བདེན་པའི་མེ་ལྕེ་སྐོར་བསྐྱོད་ཨོས་ཊྲེ་ལི་ཡར་འབྱོར་བ།

༄༅།    །དེ་ཡང་ཕྱི་ཟླ་ ༩ ཚེས་ ༡༥ ཉིན་བདེན་པའི་མེ་ལྕེ་དེ་བཞིན་ཨོས་ཊྲེ་ལི་ཡའི་གྲོང་ཁྱེར་མེལ་བྷོན་གྱི་སྤྱི་མཐུན་ཚོགས་པའི་ཐང་ཆེན་ Federation Square ཞེས་པ་དེར་འབྱོར་སྐབས།    ཨོས་ཊྲེ་ལི་ཡར་རྟེན་གཞི་བྱས་པའི་རྒྱ་རིགས་མང་གཙོ་མཐུན་སྒྲིལ་ཚོགས་པའི་སྐུ་ཚབ་འཐུས་མི་རྣམ་པ་དང་ཨོས་ཊྲེ་ལི་ཡའི་གྲོང་ཁྱེར་ཝིཀ་ཊོ་རི་ཡེའི་ནང་རྟེན་གཞི་བྱས་པའི་ཝི་ཏི་ནམ་དང་།    སོག་རིགས་ཚོགས་པའི་སྐུ་ཚབ་འཐུས་མི་བཅས་ཕེབས་ཏེ་མཛད་སྒོར་མཉམ་ཞུགས་གནང་བས་མ་ཟད། སྐུ་ཚབ་རྣམ་པས་རྒྱ་ནག་གཞུང་གིས་བོད་མི་ཚོར་དམ་དྲག་ཧ་ཅང་ཆེ་བའི་སྲིད་བྱུས་འཛིན་བཞིན་པ་དེར་བོད་མི་རྣམས་མཐར་འུ་ཐུག་ཐབས་ཟད་ཀྱིས་རང་ལུས་མེར་སྲེག་བཏང་སྟེ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་བོད་ལ་གདན་འདྲེན་ཞུ་དགོས་པ་དང། བོད་ལ་རང་དབང་དགོས་པའི་འབོད་ཚིག་བསྒྲགས་ཏེ་ད་བར་བོད་མི་ ༥༡ རང་ལུས་མེར་སྲེག་བཏང་ཡོད་སྐོར་གསུངས་ཡོད་པ་རེད།

ཁོང་རྣམ་པས་ད་དུང་།    ད་ལྟའི་བོད་ནང་གི་ཛ་དྲག་གནས་སྟངས་ཀྱི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་བོད་མིའི་ཐོག་དམ་དྲག་ཅན་གྱི་སྲིད་བྱུས་མུ་མཐུད་ལག་བསྟར་འོག་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་།    སྐད་ཡིག་རང་དབང། ཆོས་དད་རང་དབང་། བོད་མིའི་ངོ་བོ་དང་།    རིག་གཞུང་གཅེས་འཛིན་བྱ་རྒྱུའི་ཐོབ་ཐང་སོགས་ལ་རྩིས་མེད་རྡོག་རོལ་བཏང་བས་མ་ཟད། བོད་མི་ཚོར་རང་གི་ཆོས་ཕྱོགས་ཀྱི་དབུ་ཁྲིད་༸གོང་ས་ཏཱ་ལའི་བླ་མ་མཆོག་ལ་མཚན་སྨད་ཞུས་བཅུགས་པ་སོགས་ལས་བྱུང་བ་ཞིག་ཡིན་པ་སོགས་ཞིབ་ཕྲ་ངོ་སྤྲོད་གནང་ཡོད་པ་རེད།།