་ཐོབ་ཐང་གི་སྐུ་ཚབ་གསར་བསྐོ་གནང་།

༄༅།    །ཁ་སང་ཕྱི་ཚེས་ ༢༥ ཉིན་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་དང་བདེ་འཇགས་སྲིད་བྱུས་ཀྱི་ཆེས་མཐོའི་སྐུ་ཚབ་ལྕམ་སྐུ་ཁེ་ཐེ་རིན་ཨེ་ཤི་ཊོན་ Catherine Ashton མཆོག་གིས་གྲོས་འགོ་བཏོན་པ་ལྟར། ཡུ་རོབ་སྤྱི་མཐུན་ཚོགས་པས་སྐུ་ཞབས་ ས་ཊབ་རོས་ལམ་བྷི་རི་ནི་དིས་  Stavros Lambrindis མཆོག་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་ཏུ་བསྐོ་བཞག་གནང་ཡོད་སྐོར་བཙན་བྱོལ་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་འདུག
ཡུ་རོབ་གྲོས་ཚོགས་དང་སྤྱི་མཐུན་ཚོགས་པའི་ངོས་ནས་འགྲོ་བ་མིའི་ཐོབ་ཐང་གི་གནད་དོན་དེ་གལ་འགངས་ཆེན་པོ་ཞིག་ལ་ངོས་འཛིན་གནང་གི་ཡོད་པས་མ་ཟད་དེ་སྔའི་གྲོས་ཚོགས་ཚོགས་དུས་སྐབས་སུ་གླེང་སློང་མང་དག་ཅིག་ཀྱང་བྱུང་ཡོད་པ་བཅས་ལ་བརྟེན་ད་རེས་ཡུ་རོབ་སྤྱི་མཐུན་ཚོགས་པའི་ཐོག་ནས་བསྐོ་བཞག་གནང་བ་ཞིག་ཡིན་པ་དང་།    དེ་ནི་སྤྱི་མཐུན་ཚོགས་པས་འགྲོ་བ་མིའི་ཐོབ་ཐང་ཐོག་འཛིན་བཞིན་པའི་སྲིད་བྱུས་རྣམས་དངོས་སུ་ལག་བསྟར་བྱེད་རྒྱུར་ནུས་པ་ཆེ་ཙམ་ཐོན་ཐུབ་པ་དང་། དངོས་གསལ་དོད་རུ་གཏོང་རྒྱུར་ཕན་ཐོགས་ཡོང་རྒྱུའི་རེ་བ་ཡོད་འདུག