ཡོ་རོབ་ནས་རྒྱ་ནག་སྲིད་བློན་ལ་བོད་དོན་ཐད་ཀར་གླེང་འདུག

༄༅།    །རྒྱ་ནག་གི་སྲིད་བློན་ཝན་འཇ་བྷའོ་ནས་ཡུ་རོབ་སྤྱི་མཐུན་ཚོགས་པའི་འབྲེལ་ཡོད་ཚོའི་ལྷན་དུ་ཚོང་འབྲེལ་གྱི་ལྷན་ཚོགས་ཐོག་མཉམ་ཞུགས་བྱས་ཡོད་པ་དང་། ཁ་སང་རེས་གཟའ་ཕུར་བུའི་ཉིན་ཕ་རན་སིའི་རྒྱལ་ས་པེ་རི་སི་ནང་། ཡུ་རོབ་སྤྱི་མཐུན་ལྷན་ཁང་གི་ཚོགས་གཙོ་ Herman Van Rompuyམཆོག་དང་། ཡུ་རོབ་སྤྱི་མཐུན་ཚོགས་པའི་འཛིན་སྐྱོང་ལྷན་ཚོགས་ཀྱི་འགན་འཛིན་སྐུ་ཞབས་ Jose Manuel Barroso རྣམ་གཉིས་ནས་གསར་འགོད་སྤྱི་བསྒྲགས་ཤིག་སྤེལ་ཡོད་པ་རེད།    དེའི་ནང་སྲིད་བློན་ཝན་འཇ་བྷའོ་དང་མཇལ་འཕྲད་སྐབས། སྤྱིར་བཏང་རྒྱ་ནག་ནང་དཔལ་འབྱོར་གྱི་གནས་སྟངས་ཐོག་ནས་མི་མང་ས་ཡ་མང་པོའི་འཚོ་བའི་དཀའ་ངལ་སེལ་ཐུབ་པ་བྱུང་བ་དེར་ངོས་ལེན་ཞུ་ཡི་ཡོད། ཡིན་ནའང་འཛམ་གླིང་ནང་གི་རྒྱལ་ཁབ་གཞན་དང་འདྲ་མཚུངས་རྒྱ་ནག་ནང་དུའང་གཞི་རྩའི་རང་དབང་ལ་གུས་བརྩི་ཞུ་དགོས་རྒྱུ་གལ་ཆེན་པོ་ཡིན་པར་ཡང་ངོས་འཛིན་བྱེད་ཀྱི་ཡོད། དེ་འདྲ་ཡིན་དུས་ང་ཚོས་དམིགས་བསལ་བོད་ནང་རང་དབང་ལ་དམ་དྲག་བྱེད་ཀྱི་ཡོད་པར་སེམས་འཚབ་ཆེན་པོ་ཡོད་ཅེས་གསུངས་ཡོད་པ་རེད།    
གང་ལྟར་ཡུ་རོབ་སྤྱི་མཐུན་ཚོགས་པའི་འབྲེལ་ཡོད་དཔོན་རིགས་རྣམ་གཉིས་ནས་རྒྱ་ནག་གི་སྲིད་བློན་ཝན་འཇ་བྷའོ་མཆོག་ལ་སྤྱི་མཐུན་ཚོགས་པའི་ངོས་ནས་རྒྱ་ནག་མཉམ་འབྲེལ་བ་བྱེད་རྒྱུར་འགྲོ་བ་མིའི་ཐོབ་ཐང་གི་གནད་དོན་དེ་གལ་འགངས་ཆེན་པོ་བརྩི་བཞིན་ཡོད་པའི་ཐོག་བརྡ་ལན་གསལ་པོ་གནང་ཡོད་འདུག།