རྒྱ་གར་གྱི་ཏར་འཕྲིན་བློན་ཆེན་ཟུར་པར་ལྐོག་ཟའི་སྐྱོན་འཛུགས།

༄༅༎རྒྱ་གར་གྱི་ཏར་འཕྲིན་བློན་ཆེན་ཟུར་པ་ཨེ་ར་ཇ་ཡི་ཐོག་ལྐོག་ཟའི་སྐྱོན་འཛུགས་ཕོག་པའི་གྱོད་གཞིའི་ཐོག་འདི་ཚེས་ ༡༡ ཉིན་རྒྱ་གར་གྱི་ཁྲིམས་ཁང་ཞིག་ནང་དངོས་སུ་ཁྲིམས་བཤེར་འགོ་འཛུགས་བྱས་འདུག 
དེ་ཡང་ཨེ་ར་ཇ་ཡིས་ཐོག་ཕོག་པའི་སྐྱོན་འཛུགས་དེའི་ནང༌། དེ་སྔ་ཁོང་གིས་ཏར་འཕྲིན་བློན་ཆེན་གྱི་མཛད་འགན་བཞེས་སྐབས་ཚོང་ལས་ཁེ་གཉེར་ཚན་པ་ཁག་ཅིག་གིས་ལག་ནས་དངུལ་འབོར་ཧ་ཅང་ཕོན་ཆེན་པོའི་ལྐོག་བརྔན་བླངས་ཏེ། ཚོང་ལས་ཚན་པ་དེ་ཚོར་རིན་གོང་ཤིན་ཏུ་ཆུང་ངུའི་ཐོག སྐབས་དེར་གསར་དུ་ཐོན་པའི་ལག་འཁྱེར་ཁ་དཔར་ཚོང་འགྲེམ་བྱ་རྒྱུའི་འགན་གཙང་སྤྲད་པའི་རྐྱེན་གྱིས། རྒྱ་གར་གཞུང་ལ་ཨ་རིའི་ཌོ་ལར་ཐེར་འབུམ་བཞི་བཅུ་ཙམ་གི་གྱོང་གུན་ཕོག་པའི་རྙོག་གླེང་ཞིག་ཐོན་ཏེ། འདི་ལོའི་ཕྱི་ཟླ་གཉིས་པའི་ནང་ཨེ་ར་ཇ་འཛིན་བཟུང་གིས་ད་བར་བཙོན་ཁང་ནང་སྡོད་དགོས་བྱུང་བའི་རྗེས། འདི་ཚེས་ ༡༡ ཉིན་རྒྱ་གར་རྒྱལ་ས་ལྡི་ལིའི་ནང་ཡོད་པའི་ཁྲིམས་ཁང་ཞིག་ཏུ་ཁོ་པའི་ཐོག་ཕོག་པའི་སྐྱོན་འཛུགས་ཀྱི་གྱོད་གཞིའི་ཐོག་ཁྲིམས་བཤེར་འགོ་འཛུགས་བྱས་པའི་སྐབས། ཁྲིམས་ཁང་ཆུང་དྲགས་པའི་སྒང༌།  ཁྲིམས་རྩོད་པ་དང༌། གསར་འགོད་པ། དེ་བཞིན་ཟུར་ཉན་པ་སོགས་མི་མང་ཤིན་ཏུ་མང་པོ་སླེབས་ཏེ། ཁྲིམས་ཁང་ནང་ཟིང་སློང་ཆེན་པོ་བྱུང་འདུག
ཨེ་ར་ཇ་ཞེས་པའི་བློན་ཆེན་ཟུར་པ་དེ་ནི། རྒྱ་གར་ལྷོ་ཕྱོགས་ཏ་མིལ་ན་དྲུ་ནང་ཡོད་པའི་ཌི་ཨེམ་ཀེ་ཞེས་པའི་ས་གནས་ཆབ་སྲིད་ཚོགས་པའི་ཚོགས་མི་ཞིག་ཡིན་པ་དང༌། ཁོང་གིས་ཕྱི་ལོ་ ༢༠༠༧ ནས་ ༢༠༡༠ བར་་རྒྱ་གར་གྱི་ཏར་འཕྲིན་བློན་ཆེན་གྱི་མཛད་འགན་བཞེས་ཡོད་པའི་གནས་ཚུལ་བཀོད་འདུག།