བོད་ཀྱི་ལོ་རྒྱུས་དང་འབྲེལ་བའི་འགྲེམས་སྟོན།

༄༅༎བོད་ཀྱི་ལོ་རྒྱུས་ཀྱི་འཁྱུགས་བལྟ་ཞེས་པའི་དཔར་དང་དངོས་པོའི་འགྲེམས་སྟོན་འདི་ ཟླ་བ་གཅིག་གི་དུས་ཡུན་རིང་གནང་རྒྱུ་དང་ དེིའི་ནང་གཡུང་དྲུང་བོན་ནས་ བོད་ཀྱི་བཙན་པོའི་དུས་རབས་དང་ བོད་ལ་ནང་ཆོས་དར་ཚུལ་ བོད་ཀྱི་ཡི་གེ་ ༧རྒྱལ་བ་རིམ་བྱོན་གྱི་མཛད་རྣམ་ རྒྱ་ནག་གིས་བོད་དབང་བསྒྱུར་བྱས་པ་སོགས་གོ་རིམ་ལྡན་པའི་ལོ་རྒྱུས་ཀྱི་སྙིང་པོ་ཁག་ཚུད་ཡོད་འདུག།

ལྷག་པར་དུ་བོད་ཀྱི་ལོ་རྒྱུས་འགྲེམས་སྟོན་དེའི་ནང་ ཧ་ཅང་དཀོན་པའི་དཔར་རིས་དང་ ལོ་རྒྱུས་ཀྱི་དངོས་པོ་ གཞན་ཡང་བོད་རང་བཙན་སྐབས་ བོད་གཞུང་གིས་ཡུལ་གྲུ་གཞན་དང་འདྲ་མཉམ་གྱི་ཐོག་ནས་བཞག་པའི་ཆིངས་ཡིག་སོགས་ཀྱང་ཡོད་པ་རེད།

འགྲེམས་སྟོན་འདི་བཙན་བྱོལ་བོད་གཞུང་ཕྱི་འབྲེལ་བཀའ་བློན་ སྟག་ལྷ་སྐལ་བཟང་དབྱངས་སྐྱིད་ལགས་ནས་དབུ་འབྱེད་གནང་ཞིང་ ཁོང་གིས་དབུ་འབྱེད་ཀྱི་གསུང་བཤད་སྐབས་ གཞི་རྐང་ང་ཚོ་བཙན་བྱོལ་བོད་གཞུང་གི་ངོས་ནས་ དབུ་མའི་ལམ་གྱི་ཐོག་ནས་བོད་ལ་མིང་དོན་མཚུངས་པའི་རང་སྲིད་རང་སྐྱོང་འབྱུང་རྒྱུར་འབད་བརྩོན་བྱེད་བཞིན་ཡོད་ཀྱང་ བོད་ཀྱི་དངོས་ཡོད་ཀྱི་ལོ་རྒྱུས་ངེས་པར་དུ་ཤེས་དགོས་པར་མ་ཟད་ དངོས་ཡོད་བོད་ཀྱི་ལོ་རྒྱུས་དེའི་ངོ་བོ་བསྒྱུར་བའམ་ རྫུན་བཟོ་རྩ་བ་ནས་བྱེད་ཐབས་མེད་པ་ཞིག་རེད་ཅེས་གསུངས་འདུག།

ད་དུང་བཀའ་བློན་སྟག་ལྷ་སྐལ་བཟང་དབྱངས་སྐྱིད་ལགས་ཀྱིས་འགྲེམས་སྟོན་འདི་བརྒྱུད་ རྒྱ་ནག་གིས་བོད་བཙན་བཟུང་མ་བྱས་གོང་ བོད་ནི་རང་བཙན་གྱི་རྒྱལ་ཁབ་ཞིག་ཡིན་པ་ལོ་རྒྱུས་ཀྱི་དངོས་ར་འཕྲོད་པ་སྟོན་ཐུབ་རྒྱུ་མ་ཟད་ འགྲེམས་སྟོན་འདི་ལྟ་བུས་བོད་ཀྱི་ལོ་རྒྱུས་ལ་འཁྱོགས་བཤད་བྱེད་བཞིན་པར་ལན་འདེབས་སྤྲོད་པ་ཡང་མཚོན་ཐུབ་རྒྱུ་ཡིན་པ་གསུངས་འདུག།

འགྲེམས་སྟོན་འདི་རྩོམ་པ་པོ་ཁ་ལོདྲ་ཨར་པིs་(Claude Arpi)ཕྱོགས་བསྒྲིགས་དང་ བཙན་བྱོལ་བོད་གཞུང་གི་ཕྱི་འབྲེལ་ལས་ཁུངས་ནས་གོ་བསྒྲིགས་་མཐུན་འགྱུར་གནང་པ་ཞིག་ཡིན་ཞིང་ ལས་ཁུངས་དེའི་འཛིན་སྐྱོང་དྲུང་ཆེ་ ཨ་ཏི་ཤ་བསྟན་འཛིན་ཕུན་ཚོགས་ཀྱིས་གསུངས་ན་ འགྲེམ་སྟོན་འདི་བོད་མིའི་གཞིས་ཆགས་ཁག་དང་ བོད་པའི་སློབ་གྲྭ་ཁག་གི་ནང་ཕྱོགས་བསྐྱོད་གནང་རྒྱུ་ཡིན་པ་གསུངས་ཡོད་པ་ཕ་ཡུལ་དྲ་རྒྱའི་ཐོག་གནས་ཚུལ་བཀོད་སྤེལ་བྱས་འདུག།