ཐེ་ལྦན་ཡུལ་མི་རྒྱ་ནག་ཏུ་གནས་སྤོ་བྱེད་མཁན་ཉུང་བ།

༄༅༎ཐེ་ལྦན་དང་རྒྱ་ནག་སྐམ་ས་ཆེན་པོའི་དབར་ཚོང་དོན་དང་ཡུལ་འཁོར་སྤྲོ་འཆམ་ཀྱི་འབྲེལ་ལམ་གོང་མཐོར་གཏོང་ཐབས་སུ་ཕྱོགས་གཉིས་ཀའི་ངོས་ནས་འབད་བརྩོན་ཤུགས་ཆེ་བྱེད་བཞིན་ཡོད་མིན་ལ་མ་བལྟོས་པར། ཐེ་ལྦན་གྱི་ཡུལ་མི་རྒྱ་ནག་ཏུ་གནས་སྤོ་བྱེད་མཁན་དང་། རྒྱ་ནག་ནང་ལས་ཀ་བྱེད་འདོད་ཡོད་པའི་གྲངས་འབོར་ཉུང་དུ་འགྲོ་བཞིན་ཡོད་པ། ཐེ་ལྦན་གྱི་ United Daily News ཞེས་པའི་ཚགས་པར་ལས་ཁུངས་ཀྱིས་མང་ཚོགས་ཀྱི་བསམ་ཚུལ་བསྡུ་ལེན་བྱས་པ་ལས་ཤེས་རྟོགས་བྱུང་ཡོད་འདུག

གོང་གི་ཚགས་པར་དེས་འདི་ལོ་ཕྱི་ཟླ་ ༨ པའི་ནང་ མི་ཆིག་སྟོང་བརྒྱ་མེད་ཉི་ཤུ་རྩ་བཞིའི་བསམ་ཚུལ་བསྡུ་ལེན་བྱས་པའི་སྡོམ་འབོར་ཞིག་གཟའ་སྤེན་པའི་ཉིན་འདོན་སྤེལ་བྱས་པའི་ནང་། མི་བརྒྱ་ཆ་དྲུག་བཅུ་རེ་དྲུག་གིས་རྒྱ་ནག་སྐམ་ས་ཆེན་པོའི་ནང་ལས་ཀ་བྱེད་འདོད་མེད་པའི་བསམ་ཚུལ་བཏོན་ཡོད་ཅིང་། འདི་ནི་ལོ་གཅིག་གི་སྔོན་དང་བསྡུར་ན་བརྒྱ་ཆ་བཞིས་མང་བ་ཡིན་འདུག།

ཡང་རྒྱ་ནག་ནང་གནས་སྤོ་བྱེད་འདོད་ཡོད་མེད་བསམ་ཚུལ་དྲིས་པར་བརྒྱ་ཆ་དགུ་བཅུ་ཐམ་པས་རྒྱ་ནག་ནང་གནས་སྤོ་བྱེད་འདོད་མེད་པ་བརྗོད་འདུག་པ་དང་། བརྒྱ་ཆ་དྲུག་བཅུ་རེ་དྲུག་གིས་སོ་སོའི་ཕྲུ་གུ་རྒྱ་ནག་ནང་སློབ་སྦྱོང་དུ་ཡང་གཏོང་འདོད་མེད་པ་བརྗོད་འདུག་ཅིང་། གྲངས་འབོར་དེ་གཉིས་ཀ་སྔ་ལོ་ལས་མཐོ་རུ་སོང་ཡོད་འདུག

ཡང་བསམ་ཚུལ་འདྲི་ཡུལ་གྱི་བརྒྱ་ཆ་ ༥༦ གིས་རྒྱ་ནག་གཞུང་གི་ཐོག་མཐོང་ཚུལ་བཟང་པོ་མེད་པ་བརྗོད་སྟེ་ གྲངས་འབོར་དེ་ཡང་སྔ་ལོ་ལས་བརྒྱ་ཆ་གཉིས་ཀྱི་མཐོ་བ་ཡིན་འདུག་ཀྱང་། བརྒྱ་ཆ་ ༤༥ ཙམ་གྱིས་རྒྱ་ནག་སྐམ་ས་ཆེན་པོའི་མི་སེར་ཐོག་མཐོང་ཚུལ་བཟང་པོ་མེད་པ་བརྗོད་འདུག འདི་ནི་སྔ་ལོ་ནས་བརྒྱ་ཆ་གཉིས་ཀྱི་ཉུང་བ་ཡིན་པ་རེད།

བསམ་ཚུལ་འདྲི་ཡུལ་གྱི་གྲངས་འབོར་ཕྱེད་ཀ་ལྷག་གིས་ ཐེ་ལྦན་དང་རྒྱ་ནག་སྐམ་ས་ཆེན་པོའི་དབར་ད་ལྟའི་འདྲ་མཉམ་གྱི་གནས་བབས་ཐོག་གནས་དགོས་པ་བརྗོད་ཡོད་པ་དང་། ཡང་བརྒྱ་ཆ་ ༢༩ ཙམ་གྱིས་ཐེ་ལྦན་འཕྲལ་དུའམ་རིམ་པས་རང་བཙན་འབྱུང་རྒྱུར་འདོད་པ་བྱེད་ཀྱི་ཡོད་པ་བཏོན་ཞིང༌། བརྒྱ་ཆ་བཅུ་གྲངས་ཤིག་གིས་ཐེ་ལྦན་རྒྱ་ནག་སྐམ་ས་ཆེན་པོ་དང་ཟླ་བསྒྲིལ་གཏོང་དགོས་པའི་བསམ་ཚུལ་བཏོན་འདུག།